Kutshoni Ukusindiswa?
Impendulo yeBhayibhili
Kwezinye izikhathi abalobi beBhayibhili babesebenzisa ibala elithi ‘insindiso’ lelithi ‘ukusindiswa nxa bekhuluma ngokukhululwa komuntu engozini. (U-Eksodusi 14:13, 14; ImiSebenzi 27:20) Kodwa izikhathi ezinengi amabala la asetshenziswa nxa kukhulunywa ngokukhululwa esonweni. (UMathewu 1:21) Njengoba ukufa kubangelwa yisono, abantu abakhululwe esonweni bayabe sebelethemba lokuphila kuze kube nini lanini.—UJohane 3:16, 17. a
Kumele senzeni ukuze sisindiswe?
Nxa sifuna ukusindiswa kumele sibe lokholo kuJesu njalo sitshengise ukuthi silokholo lolu ngokulalela imilayo yakhe.—ImiSebenzi 4:10, 12; KwabaseRoma 10:9, 10; KumaHebheru 5:9.
IBhayibhili lithi ukholo lwethu kumele lukhanye ngemisebenzi. (UJakhobe 2:24, 26) Kodwa lokhu akutsho ukuthi ukulalela nje kuphela yikho okuzakwenza sisindiswe. Ukusindiswa “kuyisipho esivela kuNkulunkulu” njalo sikuthola ngenxa yomusa wakhe omkhulu.—Kwabase-Efesu 2:8, 9.
Kungenzakala yini ukuthi ucine ungasasindiswanga?
Ye kungenzakala. Phela nxa umuntu angakhitshwa emanzini abesebuyela futhi angagalula. Kunjalo langomuntu osekhululiwe esonweni, nxa angayekela ukuqhubeka elokholo angacina engasasindiswanga. Lokhu yikho okwenza iBhayibhili likhuthaze amaKhristu asethole insindiso le ukuthi ‘alulwele ngamandla awo wonke ukholo lwawo.’ (UJuda 3) Liphinda lithi: “Qhubekani lisebenzela ukusindiswa kwenu ngokwesaba langokuqhuqha.”—KwabaseFiliphi 2:12.
Ngubani uMsindisi? NguNkulunkulu yini kumbe nguJesu?
IBhayibhili litshengisa ukuthi uNkulunkulu nguye osindisayo ngoba limbiza ngokuthi ‘nguMsindisi’ izikhathi ezinengi. (1 USamuyeli 10:19; U-Isaya 43:11; KuThithusi 2:10; UJuda 25) Kanti njalo iBhayibhili litshengisa ukuthi uNkulunkulu wasebenzisa amadoda atshiyeneyo ukuze akhulule abantu bako-Israyeli. (UNehemiya 9:27; ABahluleli 3:9, 15; 2 AmaKhosi 13:5) b IBhayibhili liphinda lithi uJesu Khristu ‘unguMsindisi’ ngoba nguye uNkulunkulu amsebenzisa ukukhulula abantu esonweni ngokufa kwakhe.—ImiSebenzi 5:31; KuThithusi 1:4. c
Wonke umuntu uzasindiswa yini?
Hatshi, abanye abantu abasoze basindiswe. (2 KwabaseThesalonika 1:9) UJesu wathi ebuzwa ukuthi, “Balutshwana yini abazasindiswa?” yena waphendula wathi: “Zamani ngamandla wonke ukungena ngomnyango omncane ngoba ngilitshela ukuthi abanengi bazafuna ukungena kodwa abasoze benelise.”—ULukha 13:23, 24.
Imibono engaqondanga mayelana lokuthi wonke umuntu uzasindiswa
Okungaqondanga: U-1 Khorinte 15:22 utshengisa ukuthi bonke abantu bazasindiswa ngoba uthi “bonke bazakwenziwa baphile ngenxa kaKhristu.”
Okuqondileyo: Amanye amavesi asesahlukweni lesi atshengisa ukuthi indaba okukhulunywa ngayo ngeyokuvuswa kwabafileyo. (1 KwabaseKhorinte 15:12, 13, 20, 21, 35) Ngakho nxa kuthiwa “bonke bazakwenziwa baphile ngenxa kaKhristu” kuyabe kusitsho ukuthi wonke umuntu ozavuswa uzathola isibusiso lesi ngenxa kaJesu Khristu.—UJohane 11:25.
Okungaqondanga: UThithusi 2:11 utshengisa ukuthi wonke umuntu uzasindiswa ngoba uthi uNkulunkulu “waletha insindiso kubo bonke abantu.”—International Standard Version.
Okuqondileyo: Ibala lesiGrikhi elihunyutshwe ngokuthi “bonke” evesini le lingaphinda litsho “yonke imihlobo yabantu.” d Yikho uThithusi 2:11 utsho ukuthi uNkulunkulu ufuna yonke imihlobo yabantu isindiswe, ufuna “zonke izizwe, lezizwana, labantu kanye lezindimi” basindiswe.—ISambulo 7:9, 10.
Okungaqondanga: U-2 Phetro 3:9 utshengisa ukuthi wonke umuntu uzasindiswa ngoba uthi uNkulunkulu “kafisi ukuthi loba ngubani abhujiswe.”
Okuqondileyo: UNkulunkulu uyafuna sibili ukuthi abantu basindiswe kodwa kababambi ngamandla ukuthi bamukele insindiso yakhe. Ngosuku lwakhe lokwahlulela, uzabhubhisa “abantu abangamesabiyo uNkulunkulu.”—2 UPhetro 3:7.
a IBhayibhili liyakhuluma ngokusindiswa kwabantu lanxa bengakasindiswa esonweni lasekufeni.—Kwabase-Efesu 2:5; KwabaseRoma 13:11.
b Emavesini la, amanye amaBhayibhili asebenzisa ibala elithi “umkhululi,” “wabakhulula,” “umkhokheli” hatshi elithi umsindisi. Kodwa emibhalweni yakuqala yesiHebheru kusetshenziswa ibala elifananayo nxa kukhulunywa ngabantu abasindisa abanye langesikhathi kukhulunywa ngokuthi uJehova uNkulunkulu ‘unguMsindisi.’—IHubo 7:10.
c Ibizo elithi Jesu lithathelwa ebizweni lesiHebheru elithi Yehoh·shuʹaʽ, elitsho ukuthi “UJehova Uyasindisa.”
d Khangela isichazamazwi esithi Vine’s Complete Expository Dictionary of Old and New Testament Words. Ibala lesiGrikhi elifananayo liyatholakala kuMathewu 5:11, lapho uJesu atshela khona abalandeli bakhe ukuthi bazagconwa ngazo “zonke izinto” ezimbi.
Nanku Okunye
IMIBUZO YEBHAYIBHILI IYAPHENDULWA
Kungani Umhlatshelo KaJesu Ubizwa Ngokuthi “Yinhlawulo Yabanengi”?
Inhlawulo isikhulula njani esonweni?
IMIBUZO YEBHAYIBHILI IYAPHENDULWA
Ukukholwa KuJesu Yikho Kodwa Okufunekayo Yini Ukuze Umuntu Asindiswe?
IBhayibhili lisitshela ngabanye abangasoze basindiswe lanxa bekholwa kuJesu.
ESSENTIAL BIBLE TEACHINGS
Kungani UJesu Wafa?
Mhlawumbe wake wezwa ukuthi wafela izono zethu. Kodwa kungenzakala njani ukuthi umhlatshelo owodwa uncede amamiliyoni abantu?
UKUCHASISWA KWAMAVESI ASEBHAYIBHILINI
Ukuchasiswa KukaRoma 10:13—“Loba Ngubani Ozabiza Ibizo LeNkosi Uzasindiswa”
UNkulunkulu ufuna bonke abantu basindiswe ukuze bathole ukuphila okungapheliyo kungelani lokuthi bangumhlobo bani, bavela kuliphi ilizwe kumbe ukuthi banothile yini loba hatshi.
