“Hlonipha uyihlo lonyoko ukuze uphile isikhathi eside elizweni uJehova uNkulunkulu wakho akupha lona.”—U-Eksodusi 20:12, INguqulo Yomhlaba Omutsha.

 “Hlonipha uyihlo lonyoko, ukuze zibe zinengi insuku zokuhamba kwakho elizweni ekunika lona iNkosi uNkulunkulu wakho.”—U-Eksodusi 20:12, The Holy Bible in Ndebele.

 UNkulunkulu wanika abako-Israyeli umlayo wokuthi bahloniphe abazali babo. Wabatshela ukuthi nxa bangenza njalo, bazaphila isikhathi eside. Lanxa amaKhristu engasekho ngaphansi koMthetho kaMosi uNkulunkulu kakatshintshi, ulokhu ekhangelele ukuthi silalele abazali bethu ngoba le yinto eqondileyo okumele siyenze.—KwabaseKholose 3:20.

 Kungelani lokuthi abantwana sebekhule kangakanani, kumele bahloniphe abazali babo ngokubalalela. (ULevi 19:3; IZaga 1:8) Lanxa abantwana sebelezimuli zabo kumele baqhubeke bebathanda futhi bebanakekela abazali babo. Ngokwesibonelo, kumele babe leqiniso lokuthi bayabanakekela lanxa sebegugile ngokubanika abayidingayo.—UMathewu 15:4-6; 1 KuThimothi 5:4, 8.

 Abantwana abangama-Israyeli kwakumele bahloniphe oyise labonina. Lokhu kwakutshengisa ukuthi umama uqakathekile emulini. (IZaga 6:20; 19:26) Lalamuhla abantwana bakhangelelwe ukuthi benze okufananayo.

 Kodwa kulalapho abantwana okungakhangelelwanga ukuthi balalele abazali babo. Abantwana abangama-Israyeli kwakungamelanga balalele abazali babo kumbe omunye umuntu nxa kuyikuthi akukhulumayo kuphikisana lalakho okutshiwo nguNkulunkulu. (UDutheronomi 13:6-8) Lalamuhla amaKhristu ‘alalela uNkulunkulu umbusi kulokuthi alalele abantu.’—ImiSebenzi 5:29.

 EMthethweni uNkulunkulu ayewunike ama-Israyeli wathembisa abantwana ukuthi nxa bangahlonipha abazali babo ‘bazaphila isikhathi eside njalo baphumelele’ elizweni ayebanike lona. (UDutheronomi 5:16) Babezajeziswa nxa bangayekela ukulalela umthetho kaNkulunkulu njalo bedelela abazali babo. (UDutheronomi 21:18-21) Ukulalela abazali bethu kulokhu kuqakathekile lalamuhla. (Kwabase-Efesu 6:1-3) Kungelani lokuthi sibadala kumbe sibancane, uMdali wethu yikho akhangelele ukuthi sikwenze. Nxa singalalela abazali bethu siyabe silalela uNkulunkulu futhi sizaphila isikhathi eside sibe lethemba lokuthola ukuphila okungapheliyo.—1 KuThimothi 4:8; 6:18, 19.

 Kulesifundo esiqakathekileyo esisitholayo nxa singakhangela ukuthi umlayo oku-Eksodusi 20:12 ngowesingaki eMthethweni Elitshumi. (U-Eksodusi 20:1-17) Amavesi andulela uvesi 12 atshengisa ukuthi ama-Israyeli kwakumele akhonze uNkulunkulu kuphela. Ikanti amavesi 13 kusiya ku-17 wona alemilayo etshengisa ukuthi kwakumele aphile njani labanye abantu. Kwakungamelanga atshontshe futhi abatshadileyo kwakumele bathembeke komunye lomunye. Yikho umlayo othi “hlonipha uyihlo lonyoko” uyihlanganisa kuhle imilayo leyo ekhuluma ngokukhonza uNkulunkulu laleyo ekhuluma ngokuhlalisana kuhle labanye.