UDavida wayedlalisa isikhathi yini lapho encenga uNkulunkulu ukuthi amkhumbule? UNkulunkulu ulendaba lawe yini? Kungani kunzima ukuthi abantu abanengi bakholwe ukuthi uNkulunkulu usomandla ulendaba labo?

Esinye isizathu yikuthi thina sibancane kakhulu kuloNkulunkulu. Mkhulu okumangalisayo okokuthi zonke izizwe “zinjengethonsi emgqonyeni; zibalwa njengothuli ezilinganisweni.” (U-Isaya 40:15) Omunye umlobi ochothoza ezenkolo wathi “yikuzibona ingani ungcono kulabanye sibili ukukholwa ukuthi kuloNkulunkulu olendaba lawe lokuthi uphila njani.”

Kanti njalo abanye bacabanga ukuthi uNkulunkulu kalandaba labo ngenxa yokuziphatha kwabo. Ngokwesibonelo enye indoda okuthiwa ngu-Jim yathi: “Ngangihlala ngithandazela ukuthi ngibe lokuthula njalo ngenelise ukuzibamba kodwa kwakungangithathi sikhathi ukuthi ngiphinde ngivuke ngolaka. Ngacina sengizitshela ukuthi ngangimubi kakhulu lokuthi vele uNkulunkulu wayengeke angincede.”

UNkulunkulu ukhatshana lathi yini okokuthi kaboni okwenzakala ezimpilweni zethu? Ulendaba yini labantu bakhe abalesono? UNkulunkulu nguye kuphela ongaziphendulela imibuzo le. ILizwi lakhe elaphefumulelwayo, iBhayibhili, lisitshela ukuthi kakho khatshana njalo uyasikhathalela sonke. Lithi: ‘Uvele kakhatshana komunye lomunye wethu.’ (ImiSebenzi 17:27) Ezihlokweni ezine ezilandelayo sizabona lokho uNkulunkulu asitshela khona mayelana lokuthi ulendaba lomuntu munye ngamunye kanye lokuthi lokhu wakutshengisa njani kwabanye abantu abanjengawe.