Izikhathi ezinengi iBhayibhili libiza uJesu ngokuthi “uyiNdodana kaNkulunkulu.” (UJohane 1:49) Amazwi athi “iNdodana kaNkulunkulu” atshengisa ukuthi uNkulunkulu unguMdali wazo zonke izinto lokuthi nguye owadala uJesu. (IHubo 36:9; ISambulo 4:11) IBhayibhili kalitsho ukuthi uNkulunkulu waba lomntwana ngendlela abantwana abazalwa ngayo emhlabeni.

 IBhayibhili lithi izingilosi lazo ‘zingamadodana kaNkulunkulu.’ (UJobe 1:6, The Holy Bible in Ndebele) Liphinda lithi u-Adamu ‘wayeyindodana kaNkulunkulu.’ (ULukha 3:38) Lisinceda lokuthi sizwisise ukuthi uJesu uyiNdodana kaNkulunkulu eqakathekileyo ngoba nguye owadalwa kuqala futhi wadalwa nguNkulunkulu mathupha.

•  UJesu wake waphila ezulwini yini engakabuyi emhlabeni?

•  UJesu wayesenzani engakabuyi emhlabeni?

 Ye. UJesu waphila ezulwini eyingilosi engakabuyi lapha emhlabeni. Yena ngokwakhe wathi: “Ngehle ezulwini.”—UJohane 6:38; 8:23.

 UNkulunkulu waqala ngokudala uJesu engakadali ezinye izinto. IBhayibhili lithi ngoJesu:

•   ‘Ulizibulo lakho konke okudaliweyo.’—KwabaseKholose 1:15.

•   ‘Uyisiqalo sezinto zonke ezadalwa nguNkulunkulu.’—ISambulo 3:14.

 Isiphrofetho esithi ‘umdabuko wakhe ngowasekadeni, kusukela ezikhathini zendulo’ sagcwaliseka kuJesu.—UMikha 5:2; UMathewu 2:4-6.

 Wayesezulwini futhi elesikhundla esiphezulu. UJesu wakhuluma ngesikhundla lesi ngesikhathi ekhuleka kuYise. Wathi: “Baba, ngikhazimulisa . . . ngenkazimulo engangilayo ngiseceleni kwakho umhlaba ungakabi khona.”—UJohane 17:5.

 Wancedisa uYise ukudala zonke izinto. UJesu wayeyingcitshi emsebenzini wokudala ayewenza loYise. (IZaga 8:30) IBhayibhili lithi: ‘Kwasetshenziswa yena ukudala zonke ezinye izinto ezisezulwini lezisemhlabeni.’—KwabaseKholose 1:16.

 UNkulunkulu wasebenzisa uJesu ukuthi adale zonke izinto ezikhona okugoqela izingilosi lakho konke esikubonayo. (ISambulo 5:11) Indlela uJehova loJesu abasebenza ngayo ngesikhathi bedala ingafaniswa lendlela umuntu odweba amaplani asebenzelana ngayo lobhilida. Umsebenzi kabhilida ngowokwakha amaplani adwetshwe ngomunye umuntu.

 WayenguLizwi. IBhayibhili lithi uJesu ‘wayenguLizwi’ engakabuyi emhlabeni. (UJohane 1:1) Lokhu kutshengisa ukuthi uNkulunkulu wasebenzisa uJesu ukuthi adlulise imilayezo kwezinye izingilosi.

 Kungenzakala ukuthi uNkulunkulu wamsebenzisa uJesu ukuthi akhulume labantu lapha emhlabeni. Ngokwesibonelo angabe wamsebenzisa ukuthi akhulume lo-Adamu lo-Eva esivandeni sase-Edeni. (UGenesisi 2:16, 17) Kungenzakala lokuthi nguye owayekhokhela ama-Israyeli ngesikhathi esenkangala. UNkulunkulu wayekhangelele ukuthi ama-Israyeli amlalele uJesu.—U-Eksodusi 23:20-23. a