INhlanganiso Yomanyano Wamazwe Omhlaba (i-UN) ikhuthaza abantu ukuthi babambisane, bahloniphe amalungelo abanye njalo banakekele umhlaba. Kungani? Amazwi kaMaher Nasser atholakala ephephandabeni okuthiwa yi-UN Chronicle athi: “Izinto ezinjengokuntshintsha komkhathi, ubugebenga, ukungaphathwa kuhle kwabantu, izingxabano ezingapheliyo, ukususwa kwabantu ezindaweni abahlala kuzo, ukwanda kwamalwecatsha kanye lemikhuhlane ethelelwanayo sekugcwele yonke indawo.”

Abanye baze bakhankasele ukuthi kube lohulumende oyedwa obusa umhlaba. Abanye abakhankasela ukuthi kube njalo nguDante owayeyisazi sefilosofi, eyimbongi futhi eyisiphathamandla sezombusazwe lo-Albert Einstein owayeyisifundiswa sesayensi. UDante wathi ngeke kube lokuthula emhlabeni nxa kulabohulumende abanengi. Watsho amazwi kaJesu akuLukha 11:17 athi “loba yiwuphi umbuso owehlukene phakathi uyadilika.”

EMpini Yomhlaba Yesibili kwasetshenziswa amabhomba alamandla kakhulu. Ngemva kwempi le u-Albert Einstein wabhalela i-General Assembly of the United Nations incwadi eyaphinda yadindwa emaphephandabeni lakubomagazini esithi: “INhlanganiso Yomanyano kumele ilungise izinto masinyane ukuze emhlabeni kube lokuvikeleka futhi kube lohulumende oyedwa.”

Kodwa abezombusazwe abangabumba uhulumende onjalo bangaba lamandla okuqeda zonke inhlupho njalo bahlale bengela bugwelegwele futhi bangacindezeli abanye yini? Bangenza izinto ezimbi njengabanye ababusi yini? Imibuzo le isikhumbuza amazwi akhulunywa nguLord Acton owayengowezembali eBritain. Wathi nxa abantu bangaba lamandla amakhulu baba lobugwelegwele.

Abantu kumele bamanyane ukuze bathole intokozo yeqiniso. Kodwa singenzani ukuze abantu bonke bamanyane? Kungenzakala yini ukuthi abantu bamanyane? IBhayibhili lisitshela ukuthi kuzakwenzakala. Njani? UMbuso kaNkulunkulu yiwo ozakwenza ukuthi abantu bamanyane hatshi ohulumende babantu abalobugwelegwele. UMbuso lowo uzatshengisa ukuthi uNkulunkulu nguye olelungelo lokubusa ezulwini lasemhlabeni.​—ULukha 4:43.

UJesu Khristu wayecabanga ngoMbuso kaNkulunkulu ngesikhathi esitsho amazwi omthandazo oyisibonelo athi: “UMbuso wakho kawuze. Intando yakho kayenziwe emhlabeni.” (UMathewu 6:9, 10) UMbuso kaNkulunkulu uzakwenza ukuthi intando yakhe yenziwe emhlabeni hatshi intando yabohulumende bomhlaba.

UMbuso kaNkulunkulu ubizwa langokuthi ‘nguMbuso wezulu.’ (UMathewu 5:3) Ngenxa yani? Ngenxa yokuthi uMbuso lo uzabusa usezulwini kodwa ubusa umhlaba. Lokhu kutsho ukuthi uMbuso lo awusoze ubhadalise abantu imithelo. Lokhu kuzabaphumuza sibili abantu!

UJesu nguye iNkosi yoMbuso kaNkulunkulu futhi ukhethwe nguNkulunkulu ngokwakhe. IBhayibhili lithi ngoJesu:

• “Umbuso uzakuba phezu kwamahlombe akhe . . . Ukwanda kombuso wakhe lokuthula akuyikuba lomkhawulo.”​—U-Isaya 9:6, 7.

•   ‘Waphiwa amandla lobukhosi lamandla okubusa; bonke abantu, lezizwe zonke labantu bendimi zonke bamkhonza. Ubukhosi bakhe abuyikwedlula.’​—UDanyeli 7:14.

• “Umbuso womhlaba usube nguMbuso weNkosi yethu [uNkulunkulu] loKhristu wayo.”​—ISambulo 11:15.

UMbuso kaNkulunkulu uzagcwalisa isicelo esisemthandazweni weNkosi sokuthi intando kaNkulunkulu yenziwe emhlabeni. Bonke abantu bazafunda ukunakekela umhlaba ukuze ube yindawo evikelekileyo njalo elabantu abalempilakahle.

Okuqakatheke kakhulu okuzakwenziwa nguMbuso kaNkulunkulu yikufundisa izizalwane zawo izimiso ezifananayo. Abantu bazamanyana. U-Isaya 11:9 uthi: “Abayikulimaza loba badilize . . . ngoba umhlaba uzakuba usugcwele ulwazi lukaJehova njengamanzi egcwele ulwandle.”

INhlanganiso Yomanyano yehlulekile ukumanyanisa abantu kanye lokuletha ukuthula. Kodwa uMbuso kaNkulunkulu uzakwenza lokhu. IHubo 37:11 lisitshela ukuthi abantu abahlala emhlabeni ‘bazakholisa ukuthula okukhulu.’ Kuyabe kungasela bugebenga, ukungcoliswa komhlaba, ubuyanga kanye lezimpi. Kodwa lokhu kuzakwenzakala nini? UMbuso kaNkulunkulu uzaqalisa nini ukubusa umhlaba? Uzabusa njani? Kumele wenzeni nxa ufuna ukubuswa nguMbuso kaNkulunkulu? Ake sibone.