“Ngibizani mina ngizaliphendula, ngihle ngilitshele izinto ezimangalisayo lezingazwisisekiyo ebelingazazi.”—UJeremiya 33:3, INguqulo Yomhlaba Omutsha.

 “Ngibiza, ngizakusabela, ngikutshele izinto ezinkulu ezifihlakeleyo ongazaziyo.”—UJeremiya 33:3, The Holy Bible in Ndebele.

 Ngokutsho amazwi la, uNkulunkulu wayenxusa abantu ukuthi bathandaze kuye. Labo ababezathandaza kuye wayezabaphendula ngokubatshela lokho okwakuzakwenzakala esikhathini esizayo.

 “Ngibizani mina ngizaliphendula.” Ibala elithi “ngibizani” alitsho ukumemeza ibizo likaNkulunkulu kodwa litsho ukuthandaza ucela uJehova ukuthi akuqondise.—IHubo 4:1; UJeremiya 29:12.

 UNkulunkulu wayekhuluma lesizwe sako-Israyeli ngesikhathi esitsho amazwi la. Isizwe lesi sasesihlaselwe ngamabutho eBhabhiloni ngenxa yokuhlamukela kwaso uNkulunkulu. (UJeremiya 32:1, 2) UJehova a watshela ama-Israyeli ukuthi amdinge ngokuthandaza kuye.

 ‘Ngizalitshela izinto ezimangalisayo lezingazwisisekiyo ebelingazazi.’ Izithembiso uNkulunkulu afuna ukuziveza ‘azizwisiseki’ ngenxa yokuthi abantu ngeke benelise ukubazazi bebodwa. Umutsho othi ‘izinto ezingazwisisekiyo’ ungahunyutshwa langokuthi ‘izinto ezifihlakeleyo.’

 Yiziphi ‘izinto ezifihlakeleyo’ uNkulunkulu ayefuna ukuzitshela ama-Israyeli? Yizinto ezazizakwenzakala esikhathini esizayo ezigoqela ukubhujiswa kwedolobho leJerusalema litshiywe lingamanxiwa besekusithi ngemva kwesikhathi liphinde livuselelwe. (UJeremiya 30:1-3; 33:4, 7, 8) UNkulunkulu waphinda wabatshela ukuthi wayengasoze atshabalalise isizwe sonke.—UJeremiya 32:36-38.

 Umphrofethi uJeremiya watshelwa amazwi la nguJehova ngo-608 B.C.E. emnyakeni wesi-10 wokubusa kweNkosi uZedekhiya. UJeremiya wayebatshele ukuthi iJerusalema yayizabhujiswa futhi uZedekhiya athunjwe. UZedekhiya kazange awuthande umlayezo lo yikho wathi uJeremiya abotshwe.—UJeremiya 32:1-5; 33:1; 37:21.

 Kungalesosikhathi lapho uNkulunkulu akhuluma khona amazwi akuJeremiya 33:3. Okudanisayo yikuthi iNkosi uZedekhiya kanye lama-Israyeli amanengi baqhubeka ngokungalaleli kwabo. (UJeremiya 7:26; 25:4) Abazange bakhuleke kuNkulunkulu bemcela ukuthi abaqondise. Ngemva komnyaka uZedekhiya wakhitshwa esikhundleni, iJerusalema yabhujiswa futhi abanengi abasindayo bathunjwa bahanjiswa eBhabhiloni.—UJeremiya 39:1-7.

 Amazwi akuJeremiya 33:3 asikhumbuza ukuthi lathi uNkulunkulu angasinika ‘ulwazi oluqondileyo olumayelana lentando yakhe’ njalo asincedise sizwisise ‘izinto ezijulileyo’ nxa singathandaza kuye futhi sibale ilizwi lakhe iBhayibhili. (KwabaseKholose1:9; 1 KwabaseKhorinte 2:10) Izinto ezijulileyo zimayelana lalokho uNkulunkulu azakwenza esikhathini esizayo.—ISambulo 21:3, 4.

 Bukela ividiyo le emfitshane ukuze ubone okumunyethwe libhuku likaJeremiya.