Izinto eziligugu ezinjengendlu lemota kumele zihlale zinakekelwa ukuze zibe sesimeni esihle. Kunjalo langobungane bakho loNkulunkulu, kumele uhlale ubuqinisa. Manje ungenzani ukuze uqhubeke uqinisa ubungane bakho loJehova nxa usubhabhathiziwe?

Okusesihlokweni lesi

•  Qhubeka ufunda iLizwi likaNkulunkulu

•  Qhubeka uthandaza kuJehova

•  Qhubeka utshela abanye lokho okukholwayo

•  Qhubeka ungena imihlangano yebandla

 Umbhalo: ‘Qhubekani lithela izithelo kuyo yonke imisebenzi emihle njalo likhula elwazini oluqondileyo ngoNkulunkulu.’—KwabaseKholose 1:10.

 Okutshiwo yivesi le: Nxa ungabhabhathizwa kumele uqhubeke ulifunda iBhayibhili futhi ucabangisisa ngalokho okufundayo.—IHubo 25:4; 119:97.

 Okungenzakala: Kwezinye izikhathi ungezwa kungatsho ukuthi ubale iBhayibhili kumbe uzitshele ukuthi okokubala ayisikho kwakho.

 Ongakwenza: Gebha ujule ezindabeni eziseBhayibhilini ozithanda kakhulu. Woba lohlelo lokufunda uwedwa olungasoze lukuthwalise nzima. Khumbula ukuthi inhloso yakho yokubala ngeyokuthi uqhubeke umthanda uJehova leLizwi lakhe. Ukufunda ngalindlela kuzakunceda futhi uzakukholisa.—IHubo 16:11.

 Ongakuzama: Ukuze uthole okunengi nxa ufunda, zama ukudinga indawo ethuleyo futhi engelazinto ezizakuphambanisa.

 Okunye okungakunceda

•   Bala Okulandelayo:

   “Indlela IBhayibhili Elingakunceda Ngayo—Ingxenye 2: Kukhwabithe Ukulibala”

   “Kuyini Okunganginceda Ngenelise Ukufaka Ingqondo Yami Kulokho Engikwenzayo?”

•   Bukela Ividiyo Le:

   Zwana Ukuthi Abentanga Yakho Bathini—Ukubala IBhayibhili

•   Dawuniloda:

   “Uhlelo Lokubala IBhayibhili”

 Umbhalo: “Lingakhathazeki ngaloba yini kodwa bikelani uNkulunkulu zonke izicelo zenu ngomthandazo langokumncenga kanye lokumbonga.”—KwabaseFiliphi 4:6.

 Okutshiwo yivesi le: Uyabe ukhuluma loJehova nxa uthandaza ikanti wena uyabe umlalele nxa ubala iBhayibhili. Imithandazo yakho ingahlanganisa izicelo zalokho okudingayo kanye lokumbonga ngezinto akwenzele zona.

 Okungenzakala: Ngezinye izikhathi ungezwa angani imithandazo yakho ayiselahlonzi, usuphonguphindaphinda into efanayo. Ungacina usuthandabuza lokuthi uJehova uyayilalela imithandazo lokuthi uyafuna sibili ukukuzwa uthandaza kuye.—IHubo 10:1.

 Ongakwenza: Zimisele ukutshela uJehova izinto ezitshiyeneyo ezenzakale phakathi kosuku. Nxa izimo zingavumi ukuthi uthandaze ngakho ngalesosikhathi, woba leqiniso ukuthi elamhlalokho alipheli ungazange umtshele uJehova. Ungakhohlwa lokuthandazela abanye.—KwabaseFiliphi 2:4.

 Ongakuzama: Nxa ubona angani imithandazo yakho ayiselahlonzi, thandaza kuJehova umtshele ngakho. Ufuna ukukuzwa konke okukukhathazayo okuhlanganisa lendlela osubona ngayo imithandazo yakho.—1 UJohane 5:14.

 Okunye okungakunceda

•   Bala Okulandelayo:

   “Kungani Kumele Ngithandaze?”

•   Dawuniloda:

   “Thuthukisa Imithandazo Yakho”

 Umbhalo: ‘Ziqaphele zikhathi zonke wena kanye lendlela ofundisa ngayo. Ungenza njalo uzazisindisa wena lalabo abakulalelayo.’—1 KuThimothi 4:16.

 Okutshiwo yivesi le: Nxa uxoxela abanye lokho okukholwayo uyabe uqinisa lolwakho ukholo. Ngokwenza njalo uzazisindisa wena lalabo abakulalelayo.

 Okungenzakala: Ngezinye izikhathi ungezwa kungatsho ukuthi uxoxele abanye lokho okukholwayo kumbe uzwe usesaba ikakhulu nxa usesikolo.

 Ongakwenza: Ungavumeli ukuthi ukwesaba kukukhulele ucine usehluleka ukwenza okumele ukwenze. Umphostoli uPhawuli wabhala wathi: “Lanxa [ukutshumayela izindaba ezinhle] ngikwenza ngingafuni, ngiyabe ngilokhu ngilawo umsebenzi engiwunikiweyo.”—1 KwabaseKhorinte 9:16, 17.

 Ongakuzama: Dinga uFakazi owenza kuhle ekukhonzeni ongakuncedisa ekutshumayeleni. Kodwa qala ucele imvumo ebazalini bakho.—IZaga 27:17.

 Okunye okungakunceda

•   Bala Okulandelayo:

   “Kungani Ngesaba Ukukhuluma Ngokholo Lwami?”

 Umbhalo: “Asicabanganeni ukuze sivuselelane ethandweni lasemisebenzini emihle, singayekeli ukuhlangana ndawonye.”—KumaHebheru 10:24, 25.

 Okutshiwo yivesi le: Isizatho esiqakathekileyo esenza siye emihlanganweni yebandla yikuthi siyabe sisiyakhonza uJehova. Kodwa kulezinye izizatho ezimbili. Esokuqala yikuthi uzakhuthazwa ngabanye ebandleni. Esesibili uzabakhuthaza ngokubakhona kwakho langenkulumo zakho kanye lezimpendulo zakho.—KwabaseRoma 1:11, 12.

 Okungenzakala: Kwezinye izikhathi nxa usemihlanganweni yebandla kungenzeka ukuthi ingqondo yakho ibe khatshana ubusulahlekelwa ngokuqakathekileyo okuyabe kufundwa. Kanti njalo ungacina usulova emihlanganweni ukuze wenze imisebenzi yesikolo kumbe eminye nje.

 Ongakwenza: Akumelanga uvumele ukuthi imisebenzi yesikolo ikuphambanise ukungena imihlangano yebandla zikhathi zonke. Ungayekeli ukuphendula. Ngemva kwemihlangano zama ukuncoma loba ngubani ngempendulo yakhe kumbe ingxenye akade elayo.

 Ongakuzama: Hlala ulungiselele. Dawuniloda i-JW Library® ubusukhangela okubhalwe khona “Meetings” ukuze ubone okuzaxoxwa ngakho emhlanganweni.

 Okunye okungakunceda?

•   Bala Okulandelayo:

   “Kungani Kufanele Uye Emihlanganweni YobuKristu?”