IBhayibhili Lithini Ngokutshisa Izidumbu?
Impendulo YeBhayibhili
Akulamthetho eBhayibhilini otshoyo ukuthi umuntu ofileyo kumele angcwatshwe yini kumbe atshiswe.
IBhayibhili lisitshela ngabantu ababethembekile abafelwa yizihlobo zabo bazingcwaba. Ngokwesibonelo, u-Abhrahama wenza umzamo omkhulu ukuze adinge indawo ayezangcwaba khona umkakhe uSara.—UGenesisi 23:2-20; 49:29-32.
IBhayibhili liphinda lisitshele ngabanye ababethembekile abatshisa izidumbu zabantu abathile. Ngokwesibonelo iNkosi uSawuli lamadodana ayo amathathu babulawa empini futhi izidumbu zabo zasala elizweni lesitha. Amabutho ako-Israyeli athi esizwa ukuthi izidumbu lezi zazingagcinwanga kuhle, ahamba ayazithatha azitshisa asengcwaba amathambo. (1 USamuyeli 31:8-13) IBhayibhili litshengisa ukuthi akukubi okwenziwa ngamabutho la.—2 USamuyeli 2:4-6.
Imibono engaqondanga mayelana lokutshiswa kwezidumbu
Okungaqondanga: Akulasithunzi ukutshisa isidumbu.
Okuqondileyo: IBhayibhili lithi umuntu angafa uyabuyela othulini, yikho nxa isidumbu singabola siba luthuli. (UGenesisi 3:19) Ukutshisa isidumbu sibe ngumlotha kwenza kungadingakali ukuthi siqale sibole besesisiba luthuli.
Okungaqondanga: IBhayibhili litshengisa ukuthi abantu ababengalaleli uNkulunkulu yibo ababetshiswa.
Okuqondileyo: Bakhona sibili ababengalaleli uNkulunkulu abatshiswayo, njengo-Akhani lemuli yakhe. (UJoshuwa 7:25) Kodwa kwakungasimthetho ukuthi kumele batshiswe. (UDutheronomi 21:22, 23) Njengoba sibonile ekuqaliseni labantu ababethembekile babetshiswa. Ngokwesibonelo isidumbu sikaJonathani satshiswa.
Okungaqondanga: UNkulunkulu kasoze avuse abantu abatshiswayo
Okuqondileyo: UNkulunkulu uyenelisa ukuvusa abantu abafileyo kungelani lokuthi bafa njani. Abanye bangcwatshwa, abanye batshiswa ikanti abanye bafela olwandle kumbe badliwa zinyamazana. (ISambulo 20:13) UNkulunkulu ulamandla amangalisayo yikho uyenelisa ukuvusa abantu belemizimba emitsha.—1 KwabaseKhorinte 15:35, 38.
Nanku Okunye
ESSENTIAL BIBLE TEACHINGS
Abafileyo Bakusiphi Isimo?
IBhayibhili lithembisa ukuthi sizafika isikhathi lapho abantu abanengi abazavuswa khona baphinde baphile njengoLazaro.
IMIBUZO YEBHAYIBHILI IYAPHENDULWA
Kutshoni Ukuvuswa Kwabafileyo?
Bala isihloko lesi uzwe ukuthi ngobani abazavuswa emhlabeni omutsha.
OKUMAYELANA LATHI
Cela Ukuthi Omunye Wethu Akuvakatshele
Xoxa ngezinto ezitshiyeneyo eziphathelane leBhayibhili kumbe ufunde okunengi ngaboFakazi bakaJehova.