UKUCHASISWA KWAMAVESI ASEBHAYIBHILINI

UGenesisi 1:1—“Ekuqaleni UNkulunkulu Wadala Amazulu Lomhlaba”

KHALISA

“Ekuqaleni uNkulunkulu wadala amazulu lomhlaba.”—UGenesisi 1:1, INguqulo Yomhlaba Omutsha.

“Ekuqaleni uNkulunkulu wadala izulu lomhlaba.”—UGenesisi 1:1, The Holy Bible in Ndebele.

Okutshiwo nguGenesisi 1:1

Amazwi la okuqala aseBhayibhilini asitshela izinto ezimbili eziqakathekileyo. Okokuqala asifundisa ukuthi “amazulu lomhlaba” kwaba lesiqalo. Okwesibili asitshengisa ukuthi izinto lezi zadalwa nguNkulunkulu.—ISambulo 4:11.

IBhayibhili kalisitsheli ukuthi uNkulunkulu wawadala nini amazulu lomhlaba njalo kalichasisi ukuthi wawadala njani. Kodwa likwenza kucace ukuthi wadala amazulu lomhlaba esebenzisa ‘amandla akhe amakhulu lamandla akhe amangalisayo.’—U-Isaya 40:26.

Ibala lesiHebheru elihunyutshwe ngokuthi “wadala” lisetshenziswa kuphela nxa kukhulunywa ngento eyenziwa nguNkulunkulu. IBhayibhili likwenza kucace ukuthi nguJehova a uNkulunkulu kuphela onguMdali.—U-Isaya 42:5; 45:18.

Amanye amavesi asinceda sizwisise uGenesisi 1:1

Ivesi yokuqala yebhuku likaGenesisi yethula kuhle indaba yokudalwa kwezinto etholakala kuGenesisi isahluko 1 lo-2. Kusukela kuGenesisi 1:1 kusiya kusahluko 2:4, iBhayibhili lisitshela ngamafitshane lokho okwenziwa nguNkulunkulu ngesikhathi edala umhlaba lazo zonke izinto eziphilayo ezikuwo, okuhlanganisa indoda lowesifazana bokuqala. Ngemva kwalokho lisitshela ngokudalwa kwendoda lowesifazana bokuqala.—UGenesisi 2:7-25.

Ibhuku likaGenesisi litshengisa ukuthi umsebenzi kaNkulunkulu wokudala wathatha ‘amalanga’ ayisithupha. Kodwa ilanga ngalinye lalingama-awa angu-24 yini? Hatshi. Ibala elithi ‘ilanga’ elisetshenziswe eBhayibhilini lingatsho izikhathi ezitshiyeneyo kusiya ngokuthi kukhulunywa ngani. Ngokwesibonelo kuGenesisi 2:4 kusetshenziswe ibala elithi ‘ilanga’ nxa kukhulunywa ngesikhathi uNkulunkulu asithatha edala izinto.

Imibono Engaqondanga NgoGenesisi 1:1

Okungaqondanga: Akulasikhathi eside kakhulu uNkulunkulu wadala amazulu lomhlaba.

Okuqondileyo: IBhayibhili kalisitsheli ukuthi amazulu lomhlaba kwadalwa nini. Kodwa okutshiwo kuGenesisi 1:1 akuphikisani lalokho okucatshangwa ngabanye ukuthi amazulu lomhlaba sokulamabhiliyoni lamabhiliyoni eminyaka kukhona. b

Okungaqondanga: UGenesisi 1:1 utshengisa ukuthi uNkulunkulu mthathu emunye ngoba ibala lesiHebheru elihunyutshwe ngokuthi ‘Nkulunkulu’ evesini le lisebunengini.

Okuqondileyo: Ibala elithi Nkulunkulu lithathelwa kwelesiHebheru elithi ’Elo·himʹ elisebunengini. Okwenza libe sebunengini yikutshengisa inhlonipho kumbe ukubabaza isikhundla esiphezulu uNkulunkulu alaso, hatshi ubunengi babantu. Elinye ibhuku elichasisa iBhayibhili liveza ukuthi ibala elikuGenesisi 1:1 elithi ’Elo·himʹ ngesiHebheru lisebunengini okutshengisa ukuthi kuyabe kukhulunywa ngoNkulunkulu weqiniso kuphela. Labhalwa laba sebunengini ukuze kutshengiswe inhlonipho lesikhundla esiphezulu uNkulunkulu alaso hatshi ukuthi yibunengi babantu.

Bala uGenesisi isahluko 1 ku-Nguqulo Yomhlaba Omutsha yokutaditsha etholakala ngesiNgisi. IBhayibhili leli libhalwe ngendlela elula, lilemicijo echasisa amavesi, lilamapikitsha, liyakulayela kwamanye amavesi, lilamavidiyo lamamephu njalo ungakhetha ukulalela elirekhodiweyo.

a UJehova libizo likaNkulunkulu.—IHubo 83:18.

b Ibhuku elithi Expositor’s Bible Commentary lithi ibala lesiHebheru elihunyutshwe ngokuthi “ekuqaleni” liyabe lingatsho ukuthi isikhathi esitshiwoyo side okunganani.—Revised Edition, Volume I, ikhasi 51.