UKUCHASISWA KWAMAVESI ASEBHAYIBHILINI

U-Isaya 41:10—“Ungesabi, Ngoba Mina Ngilawe”

KHALISA

“Ungesabi ngoba ngilawe. Ungakhathazeki ngoba nginguNkulunkulu wakho. Ngizakuqinisa, ngikuncede. Ngizakubamba ngesandla sami sokudla esilungileyo.’”—U-Isaya 41:10, INguqulo Yomhlaba Omutsha.

“Ungesabi, ngoba mina ngilawe, ungapheli amandla, ngoba mina nginguNkulunkulu wakho; ngizakukuqinisa, ngikusize, ngikusekele ngesandla sami sokunene esinqobayo.”—U-Isaya 41:10, The Holy Bible in Ndebele.

Okutshiwo ngu-Isaya 41:10

UJehova a uNkulunkulu uqinisekisa labo abamkhonza bethembekile ukuthi uzabancedisa kuloba yibuphi ubunzima obubehlelayo.

“Ngilawe.” UJehova utshela labo abamkhonzayo ukuthi akumelanga besabe ngoba ababodwa. Kuyabe kungani ulabo khonapho eceleni kwabo ngoba uyakubona konke okwenzakala kubo njalo uyayizwa imithandazo yabo.—IHubo 34:15; 1 UPhetro 3:12.

“NginguNkulunkulu wakho.” UJehova ukhumbuza labo abamkhonzayo ukuthi uzahlala enguNkulunkulu wabo kungelani lokuthi bakuziphi izimo futhi lokhu kwenza bahlaliseke. Kumele bangathandabuzi ukuthi akulalutho olungavimba uNkulunkulu ukuthi abancedise.—IHubo 118:6; KwabaseRoma 8:32; KumaHebheru 13:6.

“Ngizakuqinisa, ngikuncede. Ngizakubamba ngesandla sami sokudla esilungileyo.” UJehova usebenzisa imitsho emithathu elomqondo ohambelanayo ukuze agcizelele ukuthi uzahlala ebasekela abantu bakhe loba sekutheni. Uphinda athi usibambe ngesandla sakhe sokudla ukuze atshengise lokho akwenzayo nxa abantu bakhe bedinga uncedo. Nxa omunye wabo engawa, uNkulunkulu uyamphakamisa ngesandla sakhe sokudla.—U-Isaya 41:13.

Indlela uNkulunkulu ayisebenzisa kakhulu ukuthi aqinise njalo asekele labo abamkhonzayo liLizwi lakhe iBhayibhili. (UJoshuwa 1:8; KumaHebheru 4:12) Ngokwesibonelo, iLizwi lakhe lilamacebo asincedayo nxa sihlaselwe yibuyanga, sigula kumbe sifelwe. (IZaga 2:6, 7) Kanti njalo uNkulunkulu usebenzisa lomoya wakhe ongcwele ukuze asincedise ukuthi sihlaliseke lokuthi siqinisele nxa sisebunzimeni.—U-Isaya 40:29; ULukha 11:13.

Amanye amavesi asinceda sizwisise u-Isaya 41:10

Amazwi la ayeduduza amaJuda ayethembekile acina ehanjiswe eBhabhiloni. UJehova wayetshilo ukuthi nxa amaJuda esezakhululwa ekuthunjweni kwakuzakuba lemibiko yokuthi isitha sasesizahlasela iBhabhiloni lezinye izizwe ezaziseduzane layo. (U-Isaya 41:2-4; 44:1-4) Imibiko le yenza abantu abanengi besaba kodwa amaJuda wona kwakungamelanga esabe ngoba uJehova wayezawavikela. Kathathu konke uJehova wawaqinisekisa ngamazwi athi “ungesabi.”—U-Isaya 41:5, 6, 10, 13, 14.

Lanxa amazwi aku-Isaya 41:10 ayeqondiswe kumaJuda ayethunjiwe eBhabhiloni, uJehova uNkulunkulu waba leqiniso lokuthi ayagcinwa ukuze aduduze bonke abamkhonzayo. (U-Isaya 40:8; KwabaseRoma 15:4) Uyabanceda labo abamkhonzayo njengoba nje wayesenza kudala ezincekwini zakhe.

Bala u-Isaya isahluko 41 ku-Nguqulo Yomhlaba Omutsha yokutaditsha etholakala ngesiNgisi. IBhayibhili leli libhalwe ngendlela elula, lilemicijo echasisa amavesi, lilamapikitsha, liyakulayela kwamanye amavesi, lilamavidiyo lamamephu njalo ungakhetha ukulalela elirekhodiweyo.

a UJehova libizo likaNkulunkulu.—IHubo 83:18.