1. Yiziphi izibusiso ezivela kuJehova ezingasinceda ukuthi sithokoze?

 UJEHOVA ufuna sithokoze njalo usinika izibusiso ezinengi ezisenza sithokoze. Esinye isibusiso asinika sona yikuphila. Yikho singakusebenzisa ukuthi sidumise uNkulunkulu njengoba kunguye owasidonsela ekukhonzeni kweqiniso. (Hubo. 144:15; Joh. 6:44) UJehova wenza kucace ukuthi uyasithanda njalo uyasisekela ukuze sibekezele ekumkhonzeni. (Jer. 31:3; 2 Khor. 4:16) Ulwazi olunengi ngoNkulunkulu esiluphiwayo kanye lothando lobuzalwane esilabo kusenza sinambithe ukuthi kuzabe kunjani ukuphila epharadayisi. Kanti njalo sithenjiswa ikusasa elihle kakhulu.

2. Kuyini okuhlupha ezinye izinceku zikaNkulunkulu ezithembekileyo?

2 Lanxa kulezizatho zonke lezi zokuthokoza, abanye abantu bakaNkulunkulu abathembekileyo bathwele nzima ngenxa yokuzikhangelela phansi. Bangazibona bengaqakathekanga kuJehova njalo bacabange ukuthi abakwenzayo akutsho lutho kuye. Abanye ngenxa yokuthi baqhubeka behlutshwa yimicabango enjalo bakubona kuliphupho ukuthi bazake bathokoze ‘bangaze baphile iminyaka emingaki.’ Kubo ukuphila kungakhanya kuyizinsuku zobumnyama eziza ngobunengi.​—UmTshu. 11:8.

3. Kuyini okungabangela ukuthi umKhristu azikhangelele phansi?

3 Okunye okungabangela ukuthi abafowethu labodadewethu  laba bazikhangelele phansi kungaba yizinto eziqeda amandla, ukugula kanye lalokho abehluleka ukukwenza ngenxa yokuluphala. (Hubo. 71:9; Zaga. 13:12; UmTshu. 7:7) Kanti njalo wonke umKhristu kumele avume ukuthi inhliziyo iyakhohlisa njalo ingenza sizisole lanxa siphila ngendlela ethokozisa uNkulunkulu. (Jer. 17:9; 1 Joh. 3:20) UDeveli laye ukhuluma amanga esola izinceku zikaNkulunkulu. Labanye abantu abalemicabango kaSathane bangazama ukusenza sibe lombono ofanana loka-Elifazi owayengelakholo wokucabanga ukuthi kasiqakathekanga kuNkulunkulu. Lokhu kwakungamanga ngesikhathi sikaJobe njalo lalamuhla kulokhu kungamanga.​—Jobe. 4:18, 19.

4. Sizaxoxa ngani esihlokweni lesi?

4 UJehova uyakucacisa eMibhalweni ukuthi uzaqhubeka esekela labo ‘abadabula esigodini sethunzi lokufa.’ (Hubo. 23:4) Enye indlela abasekela ngayo yikusebenzisa iLizwi lakhe. IBhayibhili ‘lilamandla kaNkulunkulu okudiliza izinqaba’ ezigoqela imibono engaqondanga kanye lemicabango eqeda amandla. (2 Khor. 10:4, 5) Ake sihloleni ukuthi singalisebenzisa njani iBhayibhili ukuze lisincede ukuthi sithole intokozo ekukhonzeni kwethu. Ukwenza njalo kungakusiza wena ngokwakho futhi ungathola lamacebo onganceda ngawo abanye.

5. Yikuphi ukuzihlola okungenza sithokoze ekukhonzeni uJehova?

5 Umphostoli uPhawuli wachaza ezinye izinto ezingenza umuntu athole intokozo ekukhonzeni uJehova. Wakhuthaza ibandla laseKhorinte wathi: “Zihloleni ukuba libone langabe lisekukholweni.” (2 Khor. 13:5) ‘Ukholo’ lolu yizo zonke izimfundiso zobuKhristu eziseBhayibhilini. Nxa izenzo zethu kanye lamazwi ethu kuhambelana lezimfundiso lezi, siyabe siphumelele emhlolisweni lo njalo satshengisa ukuthi ‘sisekukholweni.’ Kanti njalo kumele sizifake esikalini ukuze sibone ukuthi ukuphila kwethu kuhambelana lazo zonke izimfundiso zobuKhristu yini. Kumele sizilandele zonke singakhethi esizifunayo kuphela.​—Jak. 2:10, 11.

6. Kungani kumele sizihlole ‘langabe sisekukholweni’? (Khangela umfanekiso osekuqaliseni.)

6 Omunye angathikaza ukungena emhlolisweni lo ecabanga ukuthi kasoze aphumelele. Kodwa ukuthi uJehova usibona njani yikho okuqakatheke kakhulu kulalokho thina esikucabangayo njalo imicabango yakhe iphakeme kuleyethu. (Isaya. 55:8, 9) Uhlola izikhonzi zakhe ukuze abone okuhle ezikwenzayo futhi azincede, hatshi ukuthi adinge amacala. Nxa ungasebenzisa iLizwi likaNkulunkulu ukuze uzihlole ‘langabe usekukholweni,’ uzacina uzibona ngendlela uNkulunkulu akubona ngayo. Lokhu kungakunceda ukuthi ukhiphe loba yiwuphi umcabango wokuzibona ungaqakathekanga kuNkulunkulu njalo ube lesiqinisekiso esiseBhayibhilini esithi: Uligugu kuJehova. Lokhu kuzafanana lokuvula ikhetheni ukuze kukhanye endlini.

7. Basinceda ngani abantu abathembekileyo okukhulunywa ngabo eBhayibhilini?

7 Indlela ephumelelayo yokuzihlola yikucabangisisa ngesibonelo sabantu abathembekileyo okukhulunywa ngabo eBhayibhilini. Uqathanise imizwa yabo lezinto ezabehlelayo ukuthi kuhambelana njani lalokho ophakathi kwakho njalo ubone lokuthi benzani ukuze balwisane lakho. Ake sikhulume ngezibonelo ezintathu ezitshengisa ukuthi singalisebenzisa njani iBhayibhili ukuze sibone ‘langabe sisekukholweni’ besesithola intokozo ekukhonzeni uJehova.

8, 9. (a) Yibuphi ubunzima umfelokazi ongumyanga ayephakathi kwabo? (b) Kuyini okwakungabe kwakuhlupha umfelokazi lo?

8 UJesu wayekhangele umfelokazi ongumyanga owayesethempelini eJerusalema. Isibonelo somfelokazi lo singasinceda ukuthi sihlale sithokoza ekukhonzeni uJehova lanxa kulezinto esingeke senelise ukuzenza.  (Bala uLukha 21:1-4.) Cabanga ngobunzima umfelokazi lo ayephakathi kwabo. Singasabali ubuhlungu bokufelwa ngumkakhe, kwakumele abekezelele lokuba semphakathini wenkolo owawugcwele abakhokheli ‘ababehuquluza ezindlini zabafelokazi’ kulokuthi babasize njengoba babengelabani ongabanceda. (Luk. 20:47) Wayengumyanga okokuthi wanikela ethempelini ngemadlana eyayingaholiswa isisebenzi esiyabe sisebenze imizuzu emilutshwana nje.

9 Ubona angani umfelokazi lo wayesizwa njani nxa wayengena emagumeni ethempeli ethwele inhlamvana zemali ezimbili? Engxenye wayecabanga ukuthi umnikelo wakhe wawumncane kakhulu nxa ewuqathanisa lalokho ayengakukhipha ngesikhathi umkakhe esaphila. Kungabe kwakumyangisa yini ukubona ababephambi kwakhe bekhupha izizumbulu zezimali, mhlawumbe ezibuza ukuthi umnikelo wakhe wawungabe uqakathekile yini? Lanxa wayengaba lemicabango le, wenza okusemandleni akhe ukuze asekele ukukhonza kweqiniso.

10. UJesu watshengisa njani ukuthi umfelokazi wayeqakathekile kuNkulunkulu?

10 UJesu watshengisa ukuthi uJehova wayemqakathekisa umfelokazi lo kanye lomnikelo wakhe. Wathi: “Unikele okudlula bonke abanye [abanothileyo].” Umnikelo wakhe wawuzahlanganiswa leyabanye, kodwa uJesu wakhetha ukuncoma yena yedwa ebantwini bonke. Ababebona ngezezimali ethempelini babengeke bakwazi ukuthi uJehova wayeziqakathekisa kakhulu inhlamvana zemali lezi kanye lomnikazi wazo. Kodwa okwakuqakatheke kakhulu ngumbono kaNkulunkulu hatshi lokho yena ayekucabanga lokwakucatshangwa ngabanye abantu. Ungayisebenzisa njani indaba le ukuze uzihlole langabe usekukholweni?

11. Kuyini ongakufunda endabeni yomfelokazi?

11 Lokho okwenzela uJehova kuya ngokuthi impilo yakho injani. Abanye batshumayela izindaba ezinhle okwesikhathi esifitshane ngenxa yokugula kumbe ukuguga. Bangabe beqondile yini nxa bengacabanga ukuthi akulandaba lanxa bengabikanga inkonzo yabo? Lanxa usaqinile emzimbeni, ungacabanga  ukuthi kuncane kakhulu okwenzayo nxa kuqathaniswa lamahola amanengi asetshenzwa ngabantu bakaNkulunkulu umnyaka ngamunye ekukhonzeni kwabo. Kodwa indaba yomfelokazi ongumyanga isifundisa ukuthi uJehova uyananzelela njalo uyaqakathekisa loba kuyini esimenzela khona ikakhulu nxa sikwenze sisebunzimeni. Akucabange ngalokho okwenzele uJehova ngomnyaka ophelileyo. Likhona yini ihola owalinikela kuNkulunkulu ngokwenza konke okusemandleni akho lanxa kwakungavumi? Nxa wenza njalo ungaba leqiniso lokuthi uJehova uyaliqakathekisa ihola owamnika lona. Lapho usenza konke okusemandleni akho njengomfelokazi ongumyanga, ngeke uthandabuze ‘langabe usekukholweni.’

12-14. (a) Ukudana kwamhlupha njani u-Elija? (b) Kungabe kwakuyini okwamenza wadana?

12 Umphrofethi u-Elija wayethembekile kuJehova njalo elokholo oluqinileyo. Kodwa kwelinye ilanga wadana kakhulu waze wacela ukuthi uJehova ambulale esithi: “Kwanele, Jehova, susa ukuphila kwami.” (1 AmaKho. 19:4) Labo abangakaze behlelwe yilokhu bangasola umthandazo ka-Elija besithi ‘ngamazwi abhedayo’ nje. (Jobe. 6:3) Kodwa wayesizwa ubuhlungu sibili. Nanzelela ukuthi uJehova wamnceda u-Elija kulokuthi amsole ukuthi kungani efuna ukufa.

13 Kuyini okwakudanise u-Elija kangaka? Phela wayesanda kwenza isimangaliso ko-Israyeli esakhanyisa ukuthi uJehova unguNkulunkulu weqiniso njalo lokhu kwabangela ukuthi kubulawe abaphrofethi bakaBhali abangu-450. (1 AmaKho. 18:37-40) Kumele ukuthi u-Elija wayelethemba lokuthi abantu bakaNkulunkulu babezabuyela ekukhonzeni kweqiniso kodwa lokho akuzange kwenzakale. INdlovukazi embi uJezebheli yathumela umbiko ku-Elija imazisa ngokuthi yayifuna ukumbulala. Esesabela impilo yakhe, u-Elija wabalekela eningizimu waquma elizweni lakoJuda elaliseduze waqonda enkangala endaweni engelazihlahla.​—1 AmaKho. 19:2-4.

14 Eseyedwa ezidla ingqondo, u-Elija wacabanga ukuthi umsebenzi wakhe wokuba ngumphrofethi wawungatsho lutho. Watshela uJehova wathi: “Angingcono kulabokhokho.” Ayekutsho yikuthi wayezibona eyinto engelancedo efanana lothuli kanye lamathambo abokhokho bakhe abafayo. Wazihlola ngendlela yakhe njalo wazitshela ukuthi kasilutho lokuthi kaqakathekanga kuJehova lakwabanye abantu.

15. UNkulunkulu wenzani ukuze u-Elija abone ukuthi wayelokhu emqakathekisa?

15 Kodwa uSomandla wayelokhu emqakathekisa u-Elija. Yikho uJehova uNkulunkulu wathatha amanyathelo amenza wabona ukuthi ulokhu emqakathekisa. UNkulunkulu wathuma ingilosi ukuze iyeqinisa u-Elija. UJehova waphinda wamnika ukudla lamanzi ukuze enelise ukuhamba amalanga angu-40 eqonda eningizimu esiya eNtabeni iHorebi. Kanti njalo ngomusa, uNkulunkulu waqondisa umbono ka-Elija wokuthi akuselamuntu othembekileyo kuJehova ko-Israyeli. UNkulunkulu waphinda wamthuma ukuthi ayekwenza leminye imisebenzi emitsha futhi wavuma. UJehova wamncedisa kakhulu u-Elija njalo wabuyela emsebenzini wakhe wokuba ngumphrofethi eseqine okwamagama.​—1 AmaKho. 19:5-8, 15-19.

16. Yiziphi ezinye izindlela uJehova akusekela ngazo?

16 Indaba ka-Elija ingakunceda ukuthi uzihlole langabe usekukholweni njalo uthole intokozo ekukhonzeni uJehova. Okwakuqala, cabanga ngokuthi uJehova ukusekela njani. Engxenye omunye wezinceku zakhe mhlawumbe umdala kumbe omunye umKhristu ovuthiweyo wakunceda ngesikhathi usebunzimeni. (Gal. 6:2) Wake waduduzwa liBhayibhili yini, imihlangano yebandla kumbe amabhuku ethu obuKhristu? Ngesikhathi esilandelayo nxa uthola usizo olunjalo, cabangisisa ngokuthi luvela kubani sibili ubusuthandaza kuye umbonga.​—Hubo. 121:1, 2.

17. Kuyini uJehova akuqakathekisayo ezincekwini zakhe?

 17 Okwesibili, ungakhohlwa ukuthi imicabango engalunganga ingasikhohlisa. Okuqakathekileyo yikuthi uNkulunkulu usibona njani. (Bala uRoma 14:4.) UJehova uyakuqakathekisa ukuzinikela kwethu kanye lokuthembeka kuye; ukusiqakathekisa kwakhe akuyi ngokuthi senza okungakanani. Engxenye lawe njengo-Elija kunengi osukwenzele uJehova lanxa ungakunanzeleli. Mhlawumbe bakhona abanye ebandleni osubancedile ukuthi benze kuhle lanxa wena ungakwazi kanye labanye abasensimini yenu abezwa iqiniso ngenxa yokuzimisela kwakho.

18. Imisebenzi oyiphiwa nguJehova itshengisani?

18 Okokucina, konke okuphiwa nguJehova ukuthi ukwenze kubone njengobufakazi bokuthi ulawe. (Jer. 20:11) Njengo-Elija ungabe ukhathazekile ngenxa yokuthi inkonzo yakho ikhanya ingelampumela emihle kumbe ngenxa yalokho ofisa ukukwenza enkonzweni okukhanya kungaphumeleli. Kodwa ulokhu ulesibusiso esikhulu kulazo zonke esingenelisa ukusithola sonke, isibusiso sokutshumayela izindaba ezinhle kanye lokubizwa ngebizo likaNkulunkulu. Hlala uthembekile. Ungenza njalo, amazwi athi: “Woza uzojabula kanye lenkosi yakho” akomunye wemizekeliso kaJesu azasebenza lakuwe.​—UMathewu 25:23.

19. Yibuphi ubunzima umlobi weHubo 102 ayephakathi kwabo?

19 Umlobi weHubo-102 wayesephelelwe lithemba. ‘Wayekhathazekile’ esizwa ubuhlungu emzimbeni, inhliziyo yakhe ibuhlungu njalo wayengaselamandla okuxazulula izinhlupho zakhe. (Hubo. 102, isihloko sendaba) Amazwi akhe atshengisa ukuthi wayephakathi kobuhlungu obukhulu, wayelesizungu futhi wayekhathazwa yimizwa yakhe. (Hubo. 102:3, 4, 6, 11) Wayebona angani uJehova ufuna ukumlahlela khatshana.​—Hubo. 102:10.

20. Umthandazo ungamnceda njani umuntu olwisana lemicabango yokukhathazeka?

20 Lanxa kunjalo, umhubi wasebenzisa ukuphila kwakhe ukuze adumise uJehova. (Bala iHubo 102:19-21.) Njengoba kukhanya kuHubo-102, lalabo abasekukholweni balakho ukuba sebuhlungwini njalo behluleke ukwenza loba yini. UmHubi wazibona ‘esenjengenyoni ehlezi yodwa ephahleni’ njalo umngane wakhe kwakuzinhlupho zakhe kuphela. (Hubo. 102:7) Nxa kuyikuthi lawe usuzizwa njalo, thandaza kuJehova njengomhubi. Imithandazo yabakhathazekileyo, okutsho imithandazo yakho, ingakunceda ukuthi ulwisane lemicabango yokukhathazeka. UJehova uthembisa ukuthi “uzaphendula imithandazo yabahluphekayo; kazukweyisa isicelo sabo.” (Hubo. 102:17) Sikholwe isithembiso lesi.

21. Umuntu ohlutshwa yimicabango yokukhathazeka angayithola njani intokozo enkulu ekukhonzeni uJehova?

21 IHubo-102 litshengisa lokuthi ungayithola njani intokozo enkulu ekukhonzeni uJehova. Umhubi watshiyana lezinhlupho zakhe wasecabanga ngobuhlobo bakhe loJehova. (Hubo. 102:12, 27) Okwamduduzayo yikwazi ukuthi uJehova kabatshiyi abantu bakhe, uyabasekela lanxa besebunzimeni. Yikho-ke thandaza nxa ukukhathazeka sokukwenza ukuthi ungafezi obungafisa ukukwenza ekukhonzeni uNkulunkulu. Mcele ukuthi awuzwe umthandazo wakho ukuze ulwisane lobuhlungu obuzwayo njalo ukuze ‘lebizo likaJehova limenyezelwe.’​—Hubo. 102:20, 21.

22. Ungamthokozisa njani uJehova?

22 Sekucacile sibili ukuthi singalisebenzisa iBhayibhili ukuze sihlole langabe sisekukholweni lokuthi siqakathekile yini kuJehova. Kuliqiniso sibili ukuthi esikhathini lesi esiphila kuso asingeke sikuqede konke ukudana kanye lemicabango yokukhathazeka. Yikho sonke singamthokozisa uJehova njalo sithole ukusindiswa ngokuqinisela, siqhubeke sithembekile ekumkhonzeni.​—Mat. 24:13.