Umkakho useke wakutshela yini ukuthi ukhathazekile ngendlela osunatha ngayo? Nxa kunjalo, kungaba kuhle ukuthi ucabange ngokulandelayo.

Okusesihlokweni lesi

•  Ukunatha kakhulu kuyawuphambanisa umtshado

•  Usuphilela ukunatha utshwala yini?

•  Ungacatshi ngomunwe

•  Ongakwenza

 Ukunatha kakhulu kungabangela ukuthi umuntu abe lomkhuhlane wenhliziyo, umkhuhlane ohlasela isibindi kanye lemvukuzane. Kodwa ukunatha kakhulu akupheleli ekuphambaniseni impilakahle yomuntu, kuphinda kudale lenhlupho emtshadweni. Ngokwesibonelo abanye abatshadileyo bayabe sebesilwa, babe lenhlupho zemali, bangathembeki komunye wabo kumbe bacine bedivosa.

 IBhayibhili lithi utshwala ‘buluma njengenyoka njalo bukhipha ubuhlungu obuyingozi njengebululu’ nxa umuntu angabunatha kakhulu. (IZaga 23:32) Manje ungakwazi njani ukuthi usuphilela ukunatha?

 Imibuzo elandelayo izakunceda ubone ukuthi usuphilela ukunatha utshwala yini:

•   Uyenelisa ukuzibamba yini ukuthi unganathi kakhulu?

•   Uhlala ucabanga ngokuthi uzaphinda unathe nini futhi yini?

•   Uqhubeka unatha yini lanxa ubona ukuthi lokhu sekukuphambanisa empilweni, okugoqela lasemtshadweni wakho?

•   Uzizwa usugula yini nxa ungazama ukuyekela ukunatha?

•   Liyake lixabane yini lomkakho ngenxa yendlela osunatha ngayo?

•   Usunatha kakhulu yini ukwedlula indlela owawunatha ngayo kuqala?

•   Usunatha ngudlu yini utshwala kungaba endlini kumbe emsebenzini?

 Nxa kuyikuthi okuqanjwe emibuzweni le ngokunye okwenzayo, kungabe sekutshengisa ukuthi usuphilela utshwala kumbe usuyisidakwa.

 Umkakho uke wakutshela yini ukuthi ukhathazekile ngendlela onatha ngayo? Nxa eke wakutshela, wena umphendule usithini? Uzame ukucatsha ngomunwe yini kumbe ukuzigeza? Mhlawumbe wasola abanye kumbe umkakho usitsho amazwi anjengalawa:

•   “Aluba ubungiphatha kuhle bengingasoze nginathe.”

•   “Aluba usebenza lapho engisebenza khona lawe ubuzazibona usunatha.”

•   “Banengi kakhulu abantu abanatha ukwedlula mina, okwami akumangalisi.”

 Ukukhuluma amazwi anjengalawa kungabe kutshengisa ukuthi uqakathekisa ukunatha ukwedlula ukuthi lithokoze emtshadweni wenu. Kodwa kuyini okumele ukuqakathekise kakhulu?

 Okutshiwo liBhayibhili: ‘Indoda etshadileyo ikhathazeka ngokuthi ingemukelwa njani ngumkayo.’—1 KwabaseKhorinte 7:33.

•   Zama ukuzwisisa ukuthi yindaba umkakho ekhathazekile ngendlela onatha ngayo. Lanxa ungacabanga ukuthi umkakho ukhathazeke ngento engatsho lutho, iqiniso yikuthi kulalapho ongatshintsha khona. Nxa ungazibona uqhubeka ngokunatha kakhulu lanxa umkakho eke wakhuluma ngendaba le, kuyabe sekutshengisa ukuthi ulohlupho lokudakwa.

   Okutshiwo liBhayibhili: “Umuntu ngamunye kangazifuneli okunceda yena kodwa kaqhubeke esenza okunceda abanye.”—1 KwabaseKhorinte 10:24.

•   Kumele ukwazi okumele ukwenze. Nxa amasotsha efuna ukunqoba empini, kumele abekwazi indlela isitha esilwa ngayo. Njengoba lawe usempini yokulwisana lokunatha kakhulu, kumele ukwazi ukuthi yiziphi izingozi ezingaba khona lokuthi kubalimaze njani abanye. Kanti njalo kuzamele ufunde ukuthi ungenzani ukuze ungaphileli ukunatha kakhulu lokuthi ungawubuyeleli umkhuba wakhona nxa usuke wawutshiya.

   Okutshiwo liBhayibhili: “Liqhubeke lixwaya izifiso zenyama ezilwa lani.”—1 UPhetro 2:11.

•   Dinga uncedo. Okunye okungakunceda ukuthi utshiyane lomkhuba wokunatha kakhulu yikuyadinga ukuncediswa ngabezempilakahle kumbe ezinye inhlanganiso ezincedisa abantu abalohlupho lolu. Kanti njalo ungaxoxa lomngane wakho, yena uzakunceda ubone ukuthi kuyini okubangela ukuthi unathe kakhulu. Ungesabi ukucela umngane wakho lo ukuthi akuncedise nxa ususizwa kusithi unathe.

   Okutshiwo liBhayibhili: “Umngane oqotho ulothando ngazo zonke izikhathi, njalo ungumfowenu ozalelwe ukukusiza ngezikhathi zobunzima.”—IZaga 17:17.

 Ukulwisana lomkhuba wokunatha kakhulu ayisondaba elula, ingumqanso sibili. Ngeke uwutshiye ngokuphongubala indaba encane esesihlokweni esithile kumbe ngokuzitshela ukuthi usufuna ukunatha mbinjana. Nxa ufuna ukulwisana lomkhuba lo kumele ucabange ngempilakahle yakho langomtshado wakho.

 Ukuze uthole okunengi: Bala izihloko ezilandelayo ubone okwanceda abanye ukuthi bayekele ukunatha kakhulu utshwala.

 “Sengiyindoda Elomusa”

 “Angisayangeki Ngempilo Yami”

 “Ngasengihlala Emigwaqweni”

Ngangingasayithandi Indlela Engangiphila Ngayo