Hlonipha Abanye
KUNGANI KUQAKATHEKILE UKUTHI SIHLONIPHE ABANYE?
Ukuhlonipha abanye kuyanceda ukuthi kungabi lokuxabana njalo kuyalwehlisa ulaka.
-
Isaga esiseBhayibhilini sithi: “Impendulo epholileyo iyalwehlisa ulaka, kodwa amazwi ahlabayo avusa ulaka.” (IZaga 15:1) Ukungahloniphi abanye ngalokho esikukhulumayo kumbe esikwenzayo kungenza isimo sibe sibi kakhulu, kunjengokuthela ipharafini emlilweni.
-
UJesu wathi: “Umlomo ukhuluma okuphuphuma enhliziyweni.” (UMathewu 12:34) Ukukhuluma amazwi angatshengisi inhlonipho kuveza indlela umuntu abona ngayo abantu beminye imihlobo, abakhuluma olunye ulimi, abavela kwamanye amazwe labakhuliswe ngendlela etshiyene leyakhe.
Ukuhlolisisa okusanda kwenziwa ebantwini abangu-32 000 abahlala emazweni angu-28, kutshengisa ukuthi amaphesenti angu-65 abantu laba, bathi abantu abasahloniphani ngitsho lamuhla.
ONGAKWENZA
Hlonipha bonke abantu nxa usesikolo kumbe usemsebenzini kungelani lokuthi uvumelana lemibono yabo yini loba hatshi. Dinga izinto elivumelana kuzo. Ukwenza njalo kuzalinceda ukuthi lingacini selixabana.
Phatha abanye ngendlela ofuna ukuphathwa ngayo. Nxa ungaba lomusa kwabanye, labo bazakuphatha kuhle.
Thethelela. Nxa umuntu engakutshela amazwi ahlabayo kumbe enze into ekucaphulayo, ungazitsheli ukuthi ubehlose ukukuzwisa ubuhlungu.
OFAKAZI BAKAJEHOVA BATSHENGISA NJANI UKUTHI BAYABAHLONIPHA ABANYE?
Emphakathini abahlala kuwo lalapho abasebenza khona, oFakazi bakaJehova bazama ngamandla wonke ukuhlonipha abanye futhi banceda labanye ukuthi benze njalo.
Sifundisa bonke abantu iBhayibhili mahala, kodwa asibambi muntu ngamandla ukuthi amukele lokho esikukholwayo kumbe imibono yethu. Umsebenzi wethu wokutshumayela siwenza “ngobumnene langenhlonipho enkulu” silandela lokhu esikutshelwa liBhayibhili.—1 UPhetro 3:15; 2 KuThimothi 2:24.
Asibandlululi kodwa samukela wonke umuntu ofikayo emihlanganweni yethu ukuze azofunda okunengi eBhayibhilini kungelani lokuthi ungumhlobo bani. Asikhethi muntu kodwa sitshengisa “inhlonipho eqondileyo kwabanye.”—1 UPhetro 2:17, Holy Bible In Ndebele.
Siyazihlonipha iziphathamandla kungelani lokuthi sihlala ngaphi. (KwabaseRoma 13:1) Siyayilalela imithetho kahulumende njalo siyabhadala yonke imithelo. Lanxa singangeni kwezombusazwe, siyakuhlonipha lokhu okukhethwa ngabanye endabeni le.
