“Lezizindaba ezinhle zoMbuso

Zizatshunyayelwa”

“Lezizindaba ezinhle zoMbuso zizatshunyayelwa emhlabeni wonke ukuze kube lobufakazi ezizweni zonke, besekufika ukuphela.”—UMATHEWU 24:14.

Kutshoni? ULukha umlobi weVangeli wabhala ukuthi uJesu “wahamba etshumayela futhi ememezela izindaba ezinhle zoMbuso kaNkulunkulu, engena idolobho ngedolobho, lesigaba ngesigaba.” (ULukha 8:1) UJesu laye wathi: “Kufanele ngitshumayele izindaba ezinhle zoMbuso kaNkulunkulu lakwamanye amadolobho ngoba yikho engathunywa ukuzokwenza.” (ULukha 4:43) Kanti njalo wathuma abafundi bakhe ukuthi bayetshumayela izindaba ezinhle emadolobheni lasemaphandleni futhi ngokuhamba kwesikhathi wathi kubo: “Lizakuba ngofakazi bami . . . kuze kuyefika emaphethelweni omhlaba.”—ImiSebenzi 1:8; ULukha 10:1.

AmaKhristu Okuqala Akwenza Njani Lokhu? Abafundi bakaJesu bahle bakwenza lokho uJesu ayebatshela khona. “Nsuku zonke baqhubeka befundisa njalo bememezela izindaba ezinhle ngoKhristu uJesu ethempelini kanye lasendlini ngendlu, kabazange bayekele.” (ImiSebenzi 5:42) Abazange bazitshele ukuthi umsebenzi wokutshumayela ngowabantu abalezikhundla. Umlobi wezembali okuthiwa nguNeander wabhala wathi, “UCelsus, umlobi wokuqala owayephikisana lamaKhristu wayeweyisa umsebenzi wokutshumayela ngoba abantukazana abagoqela abathungayo labathunga izicathulo labatshuka izikhumba labantu abangafundanga abangabayanga yibo ababekukhuthalele ukutshumayela ivangeli.” UJean Bernardi wathi ebhala ibhuku lakhe elithi, The Early Centuries of the Church, wathi: “[AmaKhristu] kwakumele ahambe ezindaweni zonke ayekhuluma labantu bonke. Emigwaqweni emikhulu lasemadolobheni, lasemamakethi lasemizini yabantu, kungelani lokuthi ayemukelwa loba hatshi. . . . Kuze kuyefika emikhawulweni yomhlaba.”

Ngobani Abakwenzayo Lokhu Lamuhla? “Umphristi wesonto ye-Anglican uDavid Watson wabhala wathi, “Esinye isizatho esenza abantu bangaqakathekisi ukukhonza kulezinsuku yikuthi amasonto awakuqakathekisi ukutshumayela lokufundisa abantu.” UJosé Luis Pérez Guadalupe wathi eloba ibhuku lakhe elithi, Why Are the Catholics Leaving? wabhala lokho okwenziwa ngamasonto abaVangeli, lamaSabatha kanye lamanye, wathi, “abatshumayeli endlini ngendlu.” Kodwa wathi ebhala ngalokho okwenziwa ngoFakazi bakaJehova wathi: “Balohlelo lokuhamba endlini ngendlu betshumayela.”

Okunye okujabulisayo okwatholwa nguJonathan Turley yilokho okwakubhalwe egwalweni okuthiwa yi-Cato Supreme Court Review 2001-2002. Lwathi, “Nxa ungakhuluma ngaboFakazi bakaJehova abantu abanengi bahle bacabange ngabantu abaphongufika emizini yabo bezotshumayela. Nxa oFakazi bakaJehova betshumayela endlini ngendlu abakwenzeli nje ukuthi abantu balandele lokho [Box]

Ngobani abangamaKhristu Eqiniso?

Ubufakazi lobu esixoxe ngabo ezihlokweni lezi obusekelwe eMibhalweni bukuncedile yini? Usukuzwisisa yini ukuthi ngobani abangamakhristu eqiniso lamuhla? Lanxa kulamaqembu kanye lamasonto amanengi azithi ngawesiKhristu, khumbula ukuthi uJesu watshela abalandeli bakhe, wathi: “Kayisuye wonke umuntu othi kimi, ‘Nkosi, Nkosi,’ ozangena eMbusweni wamazulu, kodwa ozangena ngulowo kuphela owenza intando kaBaba osezulwini.” (UMathewu 7:21) Okuzakusiza ukuthi uthole izibusiso ezizakuba khona nxa sekubusa uMbuso kaNkulunkulu yikwazi ukuthi ngobani abenza intando kaBaba, abatshengisayo sibili ukuthi bangamaKhristu eqiniso, ubusumanyana labo. Siyakucela ukuthi ukhulume laboFakazi bakaJehova abakunike imagazini le, ukuze bakuncedise ukuthi ufunde okunengi mayelana loMbuso kaNkulunkulu kanye lezibusiso ozaziletha.—ULukha 4:43.