UNkulunkulu wathembisa umphrofethi wakhe u-Abhrahama ukuthi omunye wenzalo yakhe wayezaletha izibusiso kuzo “zonke izizwe zomhlaba.” (UGenesisi 22:18) Yayizakuba ngubani inzalo le?

Eminyakeni engaba ngu-2 000 eyadlulayo, uNkulunkulu wanika uJesu oyinzalo ka-Abhrahama amandla okwenza izimangaliso. Izimangaliso lezi zatshengisa ukuthi nguJesu owayezaletha izibusiso kuzo zonke izizwe njengoba uNkulunkulu wayethembisile.—KwabaseGalathiya 3:14.

Izimangaliso azenzayo zenza kwacaca ebantwini ukuthi nguye owayekhethwe nguNkulunkulu ukuthi alethe izibusiso ebantwini njalo uzasetshenziswa nguNkulunkulu ukuthi alethe izibusiso ezingapheliyo esikhathini esizayo. Nanzelela ukuthi izimangaliso ezenziwa nguJesu zibutshengisa njani ubuntu bakhe obuhle.

Wayelesihawu—UJesu welapha abagulayo.

Ngelinye ilanga indoda eyayilobulephero yacela ukuthi uJesu ayelaphe. UJesu wayibamba wasesithi kuyo: “Ngiyafuna!” Masinyane nje ubulephero banyamalala.—UMakho 1:40-42.

Wayephana—UJesu wanika ababelambile ukudla.

UJesu wayengafuni ukubona abantu belambile. Kulezikhathi lapho uJesu anika khona abantu abanengi kakhulu ukudla ngendlela eyisimangaliso esebenzisa izinkwa ezilutshwana lenhlanzi ezilutshwana. (UMathewu 14:17-21; 15:32-38) Bonke badla basutha okunye ukudla kwaze kwasala.

Wayelozwelo—UJesu wavusa abafileyo.

UJesu wavusa indodana yomfelokazi ngoba ‘wamzwela usizi’. Phela indodana le kwakuyiyo yodwa kunina.—ULukha 7:12-15.