Ukuba Ngumuntu Olungileyo Kungenza Ube Lekusasa Elihle Yini?
Okweminyaka eminengi abantu abanengi bebecabanga ukuthi ukuba ngumuntu olungileyo futhi oziphethe kuhle kwenza ube lekusasa elihle. Ngokwesibonelo, abantu abanengi abahlala e-Asia bavumelana lalokho okwatshiwo yindoda eyinjulangqondo edumileyo okuthiwa nguConfucius eyaphila ngo-551 kusiya ku-479 B.C.E. a Yathi: “Ongafuni kwenziwe kuwe, ungakwenzi kwabanye.”
OKWENZIWA NGABANTU ABANENGI
Abantu abanengi balokhu becabanga ukuthi nxa bangaziphatha kuhle bazakuba lekusasa elihle. Bayazama ukuba lenhlonipho, ukuba lembeko, ukwenza lokho okulindelwe ukuthi bakwenze lokuba lomzwangedwa ohlanzekileyo. Owesifazana weVietnam okuthiwa nguLinh uthi: “Ngangicabanga ukuthi nxa ngingaba ngumuntu olungileyo njalo okhuluma iqiniso ngizabusiswa.”
Abanye bayazama ukwenza okuhle ngenxa yalokho abakufundiswa emasontweni abo. Indoda okuthiwa nguHsu-Yun ehlala eTaiwan ithi, “Ngafundiswa ukuthi nxa umuntu esenza okuhle uzathokoza angafa kodwa nxa esenza okubi uzatshiswa.”
KUYANCEDA YINI UKUBA NGUMUNTU OLUNGILEYO?
Kuliqiniso sibili ukuthi sizancedakala kakhulu nxa singenzela abanye okuhle. Kodwa abanengi abazama ukwenzela abanye okuhle, baphathwa kubi ngezinye izikhathi. Owesifazana okuthiwa nguShiu Ping ohlala eHong Kong uthi: “Ngazibonela ngawami ukuthi labo abenzela abanye okuhle abahlali bethola izibusiso. Ngangisenza konke okusemandleni ami ukuthi nginakekele imuli yami futhi ngisenza okulungileyo. Lanxa kunjalo umkami wangitshiya mina lendodana yami.”
Abantu abanengi sebebone ukuthi ayisibo bonke abasontayo abajayele ukuba ngabantu abalungileyo. U-Etsuko owesifazana ohlala eJapan uthi: “Ngajoyina isonto ethile futhi ngaphiwa isikhundla sokukhokhela abasakhulayo. Ngasala ngingelankani ngibona abanye bengaziphathanga, belwela izikhundla njalo besebenzisa kubi imali yetshetshi.”
“Ngangisenza konke okusemandleni ami ukuthi nginakekele imuli yami futhi ngisenza okulungileyo. Lanxa kunjalo umkami wangitshiya mina lendodana yami.”—USHIU PING OWEHONG KONG
Abanye abakuthandayo ukuya esontweni njalo abazama ukwenza okuhle bayadana lapho besehlelwa yizinto ezimbi. Lokhu yikho okwenzakala kowesifazana okuthiwa nguVan ohlala eVietnam. Uthi: “Nsuku zonke ngangithenga izithelo, amaluba lokudla besengisiyakunikela kubokhokho bami abafayo, ngilethemba lokuthi ngizathola izibusiso esikhathini esizayo. Lanxa ngakwenza konke lokhu okweminyaka eminengi futhi ngenza lezinye izinto ezinhle, umkami wahlaselwa ngumkhuhlane omubi kakhulu. Ngemva kwalokho indodakazi yami eyayileminyaka engu-20 yafa ngesikhathi ifunda kwelinye ilizwe.”
Manje kuyini okungenza ube lekusasa elihle nxa ukuba ngumuntu olungileyo kungenelanga? Ukuze siphendule umbuzo lo sidinga okungasinika izimpendulo zemibuzo esilayo futhi kusincede sibe lekusasa elihle. Kuyini okungasinceda?
a U-B.C.E., umela ukuthi “Before the Common Era,” okutsho isikhathi uJesu engakabuyi emhlabeni.
Nanku Okunye
IMIBUZO YEBHAYIBHILI IYAPHENDULWA
IBhayibhili Lithi Kumele Sibaphathe Njani Abanye?
Ngesikhathi uJesu ekhuluma amazwi asemthethweni lo, wayesikhuthaza ukuthi siphaphathe kuhle abantu bonke kuhlanganisa lalabo abasizondayo
INQABAYOKULINDA
Kungani Izinto Ezimbi Zisehlela Abantu Abalungileyo?
IBhayibhili lisitshela izinto ezintathu eziphathelane lokuthi kungani kulokuhlupheka.
