Izigidi zabantu emhlabeni zikholwa ukuthi uMbuso kaNkulunkulu yiwo ongenza ikusasa labantu libengcono. Zilandela isibonelo sikaJesu owafundisa abalandeli bakhe ukuthi bathandaze bathi: “Umbuso wakho kawuze, intando yakho yenziwe emhlabeni.”—UMathewu 6:10.

Okumangalisayo yikuthi lanxa abantu bewufuna ngabomvu uMbuso kaNkulunkulu, izinkolo ezinengi zikhanya zingawuqakathekisi. Enye indoda ebona ngezembali okuthiwa nguH. G. Wells yathi ikhuluma ngalokhu yaveza ukuthi uJesu wayekuqakathekisa kakhulu ukufundisa ngalokho ayekubiza ngokuthi nguMbuso weZulu. Waphinda wathi kodwa isimanga yikuthi kukhulunywa ngawo gqo ezimfundisweni zamansonto esiKhristu amanengi.

OFakazi bakaJehova abafanani lezinkolo ezinengi. Bayawuqakathekisa kakhulu uMbuso kaNkulunkulu. Ngokwesibonelo imagazini le oyithweleyo idindwa ngezindimi ezingu-220. Nyanga zonke kudindwa amamagazini angaba yi-46 miliyoni okokuthi akula enye imagazini etholakala njengayo emhlabeni. Yiwuphi umlayezo oyisiqokoqela omunyethwe yimagazini le? Impendulo siyithola ebizweni layo. Khangela ukuthi lithini: INqabayokulinda Ebika ngoMbuso kaJehova.  *

Kungani oFakazi bakaJehova besenza yonke imizamo le ukuze babikele abantu ngoMbuso kaNkulunkulu? Esinye isizatho yikuthi sikholwa ukuthi uMbuso kaNkulunkulu yiwo umlayezo oyisiqokoqela oseBhayibhilini, ibhuku eliqakatheke kulawo wonke emhlabeni. Kanti njalo asithandabuzi ukuthi uMbuso kaNkulunkulu yiwo kuphela ozasusa zonke izinhlupho zabantu.

OFakazi bakaJehova balandela isibonelo sikaJesu ngokuqakathekisa umsebenzi wokufakaza ngoMbuso kaNkulunkulu. Phela uJesu esasemhlabeni wayeqakathekisa uMbuso kaNkulunkulu kanye lenkonzo ukwedlula zonke izinto. (ULukha 4:43, The Holy Bible in Ndebele) Kungani uJesu wayewuqakathekisa kangaka uMbuso lo? Ungakunceda ngani wena? Khangela izihloko ezilandelayo ukuze ubone ukuthi iBhayibhili liyiphendula njani imibuzo le.