IBhayibhili liqamba izizathu ezimbili ezinkulu. Okokuqala, lanxa abantu sebenze izinto ezimangalisayo, kabadalwanga besenelisa ukuqondisa izinyathelo zabo. Okwesibili, inhlelo zabantu kaziphumeleli ngoba “umhlaba wonke ungaphansi kwamandla omubi,” uSathane uDeveli. Ngakho, imizamo yabantu kayenelisanga ukuletha ukuthula emhlabeni.​—Bala uJeremiya 10:23; 1 UJohane 5:19.

Okunye okwenza ukuthi kungabi lokuthula emhlabeni yibugovu babantu lokufuna ukuphumelela. Uhulumende womhlaba wonke ongenelisa ukuletha ukuthula emhlabeni ngofundisa abantu ukuthi bathande okuhle njalo banakekelane.​—Bala u-Isaya 32:17; 48:18, 22.

UNkulunkulu uSomandla uthembisa ukuthi uzabeka uhulumende oyedwa ozabusa abantu bonke. Uhulumende lo uzabusa esikhundleni sabohulumende babantu. (UDanyeli 2:44) INdodana kaNkulunkulu uJesu, izabusa njengeNkosana yokuThula. Uzakhipha ububi obusemhlabeni wonke njalo afundise abantu izindlela zokuthula.​—Bala u-Isaya 9:6, 7; 11:4, 9.

Ziqondiswa nguJesu, izigidi zabantu emhlabeni sezisebenzisa iLizwi likaNkulunkulu iBhayibhili ukuze zifundise abantu ukuthi babe lokuthula. Sekuseduze ukuthi kube lokuthula kweqiniso emhlabeni wonke.​—Bala u-Isaya 2:3, 4; 54:13.