“Ilizwi likaNkulunkulu liyaphila njalo lilamandla, libukhali ukwedlula loba yiphi inkemba esika inxa zombili futhi lihlaba lize lehlukanise umphefumulo lomoya, amathambo lomnkantsho njalo liyenelisa ukuveza imicabango lenhloso zenhliziyo.”—KumaHebheru 4:12, INguqulo Yomhlaba Omutsha.

 “Ilizwi likaNkulunkulu liyaphila njalo liyasebenza. Libukhali kulenkemba esika inxa zombili, ingena ize yehlukanise umphefumulo lomoya, amalunga lomnkantsho; lahlulela imicabango lomumo wenhliziyo.”—KumaHebheru 4:12, Holy Bible in Ndebele.

 Umlayezo uNkulunkulu awubhalela abantu oseBhayibhilini ulamandla okuveza imicabango kanye lenhloso zethu. Uyenelisa lokutshintsha impilo zabantu.

 “Ilizwi likaNkulunkulu liyaphila.” Umutsho othi “ilizwi likaNkulunkulu” utsho izithembiso zikaNkulunkulu kumbe lokho ahlose ukukwenza okutholakala eBhayibhilini. a Okunye okuqakathekileyo okuhloswe nguNkulunkulu yikuthi abantu abamlalelayo baphile emhlabeni kuze kube nini lanini belokuthula futhi bemanyene.—UGenesisi 1:28; IHubo 37:29; ISambulo 21:3, 4.

 Manje kutshoni ukuthi ilizwi likaNkulunkulu “liyaphila”? Okwenza kuthiwe liyaphila yikuthi nxa abantu bangalikholwa baba lethemba njalo baphile impilo ethokozisayo. (UDutheronomi 30:14; 32:47) Izithembiso zikaNkulunkulu eziselizwini lakhe lazo ‘ziyaphila’ ngenxa yokuthi uNkulunkulu ulokhe esebenza ukuze abe leqiniso lokuthi ziyagcwaliseka. (UJohane 5:17) UNkulunkulu kafanani labantu, kathembisi abesekhohlwa kumbe ayekele ukugcwalisa isithembiso sakhe nxa angabona angani kasenelisi ukwenza njalo. (AmaNani 23:19) ‘Ilizwi eliphuma emlonyeni wakhe kalisoze liphenduke kuye lingafezanga lutho.’—U-Isaya 55:10, 11.

 ‘Ilizwi likaNkulunkulu lilamandla.’ Ibala elithi “lilamandla” lingahunyutshwa ngokuthi “liyasebenza” kumbe ngokuthi “lingenza loba yini elihloselwe ukuyiyenza.” Ngakho loba yini uJehova b uNkulunkulu ayitshoyo kumbe ayithembisayo iyagcwaliseka loba sekutheni. (IHubo 135:6; U-Isaya 46:10) UNkulunkulu angagcwalisa izithembiso zakhe ngendlela esiyabe singayicabangeli.—Kwabase-Efesu 3:20. c

 Okunye okwenza ilizwi likaNkulunkulu ‘libe lamandla’ yikuthi liyenelisa ukunceda labo abalisebenzisayo ukuthi batshintshe ubuntu babo kanye lendlela abaphila ngayo. Lokho abakufunda eBhayibhilini kuyatshintsha indlela abaphila ngayo, abacabanga ngayo kanye lalokho abahlele ukukwenza. (KwabaseRoma 12:2; Kwabase-Efesu 4:24) ‘Ilizwi likaNkulunkulu liyabe selisebenza kubo’ ngoba bayabe sebelamukele njalo sebekholwa ukuthi livela kuNkulunkulu.—1 KwabaseThesalonika 2:13.

 ‘Ilizwi likaNkulunkulu libukhali ukwedlula loba yiphi inkemba esika inxa zombili.’ Ilizwi likaNkulunkulu lifaniswa lenkemba ebukhali ukwedlula loba yiphi ngoba lilamandla okuthinta inhliziyo yomuntu, okutsho lokho ayikho ngaphakathi. Akulalutho olungakhulunywa ngumuntu olungafika enhliziyweni ngendlela iBhayibhili elenza ngayo. Lokhu kukhanya emazwini alandelayo akuHebheru 4:12.

 ‘Ilizwi likaNkulunkulu lihlaba lize lehlukanise umphefumulo lomoya, amathambo lomnkantsho.’ Nxa iBhayibhili likhuluma ‘ngomphefumulo’ liyabe lisitsho lokho umuntu ayikho ngaphandle ikanti nxa likhuluma ‘ngomoya’ liyabe lisitsho lokho ayikho ngaphakathi. (KwabaseGalathiya 6:18) Yikho singathi “ilizwi likaNkulunkulu” lilamandla okufika ‘lasemnkatshweni’ okutsho imizwa yethu kanye lemicabango ejulileyo. Akulamuntu ongenelisa ukubona lokho esiyikho ngaphakathi kodwa lokho uJehova asifundisa khona kulamandla okuveza lokho esiyikho ngaphakathi besekusifuqa ukuthi sitshintshe indlela esiphila ngayo. Utshintsho esilwenzayo luthokozisa uMdali wethu luphinde lusithokozise lathi.

 ‘Ilizwi likaNkulunkulu liyenelisa ukuveza imicabango lenhloso zenhliziyo.’ Indlela umuntu enza ngayo nxa esezwe ilizwi likaNkulunkulu yiyo eveza imicabango yakhe kanye lenhloso zakhe, okuyikho okumfuqa ukuthi aziphathe ngendlela ethile. Ngokwesibonelo, nxa umuntu angalalela lokho okutshiwo lilizwi likaNkulunkulu abesetshintsha impilo yakhe kuyabe kukhanya ukuthi uthobekile futhi uyafuna ukuthokozisa uMdali wakhe. Kodwa lowo ongafuniyo ukusebenzisa lokho elikutshoyo uyabe etshengisa ukuthi uyazigqaja lokuthi ufuna ukuzenzela umathanda kafuni ukutshelwa. Uyabe ecatsha ngomunwe nje kuphela ukuze aqhubeke esenza izinto ezingathokozisi uNkulunkulu.—UJeremiya 17:9; KwabaseRoma 1:24-27.

 Elinye ibhuku elichasisa iBhayibhili lithi ilizwi likaNkulunkulu “lilamandla okufika ngitsho lasekujuleni kwenhliziyo.” UNkulunkulu uyenelisa ukubona konke okungaphakathi kwethu yikho ilizwi lakhe liyenelisa ukukuveza egcekeni. Phela uHebheru 4:13 uthi: “Akulanto edaliweyo efihlakeleyo phambi kwakhe, kodwa zonke izinto ziyakhanya futhi zisegcekeni emehlweni alowo okumele silandise kuye.”

 Umphostoli uPhawuli nguye owabhala ibhuku lamaHebheru phose ngabo-61 C.E. Incwadi le ephefumulelweyo wayeyibhalela amaKhristu angamaJuda ayehlala eJerusalema laseJudiya.

 Kusahluko 3 lo-4 uPhawuli uxwayisa amaKhristu esebenzisa isibonelo salokho okwenziwa ngama-Israyeli. (KumaHebheru 3:8-12; 4:11) UJehova wayethembise abako-Israyeli ukubakhulula ebugqilini abase elizweni ‘ababezahlala kulo bevikelekile.’ (UDutheronomi 12:9, 10) Kodwa izizukulwane zama-Israyeli ezaphuma eGibhithe zatshengisa kanenginengi ukuthi azilakholo ezithembisweni zikaNkulunkulu ngokungalaleli imilayo yakhe. Lokhu kwabangela ukuthi ‘zingangeni ekuphumuleni kukaNkulunkulu’ lokuthi uNkulunkulu abalahle abako-Israyeli. Bonke nje bafela enkangala. Lanxa izizukulwane zabo zangena eLizweni Lesithembiso, okudanisayo yikuthi lazo zaqalisa ukungamlaleli uNkulunkulu. Lokhu kwabangela ukuthi isizwe sonke sama-Israyeli sithwale amagamba avuzayo.—UNehemiya 9:29, 30; IHubo 95:9-11; ULukha 13:34, 35.

 Yikho uPhawuli uxwayisa amaKhristu ukuthi angenzi lokho okwenziwa ngama-Israyeli ayengathembekanga. Lathi singangena ekuphumuleni kukaNkulunkulu ngokulalela ilizwi lakhe langokuba lokholo ezithembisweni zakhe.—KumaHebheru 4:1-3, 11.

 Bukela ividiyo le emfitshane ukuze ubone okumunyethwe libhuku lamaHebheru.