Ake sithi ubaba ukhuluma lendodana yakhe eleminyaka eyisikhombisa. Uthi, “Kudaladala, uNkulunkulu wadala umhlaba lakho konke okukuwo, wadala lelanga, lenyanga kanye lezinkanyezi.” Indodana yakhe icabanga ngalokho okwesikhatshana ibisibuza ukuthi, “Baba, manje ngubani owadala uNkulunkulu?”

Ubaba uphendula athi, “Akulamuntu owadala uNkulunkulu. Wayevele ekhona.” Umntwana uyasuthiseka ngempendulo le. Kodwa njengoba ekhula, umbuzo lo uyabe ulokhu umhlupha. Kuye kunzima ukuthi akuzwisise ukuthi kulomuntu ongelasiqalo. Phela zonke izinto zilesiqalo. Uyazibuza ukuthi, ‘Kanti vele uNkulunkulu wavela ngaphi?’

IBhayibhili lona lithini? Lisitshela okuhambelana lalokho okukhulunywe ngubaba esikhulume ngaye. UMosi wabhala wathi: ‘Jehova izintaba zingakabikhona lalapho ungakawuvezi umhlaba kanye lelizwe, kusukela phakade kuze kube phakade unguNkulunkulu.’ (IHubo 90:1, 2) Umphrofethi u-Isaya laye wathi: ‘Kalazi yini? Kalizwanga na? UJehova unguNkulunkulu waphakade, uMdali wemikhawulo yomhlaba. (U-Isaya 40:28) Kanti njalo incwadi kaJuda ichaza ukuthi uNkulunkulu wayekhona “mandulo kwezikhathi zonke.”​—UJuda 25.

Imibhalo le isitshela okuhambelana lokwatshiwo ngumphostoli uPhawuli lapho esithi uNkulunkulu ‘yiNkosi yaphakade.’ (1 KuThimothi 1:17) Lokhu kutsho ukuthi wayevele ekhona, asingeke senelise ukucabanga ukuthi wabakhona nini. Kanti njalo uzahlala ekhona. (ISambulo 1:8) Yikho-ke ukubakhona kukaSomandla kusukela phakade kuze kube phakade luphawu lobuntu bakhe oluqakatheke kakhulu.

Kungani kunzima ukuthi sikuzwisise lokhu? Ngoba siphila okwesikhathi esifitshane. Yikho-ke indlela uJehova abona ngayo isikhathi yehlukene kakhulu lendlela esisibona ngayo. KuNkulunkulu, iminyaka eyinkulungwane injengosuku olulodwa ngoba yena ukhona kuze kube phakade. (2 UPhetro 3:8) Ngokwesibonelo, intente ephila amalanga angaba ngu-50 kuphela nxa ingakhula, ayingeke izwisise nxa kukhulunywa ngeminyaka engu-70 kumbe engu-80 ephilwa ngabantu. IBhayibhili lisitshela ukuthi sinjengentethe nxa siqathaniswa loMdali wethu oMkhulu. Kanti njalo indlela esicabanga ngayo imfitshane kakhulu kuleyakhe. (U-Isaya 40:22; 55:8, 9) Siyabona-ke ukuthi thina abantu asenelisi ukuzwisisa konke okuphathelane loJehova.

Kulengqondo ukuthi sithi uNkulunkulu ubevele ekhona, lanxa kungaba nzima ukukuzwisisa. Nxa kuyikuthi kulomuntu owadala uNkulunkulu, kutsho ukuthi umuntu lo nguye oyabe enguMdali phela. Kodwa iBhayibhili lisitshela ukuthi uJehova “wadala izinto zonke.” (ISambulo 4:11) Kanti njalo siyakwazi ukuthi kwaqala kungelalutho oludaliweyo. (UGenesisi 1:1, 2) Pho zonke izinto esizibonayo zavela ngaphi? Kwakumele kuqale kube loMdali. Wayekhona kungakabi lezingilosi kanye leNdodana yakhe ezelwe yodwa. (UJobe 38:4, 7; KwabaseKholose 1:​15) Kuyazicacela-ke ukuthi yena wayevele ekhona abanye bonke bengakabi khona. Akwenzi ukuthi sithi wadalwa ngoba nguye yedwa owayekhona.

Emhlabeni kulabantu kanye lezinye izinto ezadalwayo. Konke lokhu kutshengisa ukuthi uNkulunkulu waphakade ukhona sibili. Kumele ukuthi wayevele ekhona uMdali wezinto zonke, owafaka imithetho enza ukuthi izinto lezi ziqhubeke zikhona. Yikho-ke wayengeke enelise ukuphefumulela izinto ayezidalile ukuthi ziphile aluba wayengekho.​—UJobe 33:4.