•  Okumele ukwazi

•  Ongakwenza

•  Okutshiwo ngabazali

 Kwezinye izindawo, abantwana bakhululekile ukuxoxa labazali babo futhi baya kubo nxa befuna ukucetshiswa. Kodwa kwezinye izindawo, abantwana baya kubosowabo nxa befuna ukucetshiswa.

 Nxa abantwana bangacetshiswa ngosowabo, bangacina bengaselandaba lalokho okukhulunywa ngabazali babo futhi lokhu kukhanya kakhulu nxa sebekhulakhulile. Nxa abantwana betshona bodwa kuyabe sokungani bayakhulisana.

 Kuyini okwenza kube lula ukuthi abantwana bakhululeke kakhulu ukuxoxa labosowabo ukwedlula abazali babo? Nanzi ezinye izizatho.

•   Isikolo. Nxa abantwana betshona ndawonye bacina sebengabangane futhi lokho kungenza bacine sebeqakathekisa okufunwa ngabangane babo ukwedlula okutshiwo ngabazali. Uhlupho lolo luba lukhulu kakhulu nxa abantwana sebekhulakhulile.

  Abantwana kumele baqakathekise okufunwa ngabazali babo ukwedlula lokho okufunwa ngabafunda labo

•   Ukungabi lesikhathi ndawonye. Ezimulini ezinengi abantwana bathola kungelamuntu endlini nxa bevela esikolo, lokhu kungabe kusenziwa yikuthi abazali bayabe besemsebenzini.

•   Okujayele ukwenziwa ngabasakhulayo. Abasakhulayo abanengi balendlela abagqoka ngayo, abakhuluma ngayo labenza ngayo ezinye izinto. Bacina sebeqakathekisa ukuthokozisa abangane babo ukwedlula abazali.

•   Abamabhizimusi. Izinto ezinengi ezenziwa ngabamabhizimusi zenzelwe abasakhulayo kuphela. Lokhu kwenza abazali labasakhulayo baqhelelane ngoba kulomehluko omkhulu phakathi kwezinto abazithandayo. UDr. Robert Epstein uthi: “Amakhampani amakhulu angavalwa nxa abasakhulayo bengekela ukuthenga izinto ezenziwa yiwo.” a

•   Woba ngumngane womntanakho.

   IBhayibhili lithi: “Imilayo le engikupha yona lamuhla kumele ibe sezinhliziyweni zenu. Igcizeleleni kubantwabenu. Khulumani ngayo nxa lihlezi emakhaya enu lanxa lihamba ezindleleni, nxa lilele phansi loba nxa livuka.”—UDutheronomi 6:6, 7.

   Kuhle ukuthi umntanakho abelabangane kodwa nguwe olomsebenzi wokumcebisa. Izingcitshi zithi abantwana abanengi bayabahlonipha abazali futhi bayafisa ukubathokozisa. Nxa ungaba ngumngane wabantwabakho, kuzaba lula ukuthi balalele wena ukwedlula osowabo.

   “Woba lesikhathi sokwenza imisebenzi etshiyeneyo labantwabakho enjengokupheka, ukuklina lokwenza umsebenzi wesikolo. Dlalani lonke, libukele amafilimu loba i-TV ndawonye. Lokhu lingakwenzi gqo kodwa hlalani likwenza!”—ULorraine.

•   Mtshele ukuthi angabi labangane abalingana laye kuphela.

   IBhayibhili lithi: “Ubuthutha bubotshelwe enhliziyweni yomntwana.”—IZaga 22:15.

   Abanye abazali bayathokoza ukubona abantwababo belabangane abanengi. Kuqakathekile ukuthi abazali bananzelele ukuthi abantwababo kabalabangane abalingana labo kuphela kodwa balabanye abadala kulabo. Phela osowabo ngeke babacebise ngendlela obungenza ngayo.

   “Abangane bomntanakho bangamnceda kwezinye izinto kodwa abakabi lolwazi olunengi ngempilo futhi abenelisi ukumnceda ukuthi enze izinqumo ezinhle empilweni. Abantwana abenza lokho abakutshelwa ngabazali bakhula kuhle.”—UNadia.

•   Mcebise.

   IBhayibhili lithi: “Ohamba lezihlakaniphi uyahlakanipha.”—IZaga 13:20.

   Njengoba abantwabakho belokhu bekhula, qhubeka usiba labo ngoba lokhu kuzabanceda kakhulu. Woba yisibonelo esihle kubo.

   “Abantwana bandise ukulingisela okwenziwa ngabazali. Nxa abantwana bebona okuhle okwenziwa ngabazali, bakhula bebathanda futhi bebahlonipha, khonokho kwenza bafise ukuba njengabo.”—UKatherine.