Kulabantu ababizwa ngokuthi ngamaSaami abatholakala eFinland, eNorway leSweden. Abantu laba balamasiko abo, indimi zabo lendlela etshiyeneyo yokwenza izinto. Eminyakeni esanda kwedlula oFakazi bakaJehova benze izinto ezimbili ezibancede ukuthi batshumayeze amaSaami.

Okokuqala, ngo-2015 baqalisa ukudinda amabhuku lokurekhoda amavidiyo ngolimi olukhulunywa ngamaSaami. * Okwesibili, benza umkhankaso ngo-2016 lango-2017 endaweni ethiwa yiLapland. Umkhankaso lo wawungokuhambisa amabhuku lokutshengisa abantu bendawo le amavidiyo ngolimi lwabo.

Emkhankasweni oqakathekileyo owawungoMay 2017 kwancedisa oFakazi bakaJehova abedlula 200 ababevela eFinland, eNorway leSweden. Batshumayela ezindaweni ezitshiyeneyo eziseLapland. Abanye babo bafundela isiSaami futhi lokhu kwabathokozisa abanikazi bolimi lolu. UDenis owancedisa eKarigasniemi uthi: “Abantu bendawo le babona ukuthi siyabathanda futhi basibonga ngokuthi sasizama ukukhuluma ulimi lwabo.”

Abantu bendawo le bakukholisa kakhulu ukuzwa ngomhlaba olipharadayisi ngoba bayakuthanda ukubona indalo. (IHubo 37:11) Ngokwesibonelo omunye umama wafunda ibhukwana elithi Izindaba Ezinhle Ezivela kuNkulunkulu! futhi wabona lokho uNkulunkulu azakwenzela abantu. Yikho wakhulumela phezulu ezibuza ukuthi kungani umfundisi wesonto yakhe wayengakaze amfundise ngomhlaba olipharadayisi.

AmaSaami amanengi abonga ngokuvakatshelwa lokhu. Ngokwesibonelo eyinye indoda eyayisebenza esitolo yancoma odadewethu ababili yathi babesenza “umsebenzi omuhle onceda umphakathi.” Yathi bathathe loba yini ababeyifuna esitolo, yona yayizabhadala.

Ngesikhathi somkhankaso amaSaami abona amavidiyo angaba ngu-180 futhi kwahanjiswa amabhuku edlula 500. Izikhathi ezinengi babecela loba yiwaphi amabhuku abhalwe ngolimi lwabo. Kanti njalo oFakazi bakaJehova baqalisa ukufunda iBhayibhili labantu abangu-14.

Amanye amaSaami ancoma umsebenzi omuhle wokuhumutsha owenziwayo. UNilla Tapiola ongumbalisi njalo olilunga lePhalamende yamaSaami wathi: “Amabhuku enu ahunyutshwe ngobunono obukhulu, kulula ukuwabala futhi abawahumutshayo balandela imithetho yolimi.” Eyinye indoda engumSaami ehlala enyakatho yeFinland yathi: “Amabhuku la ahunyutshwe zingcitshi.”

OFakazi ababetshumayela endaweni esemngceleni weFinland leNorway ebizwa ngokuthi yiKarigasniemi baqalisa ukufunda iBhayibhili lombalisi ofundisa isiSaami. Bathi beqeda ukufunda isahluko sokuqala sebhuku elithi Izindaba Ezinhle Ezivela KuNkulunkulu! umbalisi lo wathanda indlela elalihunyutshwe ngayo. Yikho wacela imvumo yokulisebenzisa nxa efundisa isiSaami.

Sikhuluma nje sekurekhodwe amavidiyo amanengi njalo kwahunyutshwa amaphetshana kanye lebhukwana ngesiSaami. Kusukela ngoFebruary 29 ngo-2016 isiSaami saqalisa ukutholakala ku-jw.org. Inyanga ngayinye abantu abakhuluma ulimi lolu bangena ka-400 kuwebhusayithi yethu futhi badawuniloda izinto ezitshiyeneyo ezingaba yi-350.

Umkhankaso lo wawanceda kakhulu amaSaami kanye laboFakazi abazinikela ukuwenza. UHenrick loHilja-Maria abancedisa e-Utsjoki bathi: “Abantu esasibatshumayeza bakubona ukuthi ukubala iBhayibhili kuyabanceda ngezindlela ezitshiyeneyo.” ULauri lo-Inga labo bathi: “Umkhankaso lo wasenza sabona sibili ukuthi uNkulunkulu kakhethi. Kuyasithokozisa ukuthi uNkulunkulu usisebenzisile ukuthi atshengise uthando lwakhe ebantwini laba abahlala khatshana.”