“Themba uJehova ngenhliziyo yakho yonke, ungathembi okwakho ukuzwisisa. Mdinge kuzo zonke izindlela zakho, yena uzaqondisa izindlela zakho.”—IZaga 3:5, 6, INguqulo Yomhlaba Omutsha.

 ‘Themba eNkosini ngayo yonke inhliziyo yakho, ungathembi okwakho ukuzwisisa. Ivume endleleni zakho zonke, izaqondisa imikhondo yakho yonke.’—IZaga 3:5, 6, The Holy Bible in Ndebele.

 Kumele sicele uJehova a uNkulunkulu ukuthi asincedise nxa sisenza izinqumo kulokuthi sizenzele sisodwa.

 “Themba uJehova ngenhliziyo yakho yonke.” Siyabe simthemba uNkulunkulu nxa singenza izinto ngendlela yakhe njalo kumele simthembe ngenhliziyo yonke. Nxa iBhayibhili likhuluma ngenhliziyo liyabe lisitsho ingaphakathi yomuntu ehlanganisa imicabango yakhe, inhloso zakhe lendlela azizwa ngayo. Ukuthemba uNkulunkulu ngenhliziyo yonke akupheleli endleleni esizizwa ngayo kuphela. Kodwa kutsho ukungathandabuzi lakancane ukuthi yena wazi ngcono kulathi ngoba unguMdali wethu.—KwabaseRoma 12:1.

 “Ungathembi okwakho ukuzwisisa.” Akumelanga sizithembe ngoba singabantu abalesono, yikho kuqakathekile ukuthi sithembe uNkulunkulu. Nxa singazithemba kumbe senze izinqumo silandela indlela esizizwa ngayo, singacina senze izinqumo ezingakhanya zizinhle ekuqaliseni kodwa zibe lesiphetho esibi. (IZaga 14:12; UJeremiya 17:9) UNkulunkulu ulenhlakanipho enkulu kakhulu kuleyethu. (U-Isaya 55:8, 9) Yikho sizaphumelela nxa singamvumela ukuthi asiqondise.—IHubo 1:1-3; IZaga 2:6-9; 16:20.

 “Mdinge kuzo zonke izindlela zakho.” Kumele sibekwazi ukuthi uNkulunkulu uthini ngezinto esizenzayo empilweni okugoqela lezinqumo zethu. Lokhu singakwenza ngokuthandaza kuye simcela ukuthi asiqondise futhi sizimisele ukusebenzisa lokho asitshela khona eLizwini lakhe iBhayibhili.—IHubo 25:4; 2 KuThimothi 3:16, 17.

 “Yena uzaqondisa izindlela zakho.” UNkulunkulu wenza izindlela zethu ziqonde ngokusincedisa ukuthi siphile silandela imithetho yakhe. (IZaga 11:5) Nxa singakwenza lokhu asisoze senze amaphutha esizazisola ngawo futhi sizathokoza empilweni.—IHubo 19:7, 8; U-Isaya 48:17, 18.

 Ibhuku leZaga lilezimiso ezingasinceda ukuthi sithokoze empilweni futhi sithokozise loJehova. Izahluko ezingu-9 zokuqala zibhalwe angathi ngubaba oweluleka indodana yakhe. Isahluko 3 sisitshela ukuthi labo abasebenzisa inhlakanipho yoMdali wethu bancedakala njani.—IZaga 3:13-26.