UJESU wayejayele ukufundisa abantu indlela yokuthandaza. Abakhokheli benkolo abangamaJuda bangesikhathi sakhe babethandaza bemi “okuhlangana khona imigwaqo emikhulu.” Babekwenzelani? “Ukuze babukwe ngabantu.” Babefuna abantu bababuke ngokuthi bazinikele okholweni lwabo. Abanengi babo babesenza imithandazo emide futhi ‘bephinda izinto ezifananayo’ angathi yikho okwakuzenza uNkulunkulu azwe imithandazo yabo. (UMathewu 6:5-8) UJesu wakwenza kwacaca ukuthi lokho ababekwenza kwakungancedi ngalutho. Lokho kwasiza abaqotho bakwazi izinto okumele bazixwaye nxa bethandaza. Kodwa uJesu kaphelelanga ekutsheleni abantu okungamelanga bakwenze nxa bethandaza.

UJesu wasifundisa ukuthi nxa sithandaza kumele sitsho isifiso sethu sokuthi ibizo likaNkulunkulu lingcweliswe, uMbuso wakhe uze lokuthi intando yakhe yenziwe. Waphinda wathi singacela uNkulunkulu ukuthi asincedise ngalokho esikudingayo empilweni zethu. (UMathewu 6:9-13; ULukha 11:2-4) Wasebenzisa imizekeliso eveza ukuthi kumele siphikelele, sibe lokholo njalo sithobeke ukuze imithandazo yethu iphendulwe. (ULukha 11:5-13; 18:1-14) UJesu wayengapheleli emazwini kuphela kodwa wayekwenza lokho ayekutsho.—UMathewu 14:23; UMakho 1:35.

Akuthandabuzwa ukuthi lokho uJesu akufundisayo kwanceda abafundi bakhe ukuthi bathuthukise imithandazo yabo. Kodwa uJesu walinda kwaze kwaba lilanga lakhe lokucina emhlabeni engakafundisi abafundi bakhe isifundo esiqakathekileyo mayelana lokuthandaza.

UJesu waqeda phose bonke ubusuku bakhe bokucina ekhuthaza abaphostoli bakhe ababethembekile. Sasesifikile isikhathi sokuthi abafundise into entsha. Wathi kubo: “Mina ngiyindlela leqiniso kanye lokuphila. Kakho ongeza kuBaba ngaphandle kokuthi eze ngami.” Sekudlule isikhatshana wabathembisa wathi: “Loba yini eliyicela ngebizo lami ngizayenza ukuze uBaba akhazinyuliswe ngeNdodana. Nxa lingacela loba yini ngebizo lami ngizayenza.” Esezaqeda ingxoxo yakhe wathi: “Kalikaze licele lutho ebizweni lami kuze kube lamuhla. Celani lizakwamukela, ukuze injabulo yenu iphelele.”—UJohane 14:6, 13, 14; 16:24.

Amazwi la ayeqakatheke kakhulu. Esinye isichazamazwi seBhayibhili sithi lapha yikho “lapho indlela yokuthandaza eyatshintsha khona.” UJesu wayengatsho ukuthi abantu sokumele bayekele ukukhuleka kuNkulunkulu bakhuleke kuye. Kodwa wayechasisa indlela entsha yokukhuleka kuNkulunkulu.

UNkulunkulu ubelokhu elalela imithandazo yezinceku zakhe kusukela kudala. (1 USamuyeli 1:9-19; IHubo 65:2) Kodwa kusukela ngesikhathi ama-Israyeli esenza isivumelwano somthetho loNkulunkulu, loba ngubani owayefuna imithandazo yakhe iphendulwe kwakumele avume ukuthi ama-Israyeli yisizwe esikhethwe nguNkulunkulu. Ngesikhathi sokubusa uSolomoni, bonke ababefuna imithandazo yabo iphendulwe kwakumele bamukele ukuthi ithempeli yiyo indawo uNkulunkulu ayeyikhethile ukuthi kwenziwe kuyo imihlatshelo. (UDutheronomi 9:29; 2 ImiLando 6:32, 33) Kodwa indlela le yokukhonza yayizatshintsha ngokuhamba kwesikhathi. Umphostoli uPhawuli waveza ukuthi uMthetho owanikwa ama-Israyeli lemihlatshelo eyayisenziwa ethempelini ‘yayiyisithunzi sezinto ezinhle ezizayo, hatshi izinto lezo sibisibili.’ (UHebheru 10:1, 2) Isithunzi leso sasizathathelwa indawo yilokho okungokoqobo. (UKholose 2:17) Kusukela ngo-33 C.E., okwenza umuntu abe ngumngane kaJehova kayisikho kulandela izinto eziseMthethweni kaMosi, kodwa yikulalela uJesu Khristu, lowo uMthetho owawukhokhela abantu ubasa kuye.—UJohane 15:14-16; uGalathiya 3:24, 25.

UJesu wasifundisa indlela engcono kulazo zonke yokukhuleka kuJehova. Waveza ukuthi yena ungumngane wethu olamandla amakhulu, osivulela indlela yokuthi imithandazo yethu ilalelwe nguNkulunkulu. Kungani uJesu eyindlela yokuthi imithandazo yethu ilalelwe?

Sonke sizalwa silesono, yikho akula misebenzi kumbe imihlatshelo esingayenza engasusa isono sethu kumbe isenze sifanele ukuba ngabangane bakaJehova uNkulunkulu wethu ongcwele. (KwabaseRoma 3:20, 24; KumaHebheru 1:3, 4.) Kodwa uJesu wanikela ngokuphila kwakhe okungelasono, wabhadala izono zabantu ababezatshengisa ukuthi bayafuna ukubuyisana loNkulunkulu. (KwabaseRoma 5:12, 18, 19.) Yikho-ke, ngenxa yalokho uJesu akwenzayo, loba ngubani ofuna ukuthi izono zakhe zithethelelwe usengaba ngumngane kaNkulunkulu futhi abe “lenkululeko yokukhuluma” laye. Kodwa lokho kuzakwenzakala kuphela nxa umuntu lowo etshengisa ukuthi ulokholo emhlatshelweni kaJesu njalo ethandaza ngebizo lakhe.—Kwabase-Efesu 3:11, 12.

Nxa sithandaza ngebizo likaJesu, sitshengisa ukuthi silokholo ezintweni ezintathu azenzayo ukuze inhloso kaNkulunkulu igcwaliseke: (1) ‘UyiMvana kaNkulunkulu’ eyanikela ngokuphila kwayo ukuze izono zethu zithethelelwe. (2) UJehova wamvusa futhi khathesi ‘usengumphristi omkhulu’ osebenzisa umhlatshelo wakhe ukuze asincede. (3) Nguye yedwa ‘indlela’ yokuthi sithandaze kuJehova.—UJohane 1:29; 14:6; KumaHebheru 4:14, 15.

Ukuthandaza ngebizo likaJesu kutshengisa ukuthi siyamhlonipha. Kufanele simhloniphe ngoba intando kaJehova yikuthi ‘amadolo wonke aguqe ebizweni likaJesu njalo bonke bavume ebantwini ukuthi uJesu Khristu uyiNkosi, besekukhazinyuliswa uNkulunkulu uBaba.’ (KwabaseFiliphi 2:10, 11.) Kodwa okuqakatheke kakhulu yikuthi ukuthandaza ngebizo likaJesu kukhazimulisa uJehova onguye owanikela ngeNdodana yakhe ukuze ancede thina.—UJohane 3:16.

IBhayibhili lisebenzisa amabizo atshiyeneyo ukubiza lokuchasisa uJesu ukuze lisincede sisizwisise ngcono isikhundla sakhe esiphakemeyo. IMibhalo le isinceda sizwisise izibusiso esizitholayo ngenxa yalokho uJesu asenzela khona, akwenzayo khathesi lazakwenza ngesikhathi esizayo. (Khangela ibhokisi elithi “ Umsebenzi KaJesu Oqakathekileyo” ”.) Iqiniso yikuthi uJesu unikwe ‘ibizo eliphezu kwawo wonke amabizo.’ * Uphinde wanikwa wonke amandla ezulwini lasemhlabeni.—KwabaseFiliphi 2:9; UMathewu 28:18.

Sesibonile ukuthi nxa sifuna uJehova alalele imithandazo yethu, kumele sithandaze ngebizo likaJesu. (UJohane 14:13, 14) Kodwa kasifuni ukuthi amazwi athi “ngebizo likaJesu” abe ngumkhuba nje. Ngenxa yani?

Nanku umzekeliso ongasinceda sizwisise. Ake sithi uthole incwadi evela kusomabhizimusi ephetha ngamazwi athi “yimi othembekileyo.” Ungacabanga ukuthi yiyo yini sibili indlela usomabhizimusi azizwa ngayo kumbe ulandela indlela okuvaleliswa ngayo encwadini? Lokhu kusifundisa ukuthi kuqakatheke kangakanani ukusebenzisa ibizo likaJesu emithandazweni yethu hatshi ukukwenza indlela nje yokuphetha imithandazo yethu. Lanxa kumele ‘sithandaze kokuphela,’ kufanele senze njalo ngayo “yonke inhliziyo” yethu, kungabi ngumkhuba nje kuphela.—1 KwabaseThesalonika 5:17; IHubo 119:145.

Kuyini okungasinceda ukuthi singaphongusebenzisa amazwi athi “ngebizo likaJesu”? Zama ukucabangisisa ngobuntu obuhle bukaJesu. Zinike isikhathi sokucabanga ngalokho asekwenzele khona lazimisele ukukwenzela khona. Nxa usuthandaza, bonga uJehova futhi umdumise ngokuthi wasebenzisa iNdodana yakhe ngendlela emangalisayo. Nxa ungenza njalo, uzaba lokholo esithembisweni sikaJesu esithi: “Nxa lingacela loba yini kuBaba, uzalinika yona ebizweni lami.”—UJohane 16:23.