Ngelinye ilanga eJerusalema uJesu wayekhuluma ngoYise, uJehova njalo eveza egcekeni ukuthi abakhokheli bamasonto bangaleso sikhathi babelamanga. (UJohane 8:12-30) Akukhuluma ngesikhathi leso kusitshengisa ukuthi singahlola njani lokho abanengi abakukholwayo ngoNkulunkulu lamuhla. UJesu wathi: “Uma libambelela emfundisweni yami lingabafundi bami ngempela. Ngakho lizalazi iqiniso, njalo iqiniso lizalikhulula.”​—UJohane 8:31, 32.

“Libambelela emfundisweni yami.” Lapha uJesu usitshengisa indlela yokuhlola ukuthi izimfundiso zamasonto ‘ziliqiniso’ yini. Ungezwa loba kuyini okutshiwo mayelana loNkulunkulu zibuze, ‘Lokhu kuyahambelana yini lamazwi kaJesu kanye lamazwi aseMibhalweni eNgcwele?’ Lingisela labo abezwa umphostoli uPhawuli ekhuluma ‘basebesiyahlola iMibhalo nsuku zonke ukuze babone ukuthi lokho uPhawuli ayekutsho kwakuliqiniso na?’​—ImiSebenzi 17:11.

UMarco, uRosa loRaymonde esikhulume ngabo esihlokweni sokuqala sezihloko lezi ezilandelanayo, bafunda laboFakazi bakaJehova iBhayibhili ukuze bahlole ababekukholwa. Bafundani?

UMarco: “Owayefunda lathi iBhayibhili wayesebenzisa iMibhalo ukuphendula yonke imibuzo mina lomkami esasilayo. Saba lobuhlobo obuqinileyo loJehova njalo sacina sesithandana kakhulu lomkami.”

URosa: “Ekuqaliseni ngangicabanga ukuthi iBhayibhili liphongukuba ngelinye ibhuku nje lefilosofi elizama ukuchasisa uNkulunkulu lisebenzisa imibono yabantu. Kodwa mbijana mbijana ngaqalisa ukuzithola izimpendulo zemibuzo yami eBhayibhilini. Khathesi uJehova usengokoqobo kimi. Sengisenelisa ukumthemba sibili.”

URaymonde: “Ngathandaza kuNkulunkulu ukuze angincedise ukuthi ngifunde ngaye. Kungakabi nsukungaki mina lomkami sasesifunda iBhayibhili. Ekucineni safunda iqiniso mayelana loJehova. Kwasithokozisa kakhulu ukwazi ukuthi uNkulunkulu unjani.”

IBhayibhili alivezi kuphela amanga akhulunywa ngoNkulunkulu kodwa liveza leqiniso mayelana lezimpawu zakhe zobuntu ezikhangayo. YiLizwi lakhe elaphefumulelwayo elisinceda ukuthi “siqedisise ngalokho uNkulunkulu asiphe khona ngesihle.” (1 KwabaseKhorinte 2:12) Kungaba kuhle ukuthi uzinike isikhathi sokuthi uhlole ukuthi iBhayibhili lingayiphendula njani imibuzo ejayelekileyo kodwa eqakathekileyo mayelana loNkulunkulu, izinjongo zakhe kanye lekusasa lethu. Ungacela ukuthi kuzofundwa lawe iBhayibhili usebenzisa iWebhusayithi yethu i-www.pr418.com kumbe ucele omunye waboFakazi bakaJehova azofunda lawe. Sileqiniso lokuthi ungenza njalo ukuthanda uNkulunkulu kuzabalula kuwe ngendlela okade ungayicabangeli.