Ukuvuswa kukaJesu kwaqinisa ukholo lwabafundi bakhe njalo kwabenza batshiseka. Omunye wabaphostoli, uPhawuli wahamba kulo lonke ilizwe lase-Asia Minor kanye leMediterranean, ehlela amabandla njalo eqinisa amaKhristu ukuthi ahlale eqinile lanxa kwakunzima ukubambelela ekuziphatheni okuhle njalo ephikiswa ngodlakela. Lanxa kwakulobunzima obunjalo, isiKhristu saphumelela njalo samemetheka.

Yena ngokwakhe uPhawuli wabotshwa. Kodwa lanxa wayebotshiwe wabhala izincwadi ezazikhuthaza njalo zileseluleko esasisiya emabandleni obuKhristu. Waxwayisa langezihlubuki ezaziyingozi kakhulu. Eqondiswa ngumoya ongcwele kaNkulunkulu, uPhawuli wakubona kungakenzakali ukuthi “izimpisi eziphangayo” zazizangena phakathi kwabo zikhulume izinto ‘ezihlanekela iqiniso ukuze zenze abantu babuyele kuzo.’​—ImiSebenzi 20:29, 30.

Ekupheleni kwekhulu lokuqala, ukuhlubuka lokhu kwasekuqalisile. Ngaleso sikhathi uJesu owayesevusiwe wanika umphostoli uJohane iSambulo, umbono owawuphathelane lekusasa. Njengoba nje uJohane wabhala, akula baphikisi kumbe abafundisi bamanga ababezakwenelisa ukuvimba injongo kaNkulunkulu yasekuqaliseni mayelana lomhlaba kanye labantu ukuthi igcwaliseke ngokupheleleyo. ‘Izizwe zonke, izizwana lezindimi kanye labantu’ bazazizwa izindaba ezinhle mayelana loMbuso kaNkulunkulu. (ISambulo 14:6) IPharadayisi lizabuyiselwa emhlabeni njalo loba ngubani ofisa ukwenza intando kaNkulunkulu angangena kulo.

Kuzwakala ‘kuyizindaba ezinhle’ yini kuwe lezi? Nxa kunjalo qhubeka ufunda okunengi mayelana lomlayezo kaNkulunkulu oya ebantwini otholakala eBhayibhilini njalo lokuthi ungakunceda njani khathesi langesikhathi esizayo.

Ungazibalela iBhayibhili ebulenjini ku-www.pr418.com. KuWebhusayithi yonale ungahlola lamabhuku alandelayo angangemagazini: Izindaba Ezinhle Ezivela kuNkulunkulu! lelithi The Bible​—⁠What Is Its Message? kanye lebhuku elithi IBhayibhili Lifundisani Sibili? Kanti njalo kulamanye amanengi akhuluma ngokuthi kungani singathemba iBhayibhili lokuthi singasisebenzisa njani iseluleko salo esilusizo emulini zethu kanye lezimpilweni zethu. Okunye ongakwenza yikubuza omunye waboFakazi bakaJehova ukuze uzwe okunengi ngalokhu.

​—Isekelwe kwezilandelayo,ImiSebenzi, Kwabase-Efesu, KwabaseFiliphi, KwabaseKholose, KuFilimoni, lo-1 Johane, leSambulo.