Nxa kunguNkulunkulu obangela ukuhlupheka, ngeke sibasole abantu nxa bengafuni ukumkhonza.

Abakhokheli bamasonto abanengi bafundisa ukuthi uNkulunkulu nguye obangela ukuhlupheka. Ngokwesibonelo, abanye bathi:

• UNkulunkulu ujezisa abantu ngokubehlisela izingozi zemvelo.

• UNkulunkulu uthatha abantwana ukuze bayekuba zingilosi ezulwini.

• Nxa kulempi, uNkulunkulu uyabe eleqembu alisekelayo.

Kodwa kungenzakala yini ukuthi okufundiswa ngabakhokheli bamasonto ngoNkulunkulu kungamanga? Nxa kuyikuthi bakhuluma amanga ngaye, kambe singabakholwa nxa sebesithi nguye obangela ukuhlupheka?

UNkulunkulu ayisuye obangela ukuthi sihlupheke.

Lokho kuyabe kungasahambelani lobuntu bakhe obuchasiswa eBhayibhilini. Ngokwesibonelo:

“Zonke izindlela zakhe [uNkulunkulu] zilungile. . . . Uqotho njalo ulungile yena.”—UDUTHERONOMI 32:4.

“Kakube khatshana laye uNkulunkulu ukwenza ububi, khatshana kukaSomandla ukona.”—UJOBE 34:10.

‘USomandla ngeke akutshile ukwahlulela okuhle.’—UJOBE 34:12.

UNkulunkulu kawamukeli amasonto akhuluma amanga ngaye.

Lokhu kuhlanganisa lalawo afundisa ukuthi uNkulunkulu nguye osenza sihlupheke kanye lalawo angenela kwezempi labangela udlakela.

“Abaphrofethi baphrofetha amanga ngebizo lami. Angibathumanga njalo angibakhethanga kumbe ngikhulume labo. Baphrofetha imibono yamanga kini.”—UJEREMIYA 14:14.

UJesu wasola abakhokheli benkolo ababengabazenzisi.

“Kayisuye wonke umuntu othi kimi, ‘Nkosi, Nkosi,’ ozangena eMbusweni wamazulu, kodwa ozangena ngulowo kuphela owenza intando kaBaba osezulwini. Ngalelolanga abanengi bazakuthi kimi: ‘Nkosi, Nkosi, kasiphrofethanga ngebizo lakho yini, sakhipha amadimoni ngebizo lakho futhi senza lezimangaliso ezinengi ngebizo lakho na?’ Lapho-ke ngizathi kubo: ‘Angilazi ngitsho! Sukani phansi kwami, lina elenza okubi!’”—UMATHEWU 7:21-23.