IMIBUZO EBUZWA NGABASAKHULAYO
Yindaba Abazali Bami Bengafuni Ngikholise?
Abangane bakho bakunxuse ephathini ngempelaviki ubusucela ebazalini bakho ukuhamba kodwa bakwalise. Lokhu akukumangalisi ngoba lakuqala bakwalisa.
Okusesihlokweni lesi
Kuyini okwenza abazali bami bangalise ukwenza ezinye izinto?
Nxa abazali bakho behlala bekwalisa ukwenza ezinye izinto, ungacina ucabanga ukuthi abafuni ukuthi ukholise empilweni.
Osakhulayo okuthiwa nguMarie wacina ecabanga njalo abazali bakhe baze bamthengele ifoni. Uthi: “Ubaba wangifakela imithetho eminenginengi emayelana lokuthi yiwaphi ama-application okumele ngiwadawunilode, ngobani okumele ngikhulume labo lokuthi kumele ngisebenzise ifoni kuze kutshaye sikhathi bani. Kodwa abazali babangane bami bona babebavumela ukwenza loba yini abayifunayo.”
Ongacabanga ngakho: Ubona angani abazali bakaMarie babengafuni yini ukuthi akholise empilweni? Zikhona yini izizatho ezazibenza bafake imithetho leyo?
Imingcele efakwayo ingakhanya angani iyakuncitsha inkululeko, kodwa iqiniso yikuthi ingakuvikela ezingozini. Lemithetho oyifakelwa ngabazali injalo
Zama ukwenza lokhu: Ake sithi ungumzali osanda kuthengela umntanakhe osakhulayo ifoni. Kuyini obungakhathazeka ngakho? Yiphi imithetho obungayifaka ukuze uvikele umntanakho? Ubungathini nxa umntanakho angakutshela ukuthi awufuni ukuthi athokoze empilweni?
“Ubaba wayejayele ukuthi aluba bekunguwe umzali ubuzakwenzani. Ukuzifaka ezicathulweni zakhe kwanginceda ngabona ukuthi imithetho ayengifakela yona iqakathekile sibili lokuthi yayingivikela njani. Nxa bengingaba labantwana bengingabafakela imithetho efanana laleyo ubaba ayengifakela yona.”—UTanya.
Ngingenzani ukuze abazali bami bavume?
“Ukuvuka ngolaka akusoze kukuncede ngalutho wena kumbe abazali bakho. Ukuphikisana labo kuzakwenza babone sibili ukuthi awukakulungeli ukuphiwa inkululeko ethe xaxa.”—URichard.
“Kuyo yonke imithetho abazali bami abangifakela yona, bayabe belezizatho ezinhle. Ayisikho ukuthi abafuni ngikholise kodwa bafuna ngingangeni enkathazweni.”—U-Ivy.
Isimiso esiseBhayibhilini: “Isithutha sikhipha lonke ulaka lwaso, kodwa ohlakaniphileyo uyazikhuza, abambe ulaka lwakhe.”—IZaga 29:11.
“Izikhathi ezinengi ngangijayele ukuthola indlela ezicatshileyo zokwenza izinto ubaba ayethe ngingazenzi efonini. Ngokwesibonelo ngangibhalela abangane bami amameseji ebusuku futhi ngidawuniloda lama-application ubaba ayethe ngingawadawunilodi. Kodwa wayejayele ukubamba ubutsotsi engangibenza, abeseqinisa isandla ngoba wayengasangithembi. Engakubonayo yikuthi ukungalaleli imithetho oyifakelwa ngabazali akubi lempumela emihle.”—UMarie.
“Bekezela ngoba kungathatha isikhathi ukuthi abazali bakho batshintshe imithetho abakufakele yona. Nxa bangabona ukuthi uyayilalela imithetho abakunika yona, bazakunika inkululeko ethe xaxa.”—UMelinda.
Isimiso esiseBhayibhilini: “Lalelani abazali benu kukho konke.”—KwabaseKholose 3:20.
“Ukufuna ngenkani ukuthi izinto zenziwe ngendlela yakho akusoze kukuncede ukuthi uthole lokho okufunayo.”—UNatalie.
“Abazali bayabe befuna ukubona ukuthi uqala ucabange yini ungakenzi ezinye izinto. Yikho nxa ngikhuluma labazali bami ngiyazama ukubonisana labo ngibatshele lezizatho ezenza ngitsho okuthile kulokuthi ngisebenzise indlela engizizwa ngayo. Nxa ngingenza njalo bajayele ukungivumela ukwenza lokho engiyabe ngikucela.”—UJoseph.
Isimiso esiseBhayibhilini: “Hlonipha uyihlo lonyoko.”—Kwabase-Efesu 6:2.
Nanku Okunye
IMIBUZO EBUZWA NGABASAKHULAYO
Ngingaxoxisana Njani Labazali Bami Ngemithetho Abangifakela Yona?
Funda ukukhuluma ngenhlonipho labazali bakho futhi uzamangala ukuthi kuzahamba kuhle njani.
IMIDWEBO YABOPOPAYI
Ngingenzani Ukuze Abazali Bami Bangiphe Inkululeko?
Ungacabanga ukuthi usukhulile okokuthi usungaphiwa inkululeko ethe xaxa, kodwa abazali bakho bona bangaboni njalo. Kuyini ongakwenza ukuze bakuthembe?
IMIBUZO EBUZWA NGABASAKHULAYO
Ngingenzani Ukuze Abazali Bami Bangithembe?
Wonke umuntu kumele athembeke.
