UNkulunkulu wathembisa indoda ethembekileyo u-Abhrahama ukuthi ‘inzalo’ eyayibikezelwe yayizakuba ngomunye wezizukulwane zayo. Abantu bazo “zonke izizwe” babezabusiswa ngenzalo le. (UGenesisi 22:18) Ngemva kwesikhathi esithile, uJakhobe umzukulu ka-Abhrahama wathuthela eGibhithe, lapho imuli yakhe eyakhula yaba yisizwe sako-Israyeli wasendulo.

Ngemva kwesikhathi eGibhithe, uFaro olesihluku wagqilaza abako-Israyeli kwaze kwafika isikhathi lapho uNkulunkulu ethuma umphrofethi uMosi, onguye owakhokhela leso sizwe wasikhupha eGibhithe saquma emanzini ahlukaniswa ngendlela eyisimangaliso eLwandle oLubomvu. Ngemva kwalokho uNkulunkulu wanika abako-Israyeli imithetho eyayigoqela leMilayo eLitshumi ukuze abaqondise njalo abavikele. Imithetho le yayicacisa mayelana leminikelo eyayizakwenza izono zithethelelwe. Ephefumulelwe nguNkulunkulu, uMosi watshela abako-Israyeli ukuthi uNkulunkulu wayezathuma omunye umphrofethi. Umphrofethi lo wayezakuba ‘yinzalo’ eyathenjiswayo.

Ngemva kweminyaka engadlula i-400, uNkulunkulu wathembisa iNkosi uDavida ukuthi ‘inzalo’ eyayisiza eyabikezelwa e-Edeni yayizakuba yiNkosi yombuso owawuzahlala kuze kube nini lanini. Yayizakuba nguMesiya, uMkhululi okhethwe nguNkulunkulu ukuze asindise abantu njalo abuyisele iPharadayisi emhlabeni.

Esebenzisa uDavida kanye labanye abaphrofethi, uNkulunkulu waqhubeka eveza okunengi kancane kancane mayelana loMesiya. Babikezela ukuthi uMesiya wayezaba ngumuntu othobekileyo njalo olomusa lokuthi nxa esebusa, indlala lokungalungi kanye lezimpi kwakuzaphela. Abantu bonke babezahlalisana ngokuthula njalo kube lokuthula ebantwini lezinyamazana. Izinto ezazingayisiyo njongo kaNkulunkulu ekuqaliseni zazizaphela, ngokwesibonelo ukugula, ukuhlupheka kanye lokufa njalo abantu abafileyo babezaphinda baphile emhlabeni.

UNkulunkulu wasebenzisa umphrofethi uMikha lapho ebikezela ukuthi uMesiya wayezazalelwa eBhethilehema njalo wasebenzisa lomphrofethi uDanyeli lapho ebikezela ukuthi uMesiya wayezabulawa ngemva kwesikhathi esithile. Kodwa uNkulunkulu wayezamvusa uMesiya kwabafileyo njalo amkhethe ukuthi abe yiNkosi ezulwini. UDanyeli waphinda waphiwa umbono mayelana lokuthi uMbuso kaMesiya wawuzathatha isikhundla sabohulumende babantu kuze kube nini lanini. Wabuya yini uMesiya njengoba kwakuphrofethiwe?

​—Isekelwe kuGenesisi izahluko 22-50, kanye lo-Eksodusi, Dutheronomi, 2 Samuyeli, lamaHubo, u-Isaya, uDanyeli, uMikha, Zekhariya 9:9.