“Endaweni engihlala kuyo akujayelekanga ukuhlangana lomuntu oleminyaka engaphansi kwengu-25 ongakaze abheme.”—UJulia.

Okusesihlokweni lesi

•  Okumele ukwazi

•  Ongakwenza

•  Okumele ukwazi ngokubhema imbanje

•  Okutshiwo ngabentanga yakho

 Okumele ukwazi

•   Ukubhema kungakubulala. I-nicotine etholakala phakathi kwegwayi iyingozi kakhulu njalo yenza umuntu ehluleke ukuhlala engabhemanga iphinde yenze kube nzima lokuthi atshiye ukubhema. Inhlanganiso okuthiwa yi-U.S. Centers for Disease Control and Prevention ithi: “Ukubhema ngeyinye yezinto ezibangela ukufa kwabasakhulayo abanengi emhlabeni wonke.”

   “Ngisebenza ukuthatha abantu ama-scan njalo sengibone imifanekiso eminengi etshengisa indlela ukubhema okubalimaza ngayo abanye. Kuyethusa ukubona indlela imithambo yabantu ababebhema eyabe ingcole ngayo. Ngiyayiqakathekisa kakhulu impilo yami yikho ngingasoze ngibheme loba sekutheni.”—UTheresa.

   Ubukwazi yini? Igwayi lilamakhemikhali atshiyeneyo angaba ngu-7 000 njalo amanengi akhona ayingozi kakhulu emzimbeni. Umnyaka ngamunye kulamamiliyoni abantu ababulawa yimikhuhlane ebangelwa yikubhema.

•   Ukubhema usebenzisa imitshina (vaping) lakho kuyingozi. Ukubhema usebenzisa imitshina okuthiwa ngama-vape pens kumbe ama-electronic cigarettes lakho kuyawalimaza amaphaphu njalo kungabangela lokufa. Indlela lezi zokubhema lazo zile-nicotine ejayele ukuthokala emihlangeni yegwayi okuyiyo eyenza umuntu obhemayo ahlale efuna ukubhema. Omunye umbiko uveza ukuthi i-nicotine etholakala kuma e-cigarettes ibangela ukuthi abasakhulayo bacine besebenzisa lezinye izidakamizwa.

   “Okunye okwenza abantwana labasakhulayo bathande ukubhema ngalindlela yikuthi okubhenywayo kwakhona kumnandi njengeziwiji. Ubunandi lobu bubenza bakhohlwe ukuthi ukubhema kuyabalimaza.”—UMiranda.

   Ubukwazi yini? Intuthu ephuma kuma e-cigarettes ilamakhemikhali ayingozi kakhulu angena aze ayefika emaphatshini.

 Ongakwenza

•   Dinga ulwazi oluqondileyo. Ungaphonguthatheka ngaloba yini oyizwayo. Ayisiloqiniso ukuthi ukubhema usebenzisa imitshina akungeke kukulimaze loba ukuthi kuyindlela yokuqeda ukukhathazeka. Dingisisa okunengi ngendaba le ukuze wenze isinqumo esihle.

   Isimiso esiseBhayibhilini: “Umuntu ongelalwazi ukholwa loba yini ayizwayo, kodwa okhaliphileyo uyacabangisisa ngawo wonke amanyathelo akhe.”—IZaga 14:15.

   “Nxa ungakuzwisisa ukuthi ukubhema kuyingozi kangakanani, awusoze uphonguthatheka ngakho lanxa ontanga yakho kumbe abanye abantu abadumileyo besithi yikuzikholisela nje.”—U-Evan.

   Ongacabanga ngakho: Ubona angani abasakhulayo ababhemayo bayathokoza yini ukwedlula abangabhemiyo? Bayenelisa yini ukulwisana lobunzima abangahlangana labo empilweni? Abakwenzayo akusoze kubadalele ezinye inhlupho yini?

•    Dinga indlela eziqondileyo zokulwisana lokukhathazeka. Ezinye indlela ezinhle zokulwisana lokukhathazeka zigoqela ukuqeqetsha umzimba, ukubala amabhuku kumbe ukuzikwejisela labangane abenza okuhle. Awusoze ufise ukubhema nxa ungahlala ulezinto ezinengi ezinhle zokwenza.

   Isimiso esiseBhayibhilini: “Ukukhathazeka okusenhliziyweni yomuntu kumqeda amandla, kodwa ilizwi elihle lenza inhliziyo ithokoze.”—IZaga 12:25.

   “Abantu abanengi bacabanga ukuthi ukubhema kungaqeda ukukhathazeka abalakho. Kodwa lanxa kungabe kubanceda okwesikhatshana, iqiniso yikuthi kuyabalimaza okwempilo yabo yonke. Kulendlela ezingcono kakhulu zokulwisana lokukhathazeka kulokubhema.”—U-Angela.

   Ongacabanga ngakho: Kuyini okunye ongakwenza ukuze ulwisane lokukhathazeka? Ukuze ubone okunye okungakunceda, bala isihloko esithi “Ngingabhekana Kanjani Nokukhathazeka?”

•    Ungavumi ukuyengwa. Abanye abangakuyenga kungaba ngofunda labo esikolo kumbe ezokuzilibazisa ozikhethayo. Amafilimu lezinye inhlelo ze-TV kanye lezokuxhumana (social media) kwenza kukhanye angani ukubhema akusongozi.

   Isimiso esiseBhayibhilini: ‘Abantu abalokholo oluqinileyo sebazifundisa ukwehlukanisa okuhle lokubi besebenzisa amandla abo okuqedisisa.’—KumaHebheru 5:14.

   “Abanengi engangifunda labo esikolo babengihlonipha ngoba ngangingabhemi. Ngathi sengibachasisele ukuthi kungani ngingabhemi, abanengi babo babehle bangilwele nxa kungaba lofuna ngibheme. Ukutshela abanye ukuthi awubhemi kungenza bangakuhluphi.”—U-Anna.

   Ongacabanga ngakho: Uyenelisa yini ukuyimela indaba yakho nxa abanye bekuyenga? Kulezikhathi ozikhumbulayo yini lapho owake wala khona ukuyengwa? Ukuze ubone okunye okungakunceda khangela itshathi elithi “Uhlelo Lokumelana Nokucindezela Kontanga” elikusahluko 15 ebhukwini elithi “Intsha Iyabuza—Izimpendulo Ezisebenzayo, UMqulu 2.

•   Khetha kuhle abangane. Kuzakuba lula ukuthi ungabhemi nxa labangane bakho bengabhemi.

   Isimiso esiseBhayibhilini: “Ohamba labahlakaniphileyo uzahlakanipha, kodwa ozwanana lezithutha uzangena emanyaleni.”—IZaga 13:20.

   “Kuyanceda ukuba labangane abathembekileyo futhi abenelisa ukuzibamba. Ukubona indlela izinto ezibahambela ngayo ngenxa yokuziphatha kwabo okuhle kungakukhuthaza ukuthi lawe uziphathe kuhle.”—UCalvin.

   Ongacabanga ngakho: Abangane bakho benza kube lula yini ukuthi uphile impilo ehlanzekileyo kumbe bakubisela emuva?

 Okumele ukwazi ngokubhema imbanje

 Abantu abanengi bathi ukubhema imbanje akulangozi kodwa lawo ngamanga.

•   Abasakhulayo ababhema imbanje bangacina bengasenelisi ukuphila bengazibhemanga kumbe bathwale nzima ukuziyekela. Abachwayisisayo sebathola ukuthi imbanje ziyaphambanisa indlela ingqondo esebenza ngayo okubangela ukuthi kube nzima ukuthi umuntu abambe izinto azifundayo.

•   Inhlanganiso okuthiwa yi-U.S. Substance Abuse and Mental Health Services Administration ithi: “Ukuchwayisisa kutshengisa ukuthi abantu abasebenzisa imbanje bajayele ukungazwanani labanye, abanye bayafeyila esikolo, abanye abenzi kuhle emisebenzini ikanti abanye abayikholisi impilo.”

   “Ngake ngalingeka ukubhema imbanje ngizitshela ukuthi kuzanginceda ngilwisane lokukhathazeka. Kodwa ngathi ngicabanga ngokuthi kuzaba nzima njani ukuthi ngiwutshiye umkhuba lo, lemali engangizayisebenzisa kanye lokuthi ngangifaka impilo yami engozini, ngananzelela ukuthi ukubhema kwakungasoze kungincede ngitsho.”—UJudah.