KULEZINSUKU impilo ilokhu iqhubeka isiba nzima kakhulu. (2 Tim. 3:1-5) Sihlala silingwa ngoba siyamthanda uNkulunkulu njalo sizimisele ukulalela imithetho yakhe elungileyo. UJesu wakubona ukuthi kuzafika izikhathi ezinzima, wasetshela abalandeli bakhe ukuthi babezathola okuthile okwakuzabanceda ukuthi bame baqine kuze kube sekupheleni. (Mat. 24:3, 13; 28:20) Yikho-ke wabeka inceku ethembekileyo ukuze ibanike ‘ukudla ngesikhathi esifaneleyo,’ okutsho ulwazi ngoNkulunkulu.​—Mat. 24:45, 46.

Kusukela inceku ethembekileyo ibekwa ngo-1919, “izisebenzi zalapha ekhaya” eziyizigidi ezikhuluma izindimi ezitshiyeneyo bezilokhu zilethwa enhlanganisweni kaNkulunkulu, lapho eziphiwa khona ulwazi oluseBhayibhilini. (Mat. 24:14; Isam. 22:17) Lanxa kunjalo abanye abakhuluma ezinye izindimi kabatholi konke esikuphiwayo njalo kulabanye abangelazinto zalezinsuku ezingabanceda ukuthi bathole amabhuku ethu, amavidiyo kanye lokunye okuphuma ku-jw.org. Pho sesingathi kabakutholi yini ukudla okweneleyo ukuze ukholo lwabo luhlale luqinile? Ake sikhangele imibuzo emine ezasinceda ukuthi sithole impendulo yombuzo lo.

Lapho uSathane elinga uJesu ukuthi antshintshe amatshe abe yisinkwa, uJesu wathi: “Umuntu kaphili ngesinkwa kuphela, kodwa ngelizwi lonke eliphuma emlonyeni kaNkulunkulu.” (Mat. 4:3, 4) Amazwi kaJehova abhalwe eBhayibhilini. (2 Phet. 1:20, 21) Yikho-ke yilo elisetshenziswa kakhulu nxa kulungiswa ukudla lokhu.​—2 Tim. 3:16, 17.

Inhlanganiso kaJehova seyadinda i-New World Translation of the Holy Scriptures ngezindimi ezedlula 120 iphelele loba iyingxenye, njalo ilokhu idindwa ngezinye izindimi umnyaka ngomnyaka. Kanti njalo kulamanye amaBhayibhili amanengi kakhulu akhona ngezindimi ezitshiyeneyo. Lokhu kuhambelana lentando kaNkulunkulu yokuthi “abantu bonke basindiswe njalo balazi iqiniso.” (1 Tim. 2:3, 4) “Kukho konke okudaliweyo akulalutho olufihlakeleyo emehlweni kaNkulunkulu.” ­Yikho-ke asithandabuzi ukuthi uzabasondeza kuye “abampofu emoyeni” ukuze babuye enhlanganisweni yakhe, abesebanika ulwazi oluseBhayibhilini.​—Heb. 4:13; Mat. 5:3, 6; Joh. 6:44; 10:14.

Nxa umuntu efuna ukuba lokholo oluqinileyo kumele azwisise lokho akubala eBhayibhilini abesekusebenzisa ekuphileni kwakhe. (Jak. 1:22-25) Ekhulwini lokuqala, umthenwa ongumTopiya wakunanzelela lokhu. Wayebala iLizwi likaNkulunkulu lapho uFiliphu umvangeli embuza ukuthi: “Uyakuzwisisa yini lokho okubalayo?” Waphendula wathi: “Ngingakuzwisisa kanjani kungekho muntu ongichazelayo na?” (ImiSeb. 8:26-31) UFiliphu ekuzwa lokhu wahle wamncedisa ukuthi athole ulwazi oluqondileyo oluseLizwini likaNkulunkulu. Umthenwa lo wakuzwisisa sibili ayekufunda, wahle wabhaphathizwa. (ImiSeb. 8:32-38) Yikho-ke amabhuku ethu ayasinceda ukuthi sithole ulwazi lweqiniso oluqondileyo ngoba ayasichasisela lokho okuseBhayibhilini. Akhuluma khona kanye okwenzakala ezimpilweni zethu njalo asenza sibe lesifiso sokusebenzisa lokho esikufundayo.​—Kol. 1:9, 10.

Izinceku zikaJehova zithola ulwazi lweBhayibhili olunengi kakhulu emabhukwini la ukuze zidle njalo zinathe. (Isaya. 65:13) INqabayokulinda etholakala ngezindimi ezedlula 210 ichasisa iziphrofetho eziseBhayibhilini, isinceda lokuthi sizwisise iqiniso leBhayibhili okunzima ukulizwisisa futhi isinceda ukuthi sisebenzise izimiso zalo. I-Awake! edindwa ngezindimi ezingaba yi-100 layo iyasinceda ukuthi sikwazi okunengi kakhulu okuphathelane lezinto ezidalwe nguJehova futhi isitshengisa lokuthi singasisebenzisa njani iseluleko seBhayibhili empilweni. (Zaga. 3:21-23; Rom. 1:20) Kanti njalo inceku ethembekileyo isinika izinto ezitshiyeneyo ngezindimi ezedlula 680 ezisinceda ukuthi silizwisise iBhayibhili. Wena uyazinika yini isikhathi sokulifunda nsuku zonke? Uyawabala yini wonke amamagazini aphuma nyanga zonke kanye lamabhuku amatsha esiwathola minyaka yonke abhalwe ngolimi lwakho?

Inhlanganiso kaJehova isinika lezinkulumo ezisekelwe eBhayibhilini esizilalela emihlanganweni emikhulu lemincane. Uyazikholisa yini izinto ezenziwa emihlanganweni le ezigoqela izinkulumo, iziboniso, izingxoxo kanye lemidlalo? UJehova usenzela idili elikhulu elisinceda ukuthi sithaphe ulwazi oluphathelane laye.​—Isaya. 25:6.

Hatshi. Akumelanga kusimangalise ukuthi kwezinye izikhathi ezinye izinceku zikaJehova zingathola okunengi ukudlula abanye. Ngani? Akucabange abaphostoli. Batshelwa okunengi okungazange kutshelwe abanye abafundi ngekhulu lokuqala. (Mak. 4:10; 9:35-37) Lanxa kunjalo akusikho ukuthi abafundi laba babencitshwa okuthile. Baluthola ulwazi olweneleyo olwabenza bahlala belokholo oluqinileyo.​—Efe. 4:20-24; 1 Phet. 1:8.

Okunye okumele sikunanzelele yikuthi okunengi okwenziwa nguJesu kanye lalokho akukhulumayo esasemhlabeni akubhalwanga emaVangelini. Umphostoli uJohane wathi: “UJesu wenza ezinye izinto ezinengi njalo. Aluba zonke nganye zazingabhalwa phansi, ngibona ingathi lomhlaba wonke wawuzaswela indawo yezincwadi ezazingabhalwa.” (Joh. 21:25) Lanxa abalandeli bakaJesu bekhulu lokuqala babelolwazi olunengi ngaye, akutsho ukuthi thina sancitshwa ulwazi oluqakathekileyo. UJehova usinika ulwazi olweneleyo oluphathelene leNdodana yakhe ukuze senelise ukulandela amanyathelo ayo.​—1 Phet. 2:21.

Kanti njalo ngekhulu lokuqala abaphostoli babethumela izincwadi emabandleni. Kodwa kulenye incwadi eyabhalwa nguPhawuli engekho eBhayibhilini. (Kol. 4:16) Kambe sesingathi kulutshwana esikutholayo yini ngenxa yokuthi asilayo incwadi le? Hatshi. UJehova uyakwazi ukuthi kuyini okufanele sikuthole njalo usinika okweneleyo ukuze ukholo lwethu luhlale luqinile.​—Mat. 6:8.

Lamuhla ezinye izinceku zikaJehova zithola amabhuku lokunye okunengi okusekelwe eBhayibhilini kodwa ezinye azikutholi konke. Malutshwana yini amabhuku akhona ngolimi lwakho? Nxa kunjalo, ungacabangi ukuthi uJehova kalandaba lawe. Funda lokho olakho njalo nxa kusenza hamba emihlanganweni lapho okukhulunywa khona ulimi oluzwisisayo. Kanti njalo hlala ukwazi lokuthi uJehova uzakuncedisa ukuze ukholo lwakho luhlale luqinile.​—Hubo. 1:2; Heb. 10:24, 25.

Zinengi kakhulu izinto ezitholakala kuWebhusayithi yethu, ngokwesibonelo amamagazini lamabhuku asekelwe eBhayibhilini. Okunye futhi okukhona kunceda abatshadileyo, abasakhulayo kanye labantwana. Izimuli ziyancedakala ngoba zithola ezingakusebenzisa eKukhonzeni Kwemuli. Kanti njalo iWebhusayithi yethu isitshela ngemibuthano eqakathekileyo ngokwesibonelo ilanga lokuphiwa kwabafundi baseGileyadi izicoco kanye lomhlangano owenziwa minyaka yonke. Iphinde isitshele ngabantu bakaJehova abehlelwa zingozi ezitshiyeneyo kanye lokuthi abezomthetho babaphatha njani. (1 Phet. 5:8, 9) IWebhusayithi le iyanceda sibili emsebenzini wokutshumayela ngoba lasezindaweni lapho okungavunyelwa khona ukwenza umsebenzi lo kumbe lapho okulemithethothetho eyenza kube nzima ukuwenza, abantu bayazithola izindaba ezinhle.

Ukholo lwakho lungahlala luqinile lanxa ungazitholi izinto eziphuma kuWebhusayithi yethu. Inceku ethembekileyo iqhubeka isebenza gadalala ukuze zonke izisebenzi zalapha ekhaya zithole imfundo yeBhayibhili eneleyo. Yikho-ke akufanelanga ulale ungasalalanga udinga okuthile okuzakwenza ukuthi ungene ku-jw.org. Abanye bangazikhethela ukuthi banike abangenelisi ukungena ku-Internet izinto abayabe bezithethe kuWebhusayithi yethu kodwa ayisikho ukuthi ngumthetho ukuthi amabandla akwenze lokhu.

Siyambonga kakhulu uJesu ngokuthi usigcinile isithembiso sakhe sokuthi uzasinakekela ukuze siqhubeke silokholo oluqinileyo. Kasithandabuzi ukuthi uJehova uzaqhubeka esinika ‘ukudla ngesikhathi esifaneleyo’ kuze kufike ekupheleni kwezinsuku lezi zokucina ezinzima.