“Umusa wami omkhulu ukwenele ngoba nxa ubuthakathaka, kulapho engiveza khona amandla ami ngokugcweleyo.”—2 KwabaseKhorinte 12:9, INguqulo Yomhlaba Omutsha.

 “Umusa wami ukwanele; ngoba amandla ami apheleliswa ebuthakathakeni.”—2 KwabaseKhorinte 12:9, The Holy Bible in Ndebele.

 UNkulunkulu wathembisa umphostoli uPhawuli ukuthi uzamnika amandla awadingayo ukuze enelise ukumelana lobunzima ayekubo.

 “Umusa wami omkhulu ukwenele.” Impendulo uNkulunkulu ayinika uPhawuli ngemva kokuthandaza kanengi singayibeka langamazwi athi “umusa wami yiwo kuphela owudingayo.” Ngamanye amazwi, umusa kaNkulunkulu omkhulu wawenele ukuthi uncedise uPhawuli amelane lezilingo ayehlangana lazo. Njani? Ibala elihunyutshwa ngokuthi “umusa omkhulu” kumbe “umusa” litsho isipho samahala uNkulunkulu asipha sona ngesihle engakhangelelanga ukubhadalwa. Lokho okwabhalwa nguPhawuli kutshengisa ukuthi umusa omkhulu kaNkulunkulu wamnceda kakhulu. Lanxa wayeke wahlukuluza amaKhristu, uNkulunkulu wamnika amandla ayewadinga ukuze atshintshe impilo yakhe futhi ancedise labanye ukuthi babe ngamaKhristu. (1 KwabaseKhorinte 15:9, 10; 1 KuThimothi 1:12-14) Yikho uPhawuli wayengamthemba ngokupheleleyo uNkulunkulu ukuthi wayezamncedisa anqobe loba yiziphi inhlupho ayengahlangana lazo.

 “Ngoba nxa ubuthakathaka, kulapho engiveza khona amandla ami ngokugcweleyo.” INkosi uJehova a ikhumbuza uPhawuli ukuthi amandla ayo akhanya ikakhulu nxa ewasebenzisa ukuncedisa abantu ababuthakathaka. (2 KwabaseKhorinte 4:7; 12:8) Nxa amaKhristu enanzelela ukuthi kulokunye angenelisi ukukwenza futhi ethembela kuJehova ukuthi awancedise, ayabe evumela ukuthi amandla kaNkulunkulu asebenze kuwo ngokugcweleyo. (Kwabase-Efesu 3:16; KwabaseFiliphi 4:13) Ngaleyondlela amandla kaNkulunkulu ayabe esesebenza emuntwini obuthakathaka.

 UPhawuli wabhalela amaKhristu aseKhorinte incwadi phose ngo-55 C.E. Ekucineni kwencwadi le wachasisa ukuthi wayelelungelo lokuba ngumphostoli. Okwamfuqa ukuthi abhale lokhu yikuthi abanye abantu babemchothoza mhlawumbe ngenxa yendlela ayebukeka ngayo kumbe ayefundisa ngayo.—2 KwabaseKhorinte 10:7-10; 11:5, 6, 13; 12:11.

 Ngesikhathi uPhawuli ezivikela wachasisa ukuthi umsebenzi wenkonzo ayewenzile lokuqinisela ebunzimeni adlula kubo, kakwenzanga ngawakhe amandla. (2 KwabaseKhorinte 6:4; 11:23-27; 12:12) Esahlukweni 12, wafanisa ubunzima obabumzwisa ubuhlungu kumbe bumkhathaza ‘lameva asenyameni.’ (2 KwabaseKhorinte 12:7) Lanxa uPhawuli engazange atsho ukuthi kuyini sibisibili okwakumkhathaza, wayengathandabuzi ukuthi wayezenelisa ukuqinisela encediswa nguNkulunkulu.

 AmaKhristu kulezinsuku lawo ahlangana lobunzima lokuhlukuluzwa. Kodwa okuwaduduzayo yikwazi ukuthi uNkulunkulu angawanika amandla ukuze enelise ukumelana laloba yibuphi ubunzima ahlangana labo. NjengoPhawuli lathi singatsho singathandabuzi ukuthi: “Nxa ngibuthakathaka kulapho engilamandla khona.”—2 KwabaseKhorinte 12:10.

 Bukela ividiyo le emfitshane ukuze ubone okumunyethwe libhuku lesibili labaseKhorinte.