UKUCHASISWA KWAMAVESI ASEBHAYIBHILINI
U-Isaya 42:8—“NgiyiNKOSI”
“NginguJehova. Leli yilo ibizo lami, inkazimulo yami ngeke ngiyinike omunye, lodumo lwami ngeke ngilunike izithombe ezibaziweyo.”—U-Isaya 42:8, INguqulo Yomhlaba Omutsha.
“NgiyiNKOSI, lelo libizo lami; lodumo lwami kangiyikulunika omunye, kumbe indumiso yami ezithombeni ezibaziweyo.”—U-Isaya 42:8, TBS.
Okutshiwo ngu-Isaya 42:8
UNkulunkulu usitshela ibizo lakhe lokuthi udumo lwakhe kaluniki izithombe.
UNkulunkulu wazinika ibizo elihunyutshwa ngokuthi “Jehova” ngesiNdebele. a (U-Eksodusi 3:14, 15) Lanxa ibizo likaNkulunkulu litholakala izikhathi ezingaba ngu-7 000 kuThestamenti Elidala (iMibhalo yesiHebheru leyesi-Aramu), abahumutshi abanengi bamaBhayibhili bayalikhipha ibizo leli bafake elithi “NKOSI” (libhalwe ngamabala amakhulu). Ngokwesibonelo, kuHubo 110:1 kukhulunywa ngoJehova langoJesu. Ku-TBS ivesi le ithi: “INKOSI [uJehova] yathi eNkosini yami [uJesu].” (ImiSebenzi 2:34-36) INguqulo Yomhlaba Omutsha ihunyutshwe ngendlela ecacileyo ngoba ihle itsho ukuthi iNkosi okukhulunywa ngayo ngubani. Ithi: “UJehova wathi eNkosini yami: ‘Hlala esandleni sami sokudla, ngize ngenze izitha zakho zibe yisenabelo senyawo zakho.’”
Izikhwicamfundo ezinengi ezihlola ngeBhayibhili zithi ibizo likaNkulunkulu lingabe lisitsho ukuthi “Wenza Ukuthi Kube Khona.” NguNkulunkulu weqiniso kuphela ongenza lokho okutshiwo libizo lakhe ngoba nguye yedwa ongenza ukuthi inhloso yakhe igcwaliseke futhi angasebenzisa izinto azidalileyo ukuthi ziyigcwalise.
Kumele sikhonze uJehova kuphela ngenxa yokuthi nguMdali wethu njalo nguNkulunkulu weqiniso. Akula omunye umuntu kumbe olunye ulutho okumele silukhonze, ngitsho lezithombe.—U-Eksodusi 20:2-6; 34:14; 1 UJohane 5:21.
Amanye amavesi asinceda sizwisise u-Isaya 42:8
Emavesini okuqala akusahluko 42 sika-Isaya, uJehova ukhuluma ngalokho okuzakwenziwa ‘ngokhethiweyo wakhe.’ Uthi inceku le ayamukelayo ‘izaletha ukulunga ezizweni.’ (U-Isaya 42:1) Mayelana lesithembiso leso uNkulunkulu wathi: “Khathesi sengimemezela izinto ezintsha. Ngikutshela ngazo zingakenzakali.” (U-Isaya 42:9) Isiphrofetho esimayelana ‘lokhethiweyo’ sagcwaliseka ngemva kweminyaka eminengi uMesiya kumbe uKhristu ebuyile emhlabeni futhi wenza inkonzo yakhe.—UMathewu 3:16, 17; 12:15-21.
Indlela U-Isaya 42:8 Ahunyutshwe Ngayo Kwamanye AmaBhayibhili
“Mina nginguJehova, lelo yilo ibizo lami! Ubukhosi bami angiyikubunika omunye loba nginike izithombe udumo lwami.”—Holy Bible in Ndebele.
a Ibizo likaNkulunkulu ngesiHebheru limelwa ngongwaqa abane abajayele ukubhalwa ngokuthi YHWH ngesiNgisi. Amanye amaBhayibhili esiNgisi asebenzisa elithi “Yahweh.” Ukuze uthole okunengi, bala isihloko esithi “Ibizo LikaNkulunkulu EMibhalweni YesiHebheru” esikuSengezo A4 ku-Nguqulo Yomhlaba Omutsha YeMibhalo Engcwele.
Nanku Okunye
ESSENTIAL BIBLE TEACHINGS
UNkulunkulu Ulebizo Yini?
UNkulunkulu ulamabizo okuhlonipha amanengi agoqela elithi Somandla, Mdali lelithi Nkosi. Kodwa ibizo likaNkulunkulu litholakala izikhathi ezingaba ngu-7 000 eBhayibhilini
IMIBUZO YEBHAYIBHILI IYAPHENDULWA
UNkulunkulu Ulamabizo Amangaki?
Abanye abantu bacabanga ukuthi uNkulunkulu ulamabizo amanengi. Bathi ngu-Allah, u-El Shaddai, uJehova-Jire kumbe u-Alfa lo-Omega. Kulendaba yini ukuthi simbiza sisithini uNkulunkulu?
UKUCHASISWA KWAMAVESI ASEBHAYIBHILINI
Ukuchasiswa KukaRoma 10:13—“Loba Ngubani Ozabiza Ibizo LeNkosi Uzasindiswa”
UNkulunkulu ufuna bonke abantu basindiswe ukuze bathole ukuphila okungapheliyo kungelani lokuthi bangumhlobo bani, bavela kuliphi ilizwe kumbe ukuthi banothile yini loba hatshi.
OKUFUNDISWA LIBHAYIBHILI
Amathuluzi Okutaditsha IBhayibhili
Khetha amathuluzi okutaditsha iBhayibhili azakwenza ukuthi uzwisise iBhayibhili futhi ukholise ukulibala.
