“Celani uxolo lazi ukuthi nginguNkulunkulu. Ngizadunyiswa phakathi kwezizwe, ngihlonitshwe emhlabeni.”—IHubo 46:10, INguqulo Yomhlaba Omutsha.

 “Thulani, lazi ukuba mina nginguNkulunkulu, ngiphakanyiswa phakathi kwezizwe, ngiphakanyiswa emhlabeni.”—IHubo 46:10, The Holy Bible in Ndebele.

 UNkulunkulu ukhuthaza wonke umuntu ukuthi amkhonze njalo akwazi ukuthi nguye yedwa olelungelo lokubusa. Wonke umuntu ofuna ukuphila kuze kube nini lanini kumele avume ukuthi uNkulunkulu unguSomandla.—ISambulo 4:11.

 “Celani uxolo lazi ukuthi nginguNkulunkulu.” Amanye amaBhayibhili ahumutsha umutsho othi “celani uxolo” ngokuthi “thulani.” Lokhu kubangele ukuthi abantu abanengi bacabange ukuthi lo ngumlayo wokuthi kumele bathule esontweni bangatsho lutho. Kodwa umutsho wesiHebheru ohunyutshwe ngokuthi “celani uxolo lazi ukuthi nginguNkulunkulu,” ngumlayo kaJehova a uNkulunkulu oya kubo bonke abantu. Ubakhuthaza ukuthi bangaphikisani laye kodwa bananzelele ukuthi nguye yedwa ofanele ukukhonzwa.

 Umlayo ofananayo uyatholakala lakuHubo 2. Esahlukweni lesi uNkulunkulu utshela labo abamphikisayo ukuthi uzabatshabalalisa. Kodwa labo abamlalelayo labamthembayo uyabaqondisa, abanike amandla lokuhlakanipha. Bonke “abaphephela kuye” bayathokoza futhi bazizwa bevikelekile ikakhulu nxa besebunzimeni.—IHubo 2:9-12.

 “Ngizadunyiswa phakathi kwezizwe, ngihlonitshwe emhlabeni.” UJehova uNkulunkulu wayesebenzisa amandla akhe ukuthi avikele abantu bakhe futhi lokhu kwakusenza ukuthi adunyiswe. (U-Eksodusi 15:1-3) Ngesikhathi esizayo uzadunyiswa kakhulu lapho bonke abantu emhlabeni sebekhonza yena futhi bemlalela.—IHubo 86:9, 10; U-Isaya 2:11.

 Elinye ibhuku elichasisa iBhayibhili lithi iHubo 46 “yingoma ekhuluma ngamandla kaNkulunkulu okuvikela abantu bakhe.” Ngesikhathi abantu bakaNkulunkulu behlabela amazwi akuHubo 46 babetshengisa ukuthi bayamthemba ukuthi uzabavikela njalo abancede. (IHubo 46:1, 2) Amazwi la ayebakhumbuza ukuthi uJehova uzahlala elabo.—IHubo 46:7, 11.

 Umhubi wabakhuthaza ukuthi bacabange ngemisebenzi kaJehova ukuze babe leqiniso lokuthi ulamandla okubavikela. (IHubo 46:8) UJehova uyenelisa ukuqeda izimpi. (IHubo 46:9) Phela ngesikhathi sama-Israyeli uJehova wayevikela abantu bakhe ezitheni zabo ngokuqeda impi. IBhayibhili lisithembisa ukuthi sekuseduze ukuthi uNkulunkulu avikele abantu bakhe ngokuqeda izimpi emhlabeni wonke.—U-Isaya 2:4.

 UJehova ulokhe esabancedisa yini labo abamkhonzayo lamuhla? Ye, ngoba umphostoli uPhawuli wakhuthaza amaKhristu ukuthi athembele kuJehova. (UHebheru 13:6) Amazwi akuHubo 46 enza singathandabuzi ukuthi uNkulunkulu ulamandla okusivikela. Asikhumbuza ukuthi uNkulunkulu “ungamandla ethu lendawo yethu yokucatsha.”—IHubo 46:1.

 Bukela ividiyo le emfitshane ukuze ubone okumunyethwe libhuku lamaHubo.