Singatshengisa Njani Ukuthi Siyabathanda Abanye?
Sonke singabantwana baka-Adamu yikho siyimuli yinye. Emulini kukhangelelwe ukuthi abantu bathandane futhi bahloniphane kodwa lokho sekulilihlo lentwala. Lokhu ayisikho okufunwa nguNkulunkulu wethu osithandayo.
IMIBHALO ENGCWELE ITHI SITHANDANE
“Thandani umakhelwane wenu njengalokhu lizithanda lina.”—ULEVI 19:18.
“Qhubekani lithanda izitha zenu futhi libathandazela abalihlukuluzayo.”—UMATHEWU 5:44.
KUTSHONI UKUTHANDA ABANYE?
Zwana ukuthi uthando luchasiswe njani eLizwini likaNkulunkulu, ku-1 KwabaseKhorinte 13:4-7.
“Uthando luyabekezela njalo lulomusa.”
Ongacabanga ngakho: Uzwa njani nxa abanye bekubekezelela futhi bekutshengisa umusa njalo bengakuzondeli lanxa uphambanisile?
“Uthando kalulamhawu.”
Ongacabanga ngakho: Uzwa njani nxa abanye besiba lomhawu ngezinto olazo baze badlulise amalawulo?
Uthando “kaluzifuneli okwalo.”
Ongacabanga ngakho: Uzwa njani nxa abanye bezimisele ukulalela imibono yakho futhi bevuma ukuntshintsha lokho abakucabangayo?
Uthando “kalugcini izikhwili.”
Ongacabanga ngakho: UJehova uzimisele ukuthethelela abantu abavuma izono zabo futhi baphenduke. “Kahlali ebeka imilandu njalo, futhi kagcini ulaka lwakhe kokuphela.” (IHubo. 103:9) Siyathaba nxa umuntu esimphambaniseleyo esithethelela. Lathi kumele sibathethelele bonke abasiphambaniselayo.—IHubo 86:5.
Uthando “kaluthokoziswa ngokungalunganga.”
Ongacabanga ngakho: Kusizwisa ubuhlungu ukubona abanye besihleka nxa siphakathi kobunzima. Yikho akumelanga sihleke abanye nxa besebunzimeni lanxa kuyikuthi bake basiphatha kubi.
Ukuze sithole izibusiso ezivela kuJehova kumele sithande bonke abantu kungelani lokuthi bavela ngaphi, banganani kumbe bangumhlobo bani. Enye indlela esingatshengisa ngayo ukuthi siyabathanda abanye yikubancedisa nxa bedinga uncedo.
Nanku Okunye
VUKANI!
Okungenza Uthokoze—Uthando
Ukutshengisa abanye uthando lokuthandwa kungenza umuntu athokoze.
