KUNGANI ABANYE BETHANDABUZA? Abantu abanengi bacabanga ukuthi nxa uNkulunkulu esikhangele uzibonela izoni nje, usibona singabantu abangcolileyo lokuthi kalandaba lathi ngoba kasiqakathekanga kuye. Omunye owesifazana ­okuthiwa ­nguKendra wayelohlupho lokuhlala ehlulukelwe. Wayezibona eyisoni ngoba wayengenelisi ukwenza konke uNkulunkulu akufunayo. Lokhu kwamthwalisa nzima ngoba uthi, “Ngacina ngingasathandazi.”

ILIZWI LIKANKULUNKULU LISIFUNDISANI? UJehova kakhangeli izinto oziphambanisayo kuphela njalo uyazwisisa lokuthi wena ungumuntu onjani sibili. IBhayibhili lithi: “Uyakwazi ukuthi sibunjwa njani, uyakhumbula ukuthi siluthuli.” Okuhle kakhulu yikuthi kasiphathi “ngokufanele izono zethu,” kodwa uyasixolela nxa siphenduka ngoba ulesihawu.​—IHubo 103:10, 14.

Ake sikhulume ngoDavida inkosi yako-Israyeli esiyiqambe esihlokweni sokuqala. Wathandaza kuNkulunkulu wathi: ‘Amehlo akho awubona umzimba wami ungakabi lesimo. [“Izitho zomzimba wami zazibhaliwe encwadini yakho,” NW ]. Ngihlola, O Nkulunkulu, uyazi inhliziyo yami.’ (IHubo 139:16, 23) Akuthandabuzwa ukuthi uDavida wayekwazi mhlophe ukuthi lanxa wayengenza isono esikhulu, uJehova wayezamxolela nxa wayesephendukile ngenhliziyo yakhe yonke.

Akulamuntu ongakuzwisisa njengoJehova. IBhayibhili lithi: “Abantu bakhangela isimo somuntu, kodwa uJehova ukhangela inhliziyo.” (1 USamuyeli 16:7) UNkulunkulu uyazwisisa ukuthi ezinye izinto ozenzayo zibangelwa kuyini. Uyakwazi ukuthi okukwenza ube yilokhu oyikho khona yikuthi ungabe ufuze abangakini kumbe wenziwa, yindlela owakhuliswa ngayo, lapho okhulele khona kanye lobuntu bakho nje. Uyakubona lokuthi uyazama ukuba lobuntu obuhle lanxa kwezinye izikhathi uyake uphambanise.

Sesibonile ukuthi uNkulunkulu uyazwisisa ukuthi ungumuntu onjani sibili. Yikho-ke usebenzisa njani ukuzwisisa kwakhe ukuze akududuze?