Minyaka yonke oFakazi bakaJehova benza amavidiyo amanengi ngolimi lwesiNgisi ukuze abukelwe emihlanganweni yezabelo. Kodwa kwezinye izindawo imihlangano le ingenwa ngezinye izindimi. Yikho ukuze labobantu bawazwisise amavidiyo la, ayarekhodwa ngezindimi zabo. Kuyabanceda yini ukwenza njalo?

Ake sizwe okutshiwo ngabanye abangayisibo Fakazi abangena imihlangano le eMexico laseCentral America:

• “Yangithinta sibili ifilimu engayibonayo futhi kwakungani lami sengiphakathi kwayo. Okwakutshiwo kwathophela enhliziyweni yami.”​—Owangena umhlangano wesabelo ngolimi lwesiPopoluca, esabelweni seVeracruz, eMexico.

• “Kwakungani ngizixoxela labangane bami edolobheni lakithi. Ividiyo leyo yayingcono kakhulu kulamafilimu engijayele ukuwabona ngoba ngangizwisisa konke okutshiwoyo.”​—Owangena umhlangano wesabelo ngolimi lwesiNahuatl eNuevo León, eMexico.

• “Kwakungani abalingiswa abakulawomavidiyo bakhuluma lami uqobo ngoba babekhuluma ngolimi lwami lomdabu.”​—Owangena umhlangano wesabelo ngolimi lwesiChol, eTabasco, eMexico.

• “Kuyakhanya ukuthi inhlanganiso le ilesifiso esikhulu sokunceda abantu ukuthi bafunde ngolimi lwabo. Ayikho eyinye inhlanganiso ekwenzayo lokhu!”​—Owangena umhlangano wesabelo ngolimi lwesiCakchiquel eSololá, eGuatemala.

Kodwa oFakazi bakaJehova bawenza njani umsebenzi wokurekhoda bona bengelandawo eziphucuke kakhulu zokurekhodela futhi bengaqhatshi abantu abakwazi ukusebenzisa imitshina yokurekhoda labazingcitshi zokuba ngabalingiswa?

Ngo-2016 iwofisi yegatsha yaboFakazi bakaJehova yeSpain yahlela umsebenzi wokurekhoda amavidiyo omhlangano wesabelo ngesiSpanish langezinye izindimi ezingu-38 ezikhulunywa kulelo. OFakazi abangu-2 500 bancedisa emsebenzini lo. Abarekhodayo kanye lamaqembu okuhumutsha baberekhodela ewofisini yegatsha, emawofisini okuhumutsha lakwezinye izindawo. Kwarekhodelwa ezindaweni ezedlula 20 eziseBelize, eGuatemala, eHonduras, eMexico lasePanama futhi kwezinye izindawo kwakusetshenziswa amastudiyo athwalekayo.

Kwakungumsebenzi onzima ukulungisa amastudiyo la. Kwasetshenziswa izinto ezitshiyeneyo ukuvimbela umsindo ukuthi ungangeni phakathi ezigoqela ingubo lamamatrasi.

Abalingiswa abanengi abasetshenziswayo babehamba umango omude besiya lapho okurekhodelwa khona ngoba babengelayo imali yokuhambisa. Ngokwesibonelo abanye babehamba umango othatha amahora angu-14. Omunye ubaba lomntanakhe bona bahamba okwamahora angu-8.

UNaomi owakhula encedisa imuli yangakibo ukuthi benze amastudiyo la uthi: “Sasiyilindela ngabomvu iviki yokurekhoda. Ubaba wayesebenza nzima ehlela izinto besekusithi umama yena ephekela abantu abangu-30 ababencedisa.” Khathesi uNaomi usencedisa ewofisini yokuhumutsha eMexico. Uthi: “Kuyangithokozisa okwamagama ukusebenzisa isikhathi sami ngincedisa abantu ukuthi bazwe umlayezo weBhayibhili ngolimi lwabo. Akulamsebenzi ongenza ngithokoze njengalo.”

Wonke umuntu wamukelekile emihlanganweni yezabelo eyenziwa ngoFakazi bakaJehova minyaka yonke. Ukuze uthole okunengi hamba lapho okubhalwe ukuthi IMIHLANGANO YEZABELO.