“Ngilamandla okwenza zonke izinto ngenxa yalowo ongipha amandla.”—KwabaseFiliphi 4:13, INguqulo Yomhlaba Omutsha.

 “Ngingakwenza konke ngoKristu engiqinisa.”—KwabaseFiliphi 4:13, TBS.

 Umphostoli uPhawuli nguye owabhala amazwi la ukuze aqinisekise labo abakhonza uNkulunkulu ukuthi bazakwamukela amandla azabanceda ukuthi benze intando kaNkulunkulu.

 Amanye amaBhayibhili athi uKhristu nguye owayesipha uPhawuli amandla. Kodwa ibala elithi “Khristu” alikho evesini le emibhalweni yesiGrikhi yakudala. Yikho amaBhayibhili amanengi lamuhla esithi “yalowo ongipha amandla” (INguqulo Yomhlaba Omutsha), “onginika amandla” (Holy Bible in Ndebele), loba “ongiqinisayo” (The Holy Bible in Ndebele). Manje uPhawuli wayekhuluma ngobani?

 Amanye amavesi atshengisa ukuthi uPhawuli wayekhuluma ngoNkulunkulu. (KwabaseFiliphi 4:6, 7, 10) Encwadini efananayo, uPhawuli watshela abaseFiliphi wathi: ‘Kuyamthokozisa uNkulunkulu ukuliqinisa lokulipha amandla.’ (KwabaseFiliphi 2:13) Ku-2 Khorinte 4:7 wathi uNkulunkulu nguye owayemnika amandla okwenza inkonzo yakhe. (Khangela lo-2 KuThimothi 1:8.) Yikho singaphetha ngokuthi uPhawuli wayekhuluma ngoNkulunkulu ngesikhathi esithi ‘lowo ongipha amandla.’

 Wayesitshoni uPhawuli ngesikhathi esithi wayezaphiwa amandla “okwenza zonke izinto”? Kungenzeka ukuthi izinto uPhawuli ayekhuluma ngazo kwakuyizimo ezitshiyeneyo ayesiba kuzo ngesikhathi esenza umsebenzi kaNkulunkulu. Wayethembela kuNkulunkulu esazi ukuthi wayezamnakekela kungelani lokuthi izimo zazinjani futhi lokhu kwakumenza asuthiseke.—2 KwabaseKhorinte 11:23-27; KwabaseFiliphi 4:11.

 Amazwi kaPhawuli ayabakhuthaza kakhulu labo abakhonza uNkulunkulu lamuhla ngoba abenza baqiniseke ukuthi uzabanika amandla okumelana lobunzima lawokwenza intando yakhe. Angabaqinisa esebenzisa umoya wakhe ongcwele, iLizwi lakhe iBhayibhili kanye labazalwane.—ULuka 11:13; KumaHebheru 4:12; ImiSebenzi 14:21, 22.

 Amazwi la atholakala esahlukweni sokucina sencwadi uPhawuli ayibhalela abaseFiliphi. Incwadi le wayibhala ngabo-60 kusiya ku-61 C.E ngesikhathi ebotshwe okokuqala eRoma. Okwesikhathi esithile, amaKhristu aseFiliphi ayengenelisi ukuncedisa uPhawuli ngezinto ayezidinga kodwa ngesikhathi ewabhalela incwadi le ayesemthumela lokho ayekudinga ukuze amncedise.—KwabaseFiliphi 4:10, 14.

 UPhawuli wawancoma kakhulu amaKhristu aseFiliphi ngokuphana kwawo futhi wawaqinisekisa ukuthi wayelakho konke ayekudinga. (KwabaseFiliphi 4:18) Waphinda wasebenzisa ithuba lelo ukuthi awatshele ngenye into eqakathekileyo eyayizawanceda: Wonke amaKhristu kungelani lokuthi anothile kumbe angabayanga, angasuthiseka njalo athokoze nxa angathembela kuNkulunkulu.—KwabaseFiliphi 4:12.