Mhlaka 6 May ngo-2017 oFakazi bakaJehova abaphose babe ngu-130 bancedisa ukubutha izibi eguswini elibizwa kuthiwa yi-Bryukhovychi Forest eliseduze kweLviv e-Ukraine. OFakazi laba basebenza ewofisini yegatsha njalo babuya ngobunengi kusukela kwabaleminyaka engu-22 kusiya kwabalengu-80. Indawo abayiklinayo yayingama-ekha angu-120 futhi izibi abazibuthayo zazingamakhilogramu angu-600. Umsebenzi lo bawenza ngamahora amathathu nje kuphela.

Omunye umanjinela okhokhela iqembu le-Lviv Forest Breeding and Drilling Center okuthiwa nguMykhailo Splavinskyi wathi: “OFakazi bakaJehova baba ngabokuqala ukusekela umsebenzi lo futhi kusukela ngomnyaka ka-2014 abakaze bayekele ukuwenza.”

UMykhailo Splavinskyi uthi: “Zimbili izinto ezenza igusu leli lingcole. Okokuqala yikuthi abantu balahlela khonapha izibi. Okwesibili yikuthi amankampani ayakhayo lawo alahlela khonapha ingcekeza yawo enengi.”

Ingcekeza elahlelwa lapha iyingozi kakhulu. USplavinskyi uthi: “Kuthatha isikhathi ukuthi ingcekeza ibole. Lokhu kubangela ukuthi amanzi asendaweni le angcole futhi kuphambanise izimila lezinanakazana.” Amaglasi alahlelwa lapha lawo ayingozi ngoba nxa engahlatshwa yimisebe yelanga abangela umlilo. Nxa engaqamuka aba yingozi ikakhulu ebantwaneni abancane. Okunye okuyingozi okulahlelwa lapha ngamajekiseni asebenzileyo. USplavinskyi uqhubeka esithi: “Indlela esingabalekela ngayo izingozi lezi yikubutha yonke ingcekeza.”

Ukuklina indawo engama-ekha angu-8 100 ngumsebenzi onzima. Uphetha ngokuthi: “Silabantu abahlanu kuphela abanakekela indawo le kodwa ngeke benelise ukubutha yonke ingcekeza ekhona. Yikho minyaka yonke sicela uzulu wonke ukuthi asincedise ukwenza njalo.”

OFakazi bakaJehova babesebenzisa amahara, amaplastiki okufakela izibi futhi babegqoke amaglavu ngesikhathi besebenza. Babutha izimbodlela, amathaya ezimota, amaglasi, insimbi, amaphepha, amaplastiki lamajekiseni asebenzileyo. U-Ihor Fedak omunye walaba abanakekela igusu leli uthi: “Indawo eyaklinwa ngoFakazi bakaJehova yasala ihlanzeke okwamagama.”

OFakazi babengabutheleli zonke izibi ndawonye, babeqoqa amaglasi wodwa, amaphepha wodwa lamaplastiki wodwa lanxa kwakungelamthetho owawusithi benze njalo. Lokhu babekwenzela ukuthi amanye amankampani akulungise ukuze kuphinde kusetshenziswe. Kusukela ngo-2016 oFakazi yibo ababebhadalela ukuthi izibi ababezibutha zithwalwe ziyelahlwa. UFedak uphetha esithi: “Ngiyababonga kakhulu oFakazi baJehova ngokusincedisa. Benza umsebenzi ube lula sibili.”

OFakazi bayakuthanda ukuthi kanye ngomnyaka bancedise ekubutheni izibi endaweni le. Bazimisele ukuncedisa ukuze abantu bangahlaselwa yimikhuhlane kanye lokuthi indawo le ihlale ingeladoti. Omunye umzalwane okuthiwa nguVolker uthi: “Ukwenza umsebenzi lo akungehlisi isithunzi. Ukwenza umsebenzi onceda abanye kwenza ngithokoze njalo ngisuthiseke.”

U-Anzhelika yena uthi: “Kimi akuqakathekanga ukuthi ngubani olahle izibi kodwa okuqakathekileyo yikuthi ziyelahlwa.” ULois oleminyaka engu-78 laye wancedisa emsebenzini lo. Uthi: “Akumelanga uzonde nxa ungathi uhamba ubone ingcekeza kodwa okumele ukwenze yikuyidobha.”

UWieslaw uthi: “Abantu bajayele ukusibona sigqoke kuhle sisekutshumayeleni. Okunye okumele babekwazi yikuthi sizimisele ukusebenza ukuze sincede abanye.”