Kusukela mhlaka 2 kusiya ku-24 July 2016 kwaba lomncintiswano wamabhayisikili wesi-103 eFrance. Abantu babedanile ngoba nyakenye amalwecatsha ayebulele abantu abedlula 100. Ikanti ngoJuly 14 2016 ilwalicatsha labulala abantu abangu-86 futhi lalimaza abanengi ngeroli edolobheni leNice.

OFakazi bakaJehova bakubona kufanele ukuthi banike abantu beFrance ithemba kanye lenduduzo. Yikho bafaka izinqola zamabhuku ezindaweni ezitshiyeneyo lapho abantu abancintisanayo ababezadlula khona. Kwavolontiya oFakazi abangu-1 400 futhi bahambisa amabhuku angu-2 000 ebantwini ababedinga izimpendulo zemibuzo eqakathekileyo.

Abantu ababelandela labo abancintisanayo bamangala ukubona oFakazi ezindaweni ezitshiyeneyo. Abahleli bomncintiswano lo babuka indlela inhlanganiso ehleleke ngayo. Bathi: “Besilibona yonke indawo ngesikhathi somncintiswano.” Abantu abanengi babesithi: “Lalapha oFakazi bakaJehova bakhona.” Ngesikhathi somncintiswano omunye ubaba otshayela amabhasi wala ukuthatha iphetshana ngoba esethole amane.

Abantu abanengi kwabathabisa ukubona oFakazi ezindaweni ezitshiyeneyo ngesikhathi somncintiswano. Yikho okwenza bathatha amabhuku futhi abanengi babeqalisa ukwenza njalo. Omunye osebenza kwezemidlalo wathatha ibhuku elithi Kukhona Okungenza Imuli Yenu Ithokoze. Ngemva kokubala ibhuku leli, watshela abanye asebenza labo ngenqola yamabhuku futhi labo bahamba bayathatha alezihloko abazithandayo.

Izivakatshi ezinengi zalanda oFakazi bakaJehova futhi zabatshela izinhlupho zazo. Omunye umama wathi wayengaselathemba futhi wayefuna ukuzibulala ngokuzitshayisa ngesitimela. Kodwa esezwe ngomhlaba omutsha ngaphansi koMbuso kaNkulunkulu wakhetha ukungazibulali. Omunye umama wathi kuboFakazi: “Lingawuyekeli umsebenzi wenu omuhle.”

Omunye ubaba ogogekileyo futhi ongazithembiyo izihambi wavuma ukuncedwa ngomunye umama ambona egqoke kuhle ngoba wayesezwe ukuthi unguFakazi kaJehova. Wathi: “Ngiyayibonga indlela ogqoke ngayo kanye lokubobotheka kwakho. Kungenza ngikuthembe.”