Umoya usungcolile okokuthi usuyingozi ebantwini lasezinyamazaneni. Inhlanganiso okuthiwa yi-World Health Organisation ithi umoya ohlanzekileyo utholwa ngabalutshwana kuphela lamuhla.

Ukuphefumula umoya ongcolileyo kungabangela imikhuhlane etshiyeneyo enjengomkhuhlane wenhliziyo, imvukuzane yamaphaphu leminye imikhuhlane elokwenza lokuphefumula. Kubikwa ukuthi umoya ongcolileyo ubulala abantu abangafika 7 miliyoni umnyaka ngamunye.

Umhlaba wadalwa ngendlela yokuthi uyenelisa ukuqhubeka unika abantu lezinyamazana umoya ohlanzekileyo. Umoya lo ohlanzekileyo ubuzaqhubeka utholakala aluba abantu abawungcolisi. Ake sixoxe ngezibonelo ezilandelayo.

• Njengoba sike satsho esihlokweni esidlulileyo, izihlahla zamukela i-carbon dioxide ukuze ingangcolisi umoya esiwuphefumulayo. Kodwa kulezinye izihlahla ezimila emaxhaphozini ezithatha i-carbon dioxide enengi kakhulu ukwedlula leyo ethathwa yizihlahla ezisemaguswini.

• Abachwayisisayo basanda kuthola ukuthi ezinye izimila eziselwandle azimunyi kuphela i-carbon dioxide esemkhathini kodwa ziphinda ziyifihle phansi elwandle. Nxa izimila lezi sezimunye i-carbon dioxide enengi ziyatshona enzikini yolwandle futhi zihlale khona okwamakhulu eminyaka.

• Umhlaba wadalwa usenelisa ukuziklina futhi lokhu kwakhanya ngesikhathi se-COVID-19. Ukuvalwa kwamafekithali lokuhamba kwezimota ezilutshwana ngo-2020 kwenza ukuthi umoya esiwuphefumulayo ubengcono kakhulu. Omunye umbiko owakhitshwa ngo-2020 utshengisa ukuthi emazweni amanengi amafekithali athi esanda kuvalwa umoya esiwuphefumulayo wahle waqalisa ukuhlanzeka.

Ohulumende abatshiyeneyo baqhubeka bekhuthaza amakhampani ukuthi enze konke akwenelisayo ukuze angangcolisi umoya esiwuphefumulayo. Abezesayensi sebenanzelele ukuthi kulezinye indlela zokuklina umoya ongcolileyo. Ngokwesibonelo, kulezibungwana esingaziboni ngamehlo ezitshintsha izinto ezingcolisa umoya ukuze zingabi yingozi ebantwini lakwezinye izinto eziphilayo. Ezinye ingcitshi zikhuthaza abantu ukuthi bahambe ngenyawo loba batshove amabhayisikili kulokutshayela izimota lokuthi basebenzise izinto ezingangcolisi umkhathi nxa bepheka kumbe besenza ezinye izinto.

Umbiko ka-2022 owakhitshwa zinhlanganiso ezitshiyeneyo ezigoqela i-World Health Organization le-World Bank itshengisa ukuthi kunengi okumele kwenziwe.

Umbiko lo uthi ngo-2020 abantu abanengi babesebenzisa izinto ezingcolisa umoya nxa bepheka. Endaweni ezinengi balutshwana abantu abenelisa ukuthenga izitofu kumbe ukusebenzisa izinto ezingangcolisi umoya.

‘Nanku okutshiwo nguJehova uNkulunkulu weqiniso, uMdali wamazulu yena owelula amazulu, owendlala umhlaba lakho konke okukuwo, onika abantu abakuwo ukuphefumula.’—U-Isaya 42:5.

UNkulunkulu nguye owadala umoya esiwuphefumulayo lendlela yokuthi uhlale uhlanzekile. Kanti njalo ulothando olungapheliyo ngabantu futhi lamandla akhe kawapheli. Ukwazi lokhu kwenza singathandabuzi ukuthi kasoze avumele ukuthi umoya esiwuphefumulayo uqhubeke ungcoliswa. Khangela isihloko esithi “UNkulunkulu Uthi Umhlaba Awusoze Utshabalale.”