IBhayibhili kalikutsho ukuthi umhlaba uyisipatalala. a Lanxa lona lingayisilobhuku lesayensi, liyavumelana lokunye okukhulunywa ngabezesayensi. Okutshiwo liBhayibhili ‘akuguquki lanini.’​—IHubo 111:8.

•  Litshoni iBhayibhili nxa likhuluma ‘ngamagumbi amane omhlaba’?

•  Ukulingwa kukaJesu akutshengisi yini ukuthi umhlaba uyisipatalala?

 Umutsho othi ‘amagumbi amane omhlaba’ lothi “emikhawulweni yomhlaba” akumelanga uthathwe unjengoba unjalo ngoba lokhu kungatsho ukuthi umhlaba ulamacele kumbe ulalapho ophelela khona. (U-Isaya 11:12; UJobe 37:3) Yikho amazwi la ayizitsho ezikhuluma ngomhlaba wonke nje. Ngezinye izikhathi iBhayibhili lisebenzisa ‘impumalanga, lentshonalanga, lenyakatho kanye leningizimu’ njengezitsho ezimela umhlaba wonke.​—ULukha 13:29.

 Kukhanya ibala lesiHebheru elihunyutshwe ngokuthi ‘emagumbini’ loba ‘emikhawulweni’ liyisitsho esithathelwe ebaleni elithi ‘amaphiko.’ Ibhuku elithi, The International Standard Bible Encyclopedia lithi: “Ngenxa yokuthi inyoni iyenelisa ukwelula impiko zayo ukuze ivalele amaphuphu ayo, [ibala leli lesiHebheru] litsho ekucineni kumbe emaphethelweni aloba yini evuliweyo loba eyendlaliweyo.” Ibhuku elifananayo lithi ibala elasetshenziswa kuJobe 37:3 laku-Isaya 11:12 litsho umngcele kumbe amaphethelo omhlaba. b

 UDeveli wathatha uJesu “wamusa entabeni ende okumangalisayo, wasemtshengisa yonke imibuso yomhlaba kanye lenkazimulo yayo” ukuze amlinge. (UMathewu 4:8) Abanye abantu bathi indaba le itshengisa ukuthi kulendawo lapho umuntu angabona khona umhlaba wonke emi kuyo. Kodwa kukhanya intaba le emangalisayo kayisiyontaba ekhona sibili. Nanzi izizathu ezenza sitsho njalo.

•   Ayikho intaba ende kangako okokuthi nxa ungama kuyo wenelise ukubona umhlaba wonke.

•   USathane kazange atshengise uJesu imibuso kuphela kodwa wamtshengisa “lenkazimulo yayo.” UJesu wayengeke ayibone inkazimulo yemibuso le esentabeni ethile, yikho kulengqondo ukuthi sithi uSathane wasebenzisa umbono ukuze akwenze lokhu. Ngokwesibonelo, umuntu uyenelisa ukutshengisa abanye imifanekiso yezinto ezitshiyeneyo ezisemhlabeni esebenzisa i-projector le-screen.

•   ULukha 4:5 yena uthi uSathane watshengisa uJesu “yonke imibuso yomhlaba ngesikhatshana nje,” okuyinto eyayingeke yenzakale aluba kwakuyimibuso yoqobo. Lokhu kutshengisa ukuthi uSathane wasebenzisa indlela ethize ukuze alinge uJesu.