Ezempucuko Zingaphambanisa Njani Ubungane Bakho Labanye?
Ezokuxhumana sezenze kwaba lula ukuthi abantu abahlala emazweni atshiyeneyo baxoxe ngoba bayenelisa ukuthumezelana amameseji loba ukufonelana. Ezempucuko ziyabanceda sibili.
Kodwa abantu abasebenzisa ezempucuko kuphela ukuze baxoxe labangane babo bacina . . .
-
bengaselazwelo.
-
bedana.
-
beqakathekisa okufunwa yibo.
OKUMELE UKWAZI
UZWELO
Ukuze sibe lozwelo kumele sibe lesikhathi sokucabanga ngesimo omunye umuntu ayabe ephakathi kwaso. Kodwa lokhu kungaba nzima nxa sitshonela ukubala lokuthumela amameseji lokukhangela okufakwe ngabanye kwezokuxhumana.
Nxa kungena amameseji amanengi kakhulu efonini yakho, ungathwala nzima ukuphendula abangane bakho. Ungacina uphendula wonke amameseji ngesiphangephange uze wehluleke ukunanzelela ukuthi kulomngane wakho obekufakele imeseji edinga uncedo.
ONGACABANGA NGAKHO: Kuyini ongakwenza ukuze utshengise ukuthi ‘ulesisa esikhulu’ nxa uxoxa labangane bakho usebenzisa ezempucuko?—1 UPHETRO 3:8.
UKUDANA
Abezesayensi bathi behlolisisa bananzelela ukuthi abantu abanengi bayadana ngemva kokusebenzisa ezokuxhumana. Babona ukuthi umuntu okhangela amapikitsha athunyezwa ngabanye angacina esezisola esebona ukuthi uzidlalisele isikhathi sakhe.
Kanti njalo ukukhangela amapikitsha athunyezwa ngabanye bezikholisela kungabangela ukuthi umuntu acine ebona angani impilo yakhe ayichazi. Uyabe ebona angani abanye bayathokoza kulaye.
ONGACABANGA NGAKHO: Ungenzani ukuze ungaziqathanisi labanye abantu nxa usebenzisa ezokuxhumana?—KWABASEGALATHIYA 6:4.
UKUQAKATHEKISA OKUFUNWA NGUWE
Omunye umbalisi wabhala wathi abanye abantwana abafundisayo babeqakathekisa okufunwa yibo njalo befuna ukuba labangane abazabanceda kuphela. * Umuntu onjalo uyabe esebona angani abangane bakhe bafanana lefoni angayisebenzisa kumbe ayifake eceleni ngokuthanda kwakhe.
ONGACABANGA NGAKHO: Okuthumeza kwezokuxhumana kutshengisa ukuthi uthanda ukuncintisana labanye yini kumbe ukuthi uqakathekisa okufunwa nguwe kuphela?—KWABASEGALATHIYA 5:26.
ONGAKWENZA
HLOLISISA INDLELA OSEBENZISA NGAYO EZEMPUCUKO
Nxa uzisebenzisa kuhle ezempucuko zizakunceda ukuthi uhlale uxoxa labangane bakho njalo usondele kubo.
ISIMISO ESISEBHAYIBHILINI: ‘Uthando kaluzifuneli okwalo.’—1 KWABASEKHORINTE 13:4, 5.
Faka ukhwetshu kumacebo ongafuna ukuwasebenzisa kumbe ubhale amanye owacabangayo.
-
Zama ukuxoxa labantu mathupha kulokuthi uhlale ukhuluma labo ngezempucuko
-
Ibeke eceleni ifoni yakho kumbe uyifake esimeni sokuthi ingakuphambanisi nxa uxoxa labanye
-
Nciphisa isikhathi osiqeda ukhangele amapikitsha afakwe ngabanye kwezokuxhumana
-
Lalelisisa nxa abanye bekhuluma
-
Thintana lomngane wakho ongabe ephakathi kobunzima
^ indima 17 Kuthethwe ebhukwini elithi Reclaiming Conversation.
