1. Kuyini okuqakatheke kakhulu ekukhonzeni kwethu?

 UNGATHINI nxa ungabona ibizo likaJehova libhalwe esakhiweni esithile somphakathi kumbe kokuthile okufakwe e-museum, indawo yokubukisa izinto? Akuthandabuzwa ukuthi ungamangala kakhulu. Phela sibizwa kuthiwa singoFakazi bakaJehova. Lokhu kutshengisa ukuthi ibizo likaNkulunkulu liqakatheke kakhulu ekukhonzeni kwethu. Emhlabeni wonke, yithi sodwa esilisebenzisa kakhulu ibizo lakhe. Kodwa akumelanga senze izinto ezizakwenza ukuthi lichothozwe, ngoba kuyisibusiso ukubizwa ngalo.

2. Kuyini okumele sikwenze ukuze siqhubeke sibizwa ngebizo likaNkulunkulu?

² Kodwa kayisikho ukuthi okwenza uJehova asamukele yikusebenzisa ibizo lakhe kuphela. Kumele sisebenzise izimiso zakhe zokuziphatha kukho konke esikwenzayo. Yikho iBhayibhili lisikhumbuza ukuthi abantu bakaJehova kumele ‘batshiye ububi.’ (Hubo. 34:14) Umphostoli uPhawuli wasicacisa isimiso lesi lapho ebhala esithi: “Bonke abalivumayo ibizo likaJehova kumele badele ububi.” (Bala u-2 Thimothi 2:19.) Abanengi bayakwazi ukuthi oFakazi bakaJehova bayalivuma ibizo lakhe. Kodwa-ke singabudela njani ububi?

3, 4. Yiwuphi umbhalo osulesikhathi uphica izifundiswa zeBhayibhili, njalo kungani?

³ Asikhangeleni ukuthi kwakuvele kutheni uPhawuli aze akhulume amazwi aku-2 Thimothi 2:19. Ivesi le ikhuluma ‘ngesisekelo sikaNkulunkulu esiqinileyo’ esibhalwe imitsho emibili. Owokuqala uthi: “UJehova uyabazi labo abangabakhe.” Kukhanya umutsho lo wathathwa ku-AmaNani 16:5. (Khangela isihloko esidlulileyo.) Owesibili uthi: “Bonke abalivumayo ibizo likaJehova kumele badele ububi.” Sekulesikhathi umutsho lo uphica izifundiswa zeBhayibhili. Ngani?

⁴ Kukhanya angani umutsho lo wesibili wathathwa kwelinye ivesi. Kodwa okumangalisayo yikuthi eMibhalweni yesiHebheru akulavesi elihambelana lawo. Yikho-ke umphostoli uPhawuli wayesitshoni lapho esithi: “Bonke abalivumayo ibizo likaJehova kumele badele ububi”? Engakakutsho lokhu, uPhawuli waqala wakhuluma amazwi aku-AmaNani isahluko 16, lapho okukhulunywa khona ngendaba yokuhlamuka kukaKhora. Umbuzo osusibakhona yikuthi: Umutsho lo wesibili ungabe uphathelane lokwenzakala ngesikhathi oKhora behlamuka yini?

5-7. Ku-2 Thimothi 2:19, uPhawuli wayekhuluma ngayiphi indaba? (Khangela umfanekiso osekuqaliseni.)

⁵ IBhayibhili lithi amadodana ka-Eliyabi, uDathani lo-Abhiramu, abambana loKhora ukuze bahlamukele uMosi lo-Aroni. (AmaN. 16:1-5) Babemdelela sibili uMosi njalo babeseyisa isikhundla ayesiphiwe nguNkulunkulu. Abahlamuki laba baqhubeka bephakathi kwabantu bakaJehova, yikho kwakulengozi yokuthi bangaxegisa ukholo lwabathembekileyo. Kodwa lafika ilanga lokuthi uJehova acacise umahluko phakathi kwezikhonzi zakhe eziqotho kanye labahlamuki. Engakakwenzi lokhu, watshela abantu umlayo ocacileyo.

⁶ IBhayibhili lithi: “UJehova wathi kuMosi, ‘Tshela ibandla uthi, “Sukani lixekele amathente aboKhora, loDathani lo-Abhiramu.”’ UMosi wasukuma waya kuDathani lo-Abhiramu, kwathi labadala bako-Israyeli bamlandela. Waqonqosela ibandla wathi, ‘Buyelani emuva lisuke emathenteni abantu laba abangalunganga! Lingathinti lutho olungolwabo ngoba lingenze njalo lizakhuculwa ngenxa yezono zabo.’ Ngalokho basuka emathenteni aboKhora, loDathani lo-Abhiramu.” (AmaN. 16:23-27) Ngemva kwalokho uJehova wababulala bonke abahlamuki. Kodwa izikhonzi ezithembekileyo ezadela ububi ngokusuka ebantwini abangalunganga azibulawanga.

⁷ UJehova uhlola izinhliziyo. Uyakubona ukuthembeka kwalabo abangabakhe. Lanxa kunjalo abathembekileyo kwakumele bangathikazi, bahle baphangise basuke eduze kwabantu abangalunganga. Yikho-ke kumele ukuthi uPhawuli wayekhuluma ngendaba eku-AmaNani 16:5, 23-27 lapho ebhala ukuthi: “Bonke abalivumayo ibizo likaJehova kumele badele ububi.” Kulengqondo sibili ukuthi siphethe ngokuthi uPhawuli wayekhuluma ngendaba kaKhora ngoba wathi: “UJehova uyabazi labo abangabakhe.”​—2 Tim. 2:19.

8. Kwanele yini ukusebenzisa ibizo likaJehova kumbe ukuba sebandleni lobuKhristu? Chaza.

⁸ Lapho ekhuluma ngendaba yabahlamuki besikhathi sikaMosi, uPhawuli wayekhumbuza uThimothi ukuthi kwakumele angathikazi ukuxwaya izinto ezingaphambanisa ubuhlobo bakhe loJehova. Ukuba sebandleni lobuKhristu kayisikho kodwa okwakufuneka ngoba langesikhathi sikaMosi kunengi okwakumele kwenziwe ngaphandle kokuvuma ibizo likaJehova. AmaKhristu athembekileyo kumele  angathikazi ukudela ububi. Iseluleko sikaPhawuli esaphefumulelwayo sasizamnceda ngani uThimothi? Kanti njalo singabafundisani abantu bakaJehova lamuhla?

9. “Ukuphikisana kobuthutha lobuwula” kwakuliphambanisa njani ibandla lamaKhristu okuqala?

⁹ ILizwi likaNkulunkulu lilezixwayiso ezicacileyo mayelana lobubi okumele amaKhristu abudele kumbe abulahle. Ngokwesibonelo, uPhawuli engakakhulumi amazwi aku-2 Thimothi 2:19, waxwayisa uThimothi “ngokuxabana ngamazwi” lokuthi ‘axwaye izinkulumo zokweyisa.’ (Bala u-2 Thimothi 2:14, 16, 23.) Amanye amalunga ebandla ayesengenisa izimfundiso zabahlamuki ebandleni. Kanti njalo kukhanya angani abanye basebekhuluma izinto ezidala izingxabano. Lanxa kungayisikho ukuthi ababekukhuluma kwakuphikisana lemibhalo, kwakudala ukwahlukana. Kwakusenza ukuthi abantu baxabane ngamazwi futhi kungabi lokuthula ebandleni. Yikho uPhawuli wagcizelela ukuthi kumele ‘baxwaye ukuphikisana kobuthutha lobuwula.’

10. Kumele senzeni nxa sesihlangane lezimfundiso zabahlamuki?

¹⁰ Lamuhla kukalutshwana ukuthi kube labahlamuki ebandleni. Kodwa nxa kuyikuthi sesihlangane lezimfundiso ezingekho emibhalweni kumele singathikazi ukuzilahla, kungelani lokuthi zivela ngaphi. Kungaba yibuthutha ukutshona siphikisana labahlamuki, mhlawumbe ngokukhuluma labo ku-Internet loba ngezinye izindlela nje. Lanxa sizitshela ukuthi sifuna ukubanceda, ukukhuluma labo nje kuyabe sekusitsho ukuthi asisawulaleli umlayo wokuthi sidele ububi. Abantu bakaJehova bayazilahla sibili izimfundiso zabahlamuki.

11. Kuyini okungenza ukuthi kube ‘lokuphikisana kobuthutha,’ njalo abadala abangamaKhristu bangaba njani yizibonelo ezinhle endabeni le?

¹¹ Izimfundiso zabahlamuki kayisizo zodwa ezingabangela ukuthi kube lokuxabana ebandleni. Ngokwesibonelo kungaba ‘lokuphikisana kobuthutha lobuwula’ nxa abantu belemibono etshiyeneyo ngezokuzilibazisa. Kodwa nxa kuyikuthi othile sekhuthaza abanye ukuthi bazilibazise ngezinto ezingahambelani lezimiso zikaJehova zokuziphatha, abadala abangamaKhristu akumelanga bayekele ukumkhuza besesaba ukuthi kungaba lokuxabana. (Hubo. 11:5; Efe. 5:3-5) Nxa bemkhuza, kumele banamathele eMibhalweni hatshi kulokhu abakucabangayo. Kumele balandele isixwayiso esinikwa ababonisi abangamaKhristu esithi: ‘Yibani ngabelusi bomhlambi kaNkulunkulu eliwugcinayo, hatshi ukubusa ababekwe ezandleni zenu, kodwa liyisibonelo emhlambini.’—1 Phet. 5:2, 3; bala u-2 KwabaseKhorinte 1:24.

12, 13. (a) OFakazi bakaJehova bazikhetha njani izinto zokuzilibazisa, njalo yiziphi izimiso zeBhayibhili abangazisebenzisa? (b) Izimiso okukhulunywe ngazo kundima-12 zingasetshenziswa njani kwezinye izindaba?

¹² Ezindabeni zokuzilibazisa, inhlanganiso yethu ayisikhetheli ukuthi yiwaphi amafilimu okumele siwabukele, amabhuku okumele siwabale, izingoma esizilalelayo kanye lemidlalo yamavidiyo. Ngani? IBhayibhili likhuthaza sonke ukuthi sizifundise “ukwehlukanisa okuhle lokubi.” (Heb. 5:14) UmKhristu kumele asebenzise izimiso eziseMibhalweni ukuze akhethe kuhle ezokuzilibazisa. Kukho konke esikwenzayo, kumele sizimisele ukuhlala ‘sidinga okuthokozisa iNkosi.’ (Efe. 5:10) IBhayibhili lifundisa ukuthi izinhloko zezimuli zilomsebenzi wokuqondisa okwenzakala ngekhaya. Yikho kumele zibone ukuthi izimuli zazo zizilibazisa ngezinto ezihlanzekileyo yini. *​—1 Khor. 11:3; Efe. 6:1-4.

 ¹³ Izimiso zeBhayibhili esikhulume ngazo ziyasebenza lakwezinye izinto. Abantu ebandleni bangaxabana ngezinto umuntu alelungelo lokuzikhethela zona, ngokwesibonelo ukuthi umuntu ugqoka njani, welatshwa njani lokuthi udlani. ­Yikho-ke nxa okuthile kungaphikisani lezimiso eziseMibhalweni, abantu bakaJehova kumele bangaxabani ngakho, ngoba “inceku yeNkosi kumele ixwaye ingxabano; kodwa kumele ibe lomusa ebantwini bonke.”​—2 Tim. 2:24.

14. UPhawuli wasebenzisa wuphi umzekeliso ukuze atshengise ukuthi kuqakathekile ukuxwaya abangane ababi?

¹⁴ Sesibonile ukuthi “abalivumayo ibizo likaJehova kumele badele ububi.” Okunye okumele bakwenze yikuxwaya abangane ababi. UPhawuli kazange akhulume ngomzekeliso ‘wesisekelo sikaNkulunkulu esiqinileyo’ kuphela. Waphinda wabhala omunye othi: “Endlini enkulukazi akulazitsha zegolide lezesiliva nje kuphela, kodwa lezezigodo kanye lezebumba; ezinye ngezemisebenzi encomekayo ezinye engayisilutho.” (2 Tim. 2:20, 21) Eqeda lapho waxwayisa amaKhristu esithi kumele ‘azihlambulule,’ kumbe azehlukanise lezitsha zemisebenzi “engayisilutho.”

15, 16. Umzekeliso ‘wendlu enkulukazi’ usifundisani?

¹⁵ Umzekeliso lo utshoni? UPhawuli uthi ibandla lobuKhristu lifanana ‘lendlu enkulukazi,’ njalo uthi abantu abasebandleni bafanana ‘lezitsha’ kumbe izinto ezisetshenziswa emkulwini. Ezinye izinto ezisetshenziswa ukupheka zingaba lamagciwane ayingozi kumbe zibe lengcekeza. Umnikazi wazo ngeke ahlanganise ezihlanzekileyo lezingcolileyo.

¹⁶ Kuyacaca-ke ukuthi nxa amaKhristu efuna ukuhlala ehlanzekile, akumelanga abe lobungane labantu abasebandleni abangazilandeliyo izimiso zikaJehova. (Bala u-1 Khorinte 15:33.) Nxa kuyikuthi kumele sixwaye abantu ababi  abangabe besebandleni, kutshukuthi kuqakatheke kakhulu ukuthi ‘singahlanganyeli’ labantu abangekho ebandleni ngoba abanengi bakhona ‘ngabathanda imali, ngabangalaleli abazali babo, ngabangcolileyo, ngabahlebayo, ngabalesihluku, ngabangakuthandiyo okuhle, ngabalamacebo amabi, ngabathanda injabulo kulokuthanda uNkulunkulu.’​—2 Tim. 3:1-5.

17. Ama-Israyeli athembekileyo atshengisa njani ukuthi ayabudela ububi?

¹⁷ IBhayibhili likubeka kucace ukuthi ama-Israyeli kazange atshone ethikaza lapho etshelwa ukuthi ‘asuke axekele amathente aboKhora, loDathani lo-Abhiramu.’ Lithi ‘basuka [“masinyane,” NW].’ (AmaN. 16:24, 27) Kabazange badonde. Kanti njalo imibhalo itshengisa ukuthi lokhu bakwenza buthumuthumu ngoba ithi ‘basuka [“emaceleni onke,” NW].’ Abantu abathembekileyo babekwazi okumele bakwenze njalo bakwenza. Kuyacaca ukuthi babelalela ngenhliziyo yonke. Batshengisa ukuthi bakhetha uJehova hatshi ububi. Lokhu kusifundisani?

18. UPhawuli wayesitshoni lapho etshela uThimothi ukuthi ‘abalekele izinkanuko ezimbi zobutsha’?

¹⁸ Kumele singathikazi ukulahla loba yini engaphambanisa ubuhlobo bethu loJehova. Yikho okwakutshiwo nguPhawuli lapho elimukisa uThimothi esithi: “Balekela izinkanuko ezimbi zobutsha.” (2 Tim. 2:22) Ngesikhathi etshelwa lokhu, uThimothi wayengabe eseleminyaka engu-30 kumbe phezudlwana. Loba kunjalo “izinkanuko ezimbi zobutsha” azilani lokuthi umuntu unganani. Nxa uThimothi wayesesizwa izifiso lezi sezimfikela, kwakumele ‘azibalekele.’ Ngamanye amazwi ‘kwakumele adele ububi.’ UJesu laye wakhuluma ngalokhu lapho esithi: “Aluba ilihlo lakho likwenzisa isono, likopole ulilahle.” (Mat. 18:9) Lamuhla amaKhristu ayasisebenzisa iseluleko lesi. Kawathikazi njalo kawadondi ukulahla loba kuyini okungaphambanisa ubuhlobo bawo loJehova.

19. Abanye baluvikele njani ukholo lwabo?

¹⁹ Abanye babebubhudla utshwala bengakabi ngoFakazi kodwa sebakhetha ukuthi bangasabuthinti. Kanti njalo abanye bakhetha ukuthi bahle batshiyane lezinto zokuzilibazisa ezingabavusela izifiso ezimbi lanxa kuyikuthi akulalutho olubi ngazo. (Hubo. 101:3) Ngokwesibonelo omunye umzalwane engakabi nguFakazi wayethanda ukuyagida emaphathini alabantu abangaziphathanga. Kodwa wathi esefunde iqiniso wayengasagidi lanxa kusemibuthanweni yaboFakazi ngoba wayesesaba ukuthi kungamvusela izifiso ezimbi, kumenze akhumbule kudala kwakhe. Kodwa lokhu akutsho ukuthi kubi ukuthi umKhristu anathe utshwala loba agide kumbe enze okunye okungekho kubi. Loba kunjalo sonke kufanele singathikazi, siphangise ukwenza konke esingakwenza ukuze sizivikele ezintweni ezingaxegisa ukholo lwethu.

20. Lanxa kungalula ‘ukudela ububi,’ kuyini okuzakwenza ukuthi siqhubeke sisenza okulungileyo?

²⁰ Kuyisibusiso esikhulu sibili ukubizwa ngebizo likaJehova, kodwa kuyasetshenzelwa. ‘Kumele sidele ububi’ njalo ‘sitshiye ububi senze okulungileyo.’ (Hubo. 34:14) Akuthandabuzwa ukuthi akulula ukwenza lokhu. Kodwa kuyasikhuthaza kakhulu ukuthi uJehova uzaqhubeka ebathanda “abangabakhe” abaqhubeka besenza izinto ezilungileyo.​—2 Tim. 2:19; bala u-2 ImiLando 16:9a.