Hatshi. Umhlaba awusoze ubhujiswe, utshiswe ngomlilo kumbe kudalwe omunye esikhundleni sawo. IBhayibhili lifundisa ukuthi uNkulunkulu wadala umhlaba ukuze uhlalwe kuze kube nini lanini.

•   “Abalungileyo bazazuza ilifa lelizwe bahlale kulo lanini.”​—IHubo 37:29.

•   “[UNkulunkulu] wawugxilisa umhlaba ezisekelweni zawo; ungeke wagudlulwa.”​—IHubo 104:5.

•   “Umhlaba umi lanini.”​—UmTshumayeli 1:4.

•   “Yena owabumba umhlaba wawenza, wawusekela; kawudalanga ukuba ungabi lalutho kodwa wawenza ukuba kuhlalwe kuwo.”​—U-Isaya 45:18.

 UNkulunkulu kasoze avumele abantu babhubhise umhlaba ngokuwungcolisa, ngezimpi kumbe ngezinye izindlela. Kodwa “uzachitha labo abachitha umhlaba.” (ISambulo 11:18) Uzakwenza njani lokhu?

 UNkulunkulu uzasusa ohulumende ngoba abanelisi ukuvikela umhlaba, ngemva kwalokho uzafaka owakhe. (UDanyeli 2:44; UMathewu 6:9, 10) Ozabusa eMbusweni kaNkulunkulu nguJesu Khristu. (U-Isaya 9:6, 7) Ngesikhathi esemhlabeni uJesu wenza izimangaliso ezatshengisa ukuthi ulamandla okuqondisa imvelo. (UMakho 4:35-41) NjengeNkosi yoMbuso kaNkulunkulu, uzaphinda atshengise ukuthi ulamandla ngokuqondisa imvelo. Uzantshintsha izimo ezisemhlabeni azenze zifanane lendlela okwakuyiyo e-Edeni.​—UMathewu 19:28; ULukha 23:43.

 Hatshi alikutsho. Umbono lo ongaqondanga uthathelwa kulokho iBhayibhili elikutshoyo ku-2 Phetro 3:7. Ivesi le ithi: “Amazulu akhathesi kanye lomhlaba kugcinelwe umlilo.” Ake sixoxe ngemicijo emibili eqakathekileyo esinceda sizwisise ukuthi amazwi la atshoni.

1.   Amabala athi “amazulu,” “umhlaba” “lomlilo” angaba lengcazelo eyedlula eyodwa ngendlela asetshenziswa ngayo eBhayibhilini. Ngokwesibonelo uGenesisi 11:1 uthi: “Umhlaba wonke wawulolimi lunye.” Evesini le “umhlaba” utsho abantu.

2.   Amavesi andulela u-2 Phetro 3:7 asinceda sibone ukuthi amazulu, umhlaba lomlilo kuyini. Uvesi 5 lo-6 ukhuluma ngoZamcolo owabakhona ngesikhathi sikaNowa. IBhayibhili lithi umhlaba wangaleso sikhathi wachitheka. Kodwa lokho akutsho umhlaba ngokwawo, kutsho abantu ababelodlakela. (UGenesisi 6:11) UZamcolo wabhubhisa ‘lamazulu’ okutsho abantu ababebusa ngalesosikhathi. Siyabona-ke ukuthi umhlaba owabhujiswayo ngabantu hatshi iplanethi yethu. UNowa lemuli yakhe abazange babhujiswe, baqhubeka bephila emhlabeni ngemva kukaZamcolo.​—UGenesisi 8:15-18.

 Ukubhujiswa ‘ngomlilo’ kuzabe kuhambelana loZamcolo ngoba lakho kuzaqeda abantu ababi hatshi umhlaba ngokwawo. UNkulunkulu usithembisa “izulu elitsha lomhlaba omutsha, ikhaya lokulunga.” (2 UPhetro 3:13) ‘Umhlaba omutsha’ utsho abantu abalungileyo abazabuswa ‘lizulu elitsha’ okutsho uMbuso kaNkulunkulu. UMbuso kaNkulunkulu uzakwenza umhlaba ube lipharadayisi.​—ISambulo 21:1-4.