IBhayibhili lithi: “Nxa kubusa izixhwali abantu bayabubula.”​—IZaga 29:2.

Embalini sithola izindaba ezinengi kakhulu eziphathelane lababusi abangontando kayiphikiswa ababebusa ngesihluku, okuyikho okwabangela ukuhlupheka okunengi ebantwini ababuswayo. Liqiniso ukuthi ayisibo bonke abanjalo. Abanye bangabe befisa ukwenzela abantu babo okuhle kakhulu. Lanxa kunjalo, sebesezikhundleni bathola ukuthi imizamo yabo iphelela emoyeni ngenxa yokubangisana kwabo lokulwela izikhundla. Abanye bangabusa kubi ngenxa yokuthi bazifunela okwabo, okuyikho okwenza abantu balimale. Owayengunobhala jikelele elizweni laseMelika, uHenry Kissinger wathi: “Imbali igcwele izindaba zemizamo engazange iphumelele lezinjongo ezingazange zigcwaliswe.”

IBhayibhili liphinde likhulume ngokuthi: “Umuntu akusikho kwakhe ukuthi aqondise izinyathelo zakhe.” (UJeremiya 10:23) Abantu abalesono abalakho ukuhlakanipha okudingekayo njalo abenelisi ukuqondisa kuhle izinto eziqondane labo ngokuphumelelayo. Nxa abantu besehluleka ukuqondisa ezabo izinyathelo bangaziqondisa njani izindaba zelizwe? Uyakubona yini ukuthi kungani ababusi basemhlabeni bengalawo amandla okususa ukuhlupheka? Kuyacaca-ke ukuthi izikhathi ezinengi ukubusa okubi kwabohulumende yikho okubangela ukuhlupheka.

UJesu wathi: “Bonke abantu bazakwazi ukuthi lingabafundi bami uma lithandana.”​—UJohane 13:35.

Abafundisi bazozonke izinkolo lamansonto batshumayela ngothando lokumanyana. Kodwa iqiniso elikhona yikuthi behlulekile ukugcizelela kubalandeli babo ukuthi babelothando oluqine okokuthi lungaqeda ukubandlululana. Kulokuthi amansonto ancede abantu ukuthi babelothando, kanengi abangela ukuthi kube lokuxabana, inkethabetshabi kanye lokungezwani ebantwini lamaqembu ezizwe. Isiphetha ibhuku layo elithi, Christianity and the World Religions, ingcitshi ehlola ngezenkolo uHans Küng yathi: “Ukulwisana kwezombusazwe okulesihluku  ukwedlula konke kanye lokwesabekayo kutshotshozelwa, kukhuthazwe njalo kufakwe emthethweni yinkolo.”

Ukwengeza kulokhu, abafundisi bamansonto bavumela obala ukuya emacansini kwabantu abangatshadanga, ukuphinga kanye lobutabane. Lokhu kubangele ukuthi kube lokumemetheka kwemikhuhlane, ukukhitshwa kwezisu, ukuzithwala umuntu engazimiselanga lokudilika kwemitshado lezimuli okutshiya abantu behlulukelwe futhi besizwa ubuhlungu obukhulu.

“Lowo lalowo ulingwa yinkanuko yakhe embi, lapho edonselwa kude ehugwa. Ngakho nxa inkanuko isiyemule izala isono.”​—UJakhobe 1:14, 15.

Sonke ngenxa yokuthi sizalwa silesono siwela lula esonweni futhi siyaphambanisa. Yikho-ke kumele silwisane lesifiso ‘sokulandela izinkanuko zemvelo.’ (Kwabase-Efesu 2:3) Kodwa kunzima kakhulu ukulwisana lesifiso esibi nxa sekuvuleke ithuba lokuthi usigcwalise. Nxa singavuma ukunqotshwa yisifiso esibi, impumela yakhona ingaba buhlungu kakhulu.

Umlobi uP. D. Mehta wabhala ukuthi: “Ukuhlupheka okunengi kubangelwa yibuhaga, ukuphilela ukukholisa kanye lokuzithokozisa okudlulisa amalawulo, ubuhwaba kanye lezifiso zethu.” Izinkanuko kanye layo yonke imikhuba esingene abantu egazini ngokwesibonelo utshwala, izidakamizwa, ukubheja kanye lezemacansini sekuphambanise “izakhamizi ezihloniphekayo” ezinengi. Kanti njalo lokhu kubangela ukuhlupheka kubangane bazo, ezimulini zazo kanye lakwabanye. Nxa sikhangela izenzo zabantu abalesono, siyavumelana lalokho okutshiwo liBhayibhili ukuthi: “Siyakwazi ukuthi indalo yonke ibubula njengaye osebuhlungwini bokuhelelwa kuze kube khathesi.”​—⁠KwabaseRoma 8:⁠22.

IBhayibhili liveza ukuthi uSathane “ngunkulunkulu walesisikhathi” njalo usebenza encediswa yizidalwa zomoya ezilamandla ezimbi ezibizwa ngokuthi ngamadimoni.​—2 KwabaseKhorinte 4:4; ISambulo 12:9.

NjengoSathane, amadimoni aphathekile emsebenzini wokudukisa abantu kanye lokubahlupha. Umphostoli uPhawuli wakuvuma lokhu ngesikhathi esithi: “Kasilwi lenyama legazi, kodwa silwa lababusi, lemibuso kanye lamandla omhlaba lo ogcwele ubumnyama, silwe njalo lamabutho emimoya emibi emibusweni yasemazulwini.”​—Kwabase-Efesu 6:12.

Lanxa amadimoni ethokoza ngokuhlukuluza abantu, lokho kakusiyo njongo yawo enkulu. Akufisayo yikususa abantu kuJehova uNkulunkulu oPhezukonke. (IHubo 83:18) Imikhuba enjengokufunda ngezinkanyezi, amasalamusi, ubungoma, kanye lokubikezela ngekusasa ngeminye esetshenziswa ngamadimoni ukuze adukise abantu njalo abahluphe. Yikho uJehova esilimukisa ngezingozi ezinjalo futhi evikela bonke abaphikisana loSathane lamadimoni.​—UJakhobe 4:7.

Eminyakeni eyizinkulungwane ezimbili eyadlulayo, iBhayibhili labikezela ukuthi: “Kodwa nanzelela lokhu: Ezinsukwini zokucina kuzakuba lezikhathi ezinzima.”

Likhuluma ngokuthi kuyini okwenza kube yizikhathi ezinzima, iBhayibhili liqhubekela phambili lisithi: ‘Abantu bazakuba ngabazithandayo, labathanda imali, labazikhukhumezayo, labazigqajayo, abangelathando, labahlebayo, labangazikhuziyo, labalesihluku, labangakuthandiyo okuhle, labalamacebo amabi, labaziphakamisayo, labathanda injabulo kulokuthanda uNkulunkulu.’ Kuyacaca-ke ukuthi imbangela enkulu yokuhlupheka esikubona namuhla yikuthi siphila “ezinsukwini zokucina.”​—2 KuThimothi 3:1-4.

Emicijweni le esesixoxe ngayo, sekucaca-ke ukuthi kungani abantu besehluleka ukususa ukuhlupheka lanxa belezinhloso ezinhle zokuzama ukukususa. Kodwa-ke singaluthola ngaphi usizo? Kumele sithembele kuMdali wethu othembisa ‘ukuchitha imisebenzi kaSathane’ kanye labo bonke abalandela uSathane. (1 UJohane 3:8) Esihlokweni esilandelayo sizakhangela lokho uNkulunkulu azakwenza ukuze asuse konke okubangela ukuhlupheka.