OBELILUNGA leQula Elibusayo laboFakazi bakaJehova, uGuy Hollis Pierce, uqede inkonzo yakhe yasemhlabeni ngoLwesibili mhlaka-18 March 2014. Ubeseleminyaka engu-79 ngesikhathi ithemba lakhe lokuba ngomunye wabafowabo bakaKhristu abavusiweyo ligcwaliseka.​—Heb. 2:10-12; 1 Phet. 3:18.

UGuy Pierce uzelwe mhlaka-6 November ngo-1934 e-Auburn eseCalifornia elizweni lase-U.S.A njalo wabhaphathizwa ngo-1955. Watshada lesithandwa sakhe uPenny ngo-1977 njalo bebelabantwana. Ukukhulisa abantwana kwamnceda ukuthi aphathe wonke umuntu angani ngumntanakhe. Ngo-1982 yena lomkakhe basebesebenza gadalala emsebenzini wokuphayona njalo kwathi ngo-1986 uMfowethu uPierce waqalisa umsebenzi owathatha iminyaka engu-11 wokuba ngumbonisi wesiqinti e-United States.

Ngo-1997 uGuy Pierce lomkakhe uPenny baqalisa ukusebenza eBhetheli e-United States. UMfowethu uPierce wasebenza kuHlangothi lweNkonzo njalo ngo-1998 wakhethwa ukuthi abe ngumsizi kuKhomithi Ebona Ngezisebenzi yeQula Elibusayo. Mhlaka-2 October ngo-1999, emhlanganweni owenziwa minyaka yonke yiWatch Tower Bible and Tract Society of Pennsylvania kwamenyezelwa ukuthi uMfowethu uPierce sekhethwe ukuthi abe lilunga leQula eLibusayo. Eminyakeni esanda kwedlula usebenze kumaKhomithi alandelayo: kuKhomithi Yokuloba, eYokudinda kanye lakuKhomithi Yabahleli.

Abantu bemihlobo etshiyeneyo labavela ezindaweni ezitshiyeneyo babemthanda uMfowethu uPierce ngenxa yokuthi wayebobotheka njalo ehlala ezihlekela nje. Kodwa okwakusenza ukuthi abantu bamthande kakhulukazi yikuthi wayelothando, wayethobekile, wayehlonipha imithetho kanye lezimiso zikaNkulunkulu njalo wayelokholo oluqine okwamagama. Kuye, inkomo yayingamzala umuntu nxa izithembiso zikaNkulunkulu zingagcwalisekanga njalo iqiniso leli wayefuna ukulitshela bonke abantu emhlabeni.

UMfowethu uPierce wayesebenza gadalala emsebenzini kaJehova. Wayevuka kusesele njalo wayejayele ukusebenza kuze kube sebusuku. Wawubhoda umhlaba wonke ukuze ayokhuthaza abafowethu labodadewethu abangamaKhristu njalo wayengasisweli isikhathi sokuba ndawonye lamalunga eBhetheli ayefuna ukukwejisa laye, ukunikwa amacebo kanye lokuncediswa. Langemva kweminyaka eminengi, abafowethu balokhu besakhumbula ukuthi wayengumuntu wabantu, elobungane njalo wayekhuthaza abanye ngeMibhalo.

UMfowethu lo ebesimthanda kakhulu utshiye umkakhe, abantwabakhe abayisithupha, abazukulu kanye lezizukulwana. Kanti njalo abanengi abafundisa iqiniso kanye labanye abafowethu labodadewethu babembona njengoyise. Inkulumo yomngcwabo woMfowethu uPierce yenziwa nguMfowethu uMark Sanderson olilunga leQula eLibusayo njalo yenzelwa eBhetheli yaseBrooklyn ngoMgqibelo mhlaka-22 March ngo-2014. Enkulumeni yakhe wakhuluma langethemba likaMfowethu uPierce lokuyaphila ezulwini njalo wabala lamazwi kaJesu athi: ‘Emzini kaBaba kulezindlu ezinengi. Ngiyakhona ukuyalilungisela indawo. Njalo nxa sengiyile ukulilungisela indawo ngizabuya ngizolithatha ukuthi libe lami, ukuze lani libe khona lapho engikhona. Liyayazi indlela eya lapho engiya khona.’​—Joh. 14:2-4.

Lanxa sizamkhumbula kakhulu uMfowethu uPierce, siyathokoza ngokuthi ‘wayeyazi indlela’ eqonda ‘endlini’ asesiyahlala kuyo nini lanini.