UKUCHASISWA KWAMAVESI ASEBHAYIBHILINI

KwabaseRoma 10:13—“Loba Ngubani Ozabiza Ibizo LeNkosi Uzasindiswa”

KHALISA

“Wonke umuntu obiza ibizo likaJehova uzasindiswa.”—KwabaseRoma 10:13, INguqulo Yomhlaba Omutsha.

“Loba ngubani ozabiza ibizo leNkosi uzasindiswa.”—KwabaseRoma 10:13, TBS.

Okutshiwo nguRoma 10:13

UNkulunkulu kakhethi, ufuna bonke abantu basindiswe ukuze bathole ukuphila okungapheliyo kungelani lokuthi bangumhlobo bani, bavela kuliphi ilizwe kumbe ukuthi banothile yini loba hatshi. Kodwa nxa sifuna ukusindiswa kumele sibize ibizo likaNkulunkulu uSomandla elithi Jehova. a—IHubo 83:18.

Nxa kukhulunywa ‘ngokubiza ibizo likaJehova’ eBhayibhilini akutsho ukulazi nje kuphela kumbe ukulisebenzisa ekukhonzeni. (IHubo 116:12-14) Kodwa kutsho lokumthemba ngenhliziyo yonke siqiniseka ukuthi uzasincedisa.—IHubo 20:7; 99:6.

UJesu Khristu wayeliqakathekisa ibizo likaNkulunkulu. Ngokwesibonelo ngesikhathi efundisa abafundi bakhe ukuthandaza wathi: “Baba wethu osezulwini, kalingcweliswe ibizo lakho,” kumbe lenziwe libengcwele. (UMathewu 6:9) Waphinda wathi kumele simazi, simhloniphe futhi simthande uJehova nxa sifuna ukuthola ukuphila okungapheliyo.—UJohane 17:3, 6, 26.

Kwamanye amaBhayibhili kusetshenziswe ibala elithi ‘Nkosi’ kuRoma 10:13. Kungani sisithi uJehova nguye iNkosi okukhulunywa ngayo evesini le? Lokhu kungenxa yokuthi amazwi akhona athethwe kuJoweli 2:32 lapho okusetshenziswe khona ibizo likaNkulunkulu elithi Jehova hatshi elokuhlonipha elithi ‘Nkosi.’ b

Amanye amavesi asinceda sizwisise uRoma 10:13

KuRoma isahluko 10, iBhayibhili likwenza kucace ukuthi nxa umuntu efuna ukuba ngumngane kaNkulunkulu kumele abe lokholo kuJesu Khristu. (KwabaseRoma 10:9) Iqiniso leli liyacaciswa langamanye amavesi atholakala kuThestamenti Elidala. Enye indlela umuntu atshengisa ngayo ukuthi ulokholo yikutshela abanye izindaba ezinhle zensindiso. Lokhu kwenza labo abatshunyayezwayo babelethuba lokuthi labo babe lokholo ukuze bathole ukuphila okungapheliyo.—KwabaseRoma 10:10, 14, 15, 17.

Bala uRoma isahluko 10 ku-Nguqulo Yomhlaba Omutsha yokutaditsha etholakala ngesiNgisi. IBhayibhili leli libhalwe ngendlela elula, lilemicijo echasisa amavesi, lilamapikitsha, liyakulayela kwamanye amavesi, lilamavidiyo lamamephu njalo ungakhetha ukulalela elirekhodiweyo.

a Ibizo likaNkulunkulu litholakala izikhathi ezingaba ngu-7 000 emibhalweni yakudala. EMibhalweni yesiHebheru limelwa ngongwaqa abane ababizwa ngokuthi yi-Tetragrammaton. NgesiNdebele ibizo likaNkulunkulu lihunyutshwa ngokuthi “Jehova.” Abanye balibiza ngokuthi “Yahweh.”

b Kukhanya angani abalobi beMibhalo yesiGrikhi babesebenzisa ibizo liNkulunkulu nxa becupha amazwi alebizo lelo eMibhalweni yesiHebheru eyaziwa ngokuthi liThestamenti Elidala. I-The Anchor Bible Dictionary ithi: “Kulobufakazi obutshengisa ukuthi i-Tetragrammaton emela ibizo likaYahweh yayitholakala phose kuwo wonke amavesi akuThestamenti Elitsha ayethethwe kuThestamenti Elidala.” (Volume 6, ikhasi 392) Ukuze uthole okunengi bala iSengezo A5 esilesihloko esithi “Ibizo LikaNkulunkulu EMibhalweni YamaKhristu YesiGrikhi” ku-Nguqulo Yomhlaba Omutsha YeMibhalo Engcwele. ISengezo C2 esiseBhayibhilini lokutaditsha lesiNgisi siloluhlu lwamaBhayibhili atshiyeneyo asebenzisa ibizo likaNkulunkulu kuRoma 10:13.