1, 2. Kungenzeka abaphostoli babecabangani ngesikhathi sokuya eJerusalema?

 ‘AKUSELA ngitsho lelilodwa iyezi, sesiyibona kuhle inyanga ethwasayo. Izolo ntambama kumele ukuthi abalindi baseJerusalema babone inyanga iluzipho. ISanihedrini ikuzwa lokhu yahle yatsho ukuthi inyanga entsha uNisani isiqalisile. Imililo yokubika izehlakalo isibasiwe kumbe izithunywa sezisakaze umbiko lo zaze zazofika khonapha. Akuthandabuzwa ukuthi uJesu usefuna ukuya eJerusalema ukuze ayefika iPhasika lingakaqalisi.’

² Engxenye lokhu yikho okwakucatshangwa yilabo ababeloJesu ePhereya (ngaphetsheya kweJodani) ohambeni lwakhe lokucina esiya eJerusalema. (Mat. 19:1; 20:17, 29; Mak. 10:1, 32, 46) Ilanga lokuqala lenyanga yamaJuda uNisani lalisithi lingaqanjwa nje, iPhasika yayisiba khona ngemva kwamalanga angu-13, ilanga selitshonile ngoNisani-14.

3. Kungani amaKhristu kumele aliqathekise ilanga lePhasika?

³ Ilanga leSidlo seNkosi Santambama eliqondana lelanga lePhasika lizabe limhlaka-14 April, 2014 ilanga selitshonile. Kuzabe kulilanga eliqakatheke kakhulu kumaKhristu eqiniso lalabo abalesifiso sokukhonza. Ngenxa yani? Ngenxa yalokhu okubhalwe ku-1 Khorinte 11:23-25 ethi: “Yathi isibongile, yasihlephula yathi, ‘Lokhu kungumzimba wami, ongowenu, [“Qhubekani,” NW ] likwenza ukuba lingikhumbule.’ Ngokufananayo, emva kokudla yathatha inkomitshi.”

4. (a) Yiphi imibuzo engabuzwa mayelana leSikhumbuzo? (b) Ilanga leSikhumbuzo litholakala njani umnyaka munye ngamunye? (Khangela ibhokisi elithi  “ISikhumbuzo sika-2014.”)

⁴ Akuthandabuzwa ukuthi uzabe ukhona emkhosini lo uJesu atshiya etshele abalandeli bakhe ukuthi bawunanze minyaka yonke. Ungakahambi zibuze ukuthi: ‘Kumele ngilulungiselele njani usuku lolu? Kuzasetshenziswani emkhosini lo? Kuzakwenziwani khonangale? Umkhosi lo kanye lokuzasetshenziswa lapho kutshoni kimi?’

5. Kuyini uJesu athi kulungiswe ukuze adle iPhasika lakhe lokucina?

⁵ UJesu aze athume abaphostoli bakhe ukuthi bayelungisa indlu yokudlela iPhasika, kazange athi bayececisa ngezinto ezinengi ezimangalisayo, kodwa kukhanya wayefuna indawo efaneleyo, ehlanzekileyo njalo enela abantu bonke ababenxusiwe. (Bala uMakho 14:12-16.) Babemele balungise izinto ababezazisebenzisa esidlweni ezigoqela isinkwa esingelamvubelo kanye lewayini elibomvu. Eseqede isidlo sePhasika, uJesu waqalisa ukubatshela ngesinkwa kanye lewayini.

6. (a) Sekuphele iPhasika uJesu wathini mayelana lesinkwa? (b) Kusetshenziswa isinkwa esinjani eSikhumbuzweni?

⁶ Umphostoli uMathewu wayekhona njalo ngemva kwesikhathi wabhala wathi: “UJesu wathatha isinkwa wabonga, wasihlephula wasipha abafundi bakhe esithi, ‘Thathani lidle; lokhu kungumzimba wami.’ ” (Mat. 26:26) “Isinkwa” sasingelamvubelo njengaleso esasisetshenziswe besidla iPhasika. (Eks. 12:8; Dute. 16:3) Isinkwa lesi sasenziwe ngefulawa yengqoloyi ehlanganiswe lamanzi kuphela kungela mvubelo kumbe ezinye izinto ezinenginengi ezifanana letswayi. Sasingeke sikhukhumale ngenxa yokuthi sasingelamvubelo. Sasomile, singanambitheki futhi sihlephuka lula. Lamuhla iSikhumbuzo singakafiki, abadala bangacela ukuthi omunye ebandleni apheke isinkwa lesi ngefulawa engelamkhukhumezo lamanzi, agcobe lamafutha amancane epanini. (Nxa ifulawa yengqoloyi ingatholakali, kungasetshenziswa ifulawa yerayisi, yebhali kumbe eye-corn.) Loba i-matzoth yamaJuda engelamthombo, amaqanda kumbe ihanyanisi.

7. UJesu wakhuluma ngaluphi uhlobo lwewayini njalo yiluphi uhlobo lwewayini olungasetshenziswa eSikhumbuzweni?

⁷ UMathewu waqhubeka wathi: “[UJesu] wasethatha inkomitshi wabonga, waseyedlulisela kubo esithi, ‘Nathani kuyo lonke.’ ” (Mat. 26:27, 28) UJesu wayephethe inkomitshi elewayini elibomvu. (Kwakungayisiwo mhluzi wamagilebisi nje, ngoba ukuvunwa kwawo kwasekulesikhathi kudlulile.) Iwayini lalingekho esidlweni sakuqala eGibhithe kodwa uJesu wavuma ukuthi libe khona  emkhosini wePhasika. Waphinda wasebenzisa elinye lakhona eSidlweni seNkosi Santambama. Yikho amaKhristu esebenzisa iwayini eSikhumbuzweni. Igazi likaJesu lalingadingi ukuthi lithuthukiswe kumbe lilungisiswe ukuze libe lohlonzi, yikho kusetshenziswa iwayini elingela-brandy kumbe izinto ezinenginengi. Kumele kusetshenziswe iwayini elingafakwanga lutho, elenziwe endlini kumbe elithengwayo elinjenge-Beaujolais, i-Burgundy, kumbe i-Chianti.

8. Kungani amaKhristu efisa ukwazi ukuthi isinkwa lewayini kutshoni?

⁸ Umphostoli uPhawuli wakubeka kwacaca ukuthi lamaKhristu ayengasibo baphostoli kwakumele aqhubeke egcina iSidlo seNkosi Santambama. Wabhalela amaKhristu aseKhorinte wathi: ‘Enkosini ngamukela lokho lami engakudlulisela kini. Ukuthi: iNkosi uJesu yathatha isinkwa, kwathi isibongile yasihlephula yathi, “Lokhu kungumzimba wami, ongowenu, [“Qhubekani,” NW ] likwenza ukuba lingikhumbule.” ’ (1 Khor. 11:23, 24) AmaKhristu asawunanza umkhosi lo oqakathekileyo kuze kube lamuhla njengoba kumele enze njalo minyaka yonke, futhi ayafisa ukwazi ukuthi isinkwa lewayini kutshoni.

9. Yiwuphi umcabango ongaqondanga abanye abalawo mayelana lesinkwa esasetshenziswa nguJesu?

⁹ Abanye abantu abasontayo bathi uJesu wayesitsho umzimba wakhe uqobo lapho esithi: “Lokhu kungumzimba wami,” ngakho bakholwa ukuthi kwenzakala isimangaliso, isinkwa santshintsha saba yinyama yakhe uqobo. Kodwa lokhu akusiloqiniso. * Umzimba kaJesu woqobo wawukhona phambi kwabaphostoli bakhe abathembekileyo njalo lesinkwa esingelamvubelo ababezasidla sasikhonapho phambi kwabo. Kusegcekeni  ukuthi uJesu wayesebenzisa isifaniso njengoba wayeke wakwenza kanengi.​—Joh. 2:19-21; 4:13, 14; 10:7; 15:1.

10. Isinkwa esisetshenziswa eSidlweni seNkosi Santambama simelani?

¹⁰ Isinkwa leso abaphostoli ababesikhangele njalo sebezasidla sasimela umzimba kaJesu. Wuphi? Kulesikhathi lapho izinceku zikaNkulunkulu ezazicabanga ukuthi isinkwa sasimela “umzimba kaKhristu” okutsho ibandla labagcotshiweyo ngenxa yokuthi uJesu wahlephula isinkwa, kodwa yena akulathambo lakhe elephulwayo. (Efe. 4:12; Rom. 12:4, 5; 1 Khor. 10:16, 17; 12:27) Sekudlule isikhatshana kwananzelelwa ukuthi kwakulengqondo futhi leMibhalo itshengisa ukuthi isinkwa sasimela umzimba wasemhlabeni owawulungiselwe uJesu. UJesu “wahlupheka emzimbeni wakhe,” waze wabethelwa. Yikho-ke nxa kuyiSidlo seNkosi Santambama, isinkwa simela umzimba kaJesu woqobo ‘athwala ngawo izono zethu.’​—1 Phet. 2:21-24; 4:1; Joh. 19:33-36; Heb. 10:5-7.

11, 12. (a) UJesu wathini mayelana lewayini? (b) Iwayini elisetshenziswa esidlweni seNkosi santambama limelani?

¹¹ Konke lokhu kusenza sizwisise lokho uJesu akutsho mayelana lewayini. Sifunda ukuthi: “Ngokufanayo, emva kokudla yathatha inkomitsho, yathi, ‘inkomitsho le iyisivumelwano esitsha egazini lami.’ ” (1 Khor. 11:25) Inkomitsho eyayithwelwe nguJesu yayiyisivumelwano esitsha yini? Hatshi. Ibala elithi “inkomitsho” lalisitsho okwakuphakathi kwayo, iwayini. UJesu wathi iwayini lalimelani? Lalimela igazi lakhe elachithekayo.

¹² Evangelini likaMakho kulamazwi kaJesu athi: ‘Leli ligazi lami lesithembiso elizachithelwa abanengi.’ (Mak. 14:24) Leli kwakuligazi likaJesu ‘elalizachithelwa abanengi kube yikuthethelelwa kwezono.’ (Mat. 26:28) Yikho-ke iwayini elibomvu limela igazi likaJesu uqobo. Singathola ukukhululwa ngenhlawulo okutsho “ukuthethelelwa kwezono” ngenxa yegazi lelo.​—Bala u-Efesu 1:7.

13. Chaza ukuthi iSikhumbuzo sokufa kukaKhristu esenziwa minyaka yonke sinanzwa njani.

¹³ Nxa ufuna ukuyananza isikhumbuzo laboFakazi bakaJehova okokuqala ungakhangelelani? Umbuthano lo uzabe usendaweni ebukekayo, ehlanzekileyo lapho wonke umuntu azachelesa khona njalo akholise. Kungenzeka kube lamaluba okucecisa amalutshwana nje kodwa awusoze uthole izinto zokucecisa ezidula kakhulu kumbe angani kusedilini loba ephathini. Umdala ofaneleyo uzahluza ngendlela elesithunzi njalo ecacileyo ukuthi iBhayibhili lithini ngomkhosi lo. Uzancedisa bonke ukuthi bazwisise ukuthi uKhristu wasenzelani. Ukufa kwakhe kwaba yinhlawulo ukuze sithole ukuphila. (Bala uRoma 5:8-10.) Isikhulumi sizachaza amathemba amabili ehlukeneyo aseBhayibhilini agcinelwe amaKhristu.

14. Yiwaphi amathemba okuzaxoxwa ngawo enkulumeni yeSikhumbuzo?

¹⁴ Elinye ithemba ngelokuyabusa loKhristu ezulwini njalo litholwa ngabalandeli bakaKhristu abalutshwana okugoqela abaphostoli bakhe ababethembekile. (Luk. 12:32; 22:19, 20; Isam. 14:1) Elinye ngelamaKhristu amanengi akhonza ngokuthembeka lamuhla. Alethuba lokuphila kuze kube nini lanini emhlabeni olipharadayisi elizavuselelwa. Ngemva kwalokho intando kaNkulunkulu izakwenziwa emhlabeni njengalokhu isenziwa ezulwini, into amaKhristu abelokhu eyithandazela. (Mat. 6:10) IMibhalo isincweba indlebe mayelana lezinto ezimangalisayo ezizayo abazazikholisa kuze kube nini lanini.​—Isaya 11:6-9; 35:5,  6; 65:21-23.

15, 16. Kwenziwani ngesinkwa emkhosini weSidlo seNkosi Santambama?

¹⁵ Isikhulumi sesizaqeda inkulumo yaso, sizathinta ukuthi sesifikile isikhathi sokwenza lokho uJesu atshela abaphostoli bakhe ukuthi bakwenze. Njengoba kuke kwatshiwo  phezulu, kuzasetshenziswa isinkwa esingelamvubelo lewayini elibomvu. Izinto lezi zingafakwa etafuleni duze lesikhulumi. Isikhulumi sizakhumbuza abantu ngendaba eseBhayibhilini echaza lokho okwatshiwo nguJesu lakwenzayo ngesikhathi eqalisa umkhosi lo. Ngokwesibonelo kuMathewu sifunda ukuthi: “UJesu wathatha isinkwa wabonga, wasihlephula wasipha abafundi bakhe wathi, ‘Thathani lidle; lokhu kungumzimba wami.’ ” (Mat. 26:26) UJesu wasihlephula isinkwa esingelamvubelo ukwenzela ukuthi aqhubele abaphostoli ababemphahlile. Emhlanganweni ozabe ukhona mhlaka-14 April uzathola kulesinkwa esingelamvubelo esizabe sihletshuniwe safakwa emiganwini.

¹⁶ Imiganu izabe isenela okokuthi ngesikhatshana nje izabe isibhodiswe yafika ebantwini bonke. Akusoze kwenziwe eminye imikhuba eminenginengi. Kuzanikwa umthandazo omfitshane kungakabhodiswa imiganu ngendlela ehlelekileyo njalo abazalwane bazakwenza lokho abakubona kulula kubo. Balutshwana (engxenye akula) abazakudla isinkwa, njengoba bekunjalo emabandleni amanengi ngo-2013 isinkwa sibhodiswa.

17. ESikhumbuzweni sikulandela njani okwenziwa nguJesu ngewayini?

¹⁷ Ngemva kwalokhu sekuzaqalisa ukukhulunywa ngalokhu okwachazwa nguMathewu esithi: “[UJesu] wasethatha inkomitshi wabonga, waseyedlulisela kubo esithi, ‘Nathani kuyo lonke. Leli ligazi lami lesivumelwano elichithelwe abanengi ukuthethelelwa kwezono.’ ” (Mat. 26:27, 28) Kuzaba lomunye umthandazo ‘amankomitshi’ alewayini elibomvu abesebhodiswa, kulingiselwa okwenziwa nguJesu.

18. Lanxa kulabalutshwana kumbe bengekho abadlayo kungani kuqakathekile ukuba khona eSikhumbuzweni?

¹⁸ Abanengi abazabe bekhona bayahlonipha okwenzakalayo ngokunganathi iwayini lokungadli isinkwa ngesikhathi kubhodiswa ngoba uJesu wathi abadlayo kumele kube ngabazakuyabusa eMbusweni wakhe ezulwini kuphela. (Bala uLukha 22:28-30; 2 Tim. 4:18) Abanye bonke bazafika babukele ngenhlonipho. Lanxa kunjalo kuqakathekile ukuthi babekhona eSidlweni seNkosi Santambama ngoba kutshengisa ukuthi umhlatshelo kaJesu bawubona uligugu kakhulu. ESikhumbuzweni banganakana ngezibusiso abangazithola ngenxa yenhlawulo yomhlatshelo kaJesu. Balethemba lokuba ngabanye ‘bexuku elikhulukazi’ elizaphuma “ekuhluphekeni okukhulu.” Lezi yizikhonzi ezizabe ‘zigezise izambatho zazo egazini leWundlu zazenza zaba mhlophe.’​—ISam. 7:9, 14-17.

19. Kuyini ongakwenza ukuze ulungiselele njalo uncedakale ngeSidlo seNkosi Santambama?

¹⁹ Emhlabeni wonke oFakazi bakaJehova bayawulungiselela umbuthano lo oqakathekileyo. Kusasele amaviki athile sizabe simema abantu bonke esingabathola ukuthi babuye bazobakhona. Kanti njalo sekusele insukwana ukuthi iSikhumbuzo sifike abanengi bethu sizabala izindaba eziseBhayibhilini ezimayelana lalokhu uJesu akwenzayo ilanga leli selizafika ngo-33 C.E. Sizabe sesihlele kuhle isikhathi sethu ukwenzela ukuthi singalovi. Kuqakathekile ukuthi siphangise ukufika, ingoma lomthandazo kungakaqalisi, ukwenzela ukuthi samukele izethekeli njalo singakhuthi lokukodwa nje. Sonke esizabe sikhona okutsho amalunga ebandla kanye lezethekeli kuzasinceda ukuvula iBhayibhili nxa amavesi eqanjwa njalo echasiswa. Okuyisiqokoqela yikuthi ukuba khona kwethu eSikhumbuzweni kuzatshengisa ukuthi sibonga ngenhliziyo yonke inhlawulo kaJesu njalo siyacabangisisa ngokulalela umlayo othi: ‘[“Qhubekani,” NW ] likwenza ukuba lingikhumbule.’—1 Khor. 11:24.