“Angikutshelanga yini ukuthi uqine ube lesibindi? Ungesabi njalo ungatshaywa luvalo ngoba uJehova uNkulunkulu wakho uzakuba lawe loba ngaphi lapho oya khona.”—UJoshuwa 1:9, INguqulo Yomhlaba Omutsha.

 “Kangikulayanga na? Ngathi: Qina, ume isibindi; ungesabi, utshaywe luvalo, ngoba iNkosi uNkulunkulu wakho ilawe kuyo yonke indawo lapho uya khona.”—UJoshuwa 1:9, The Holy Bible in Ndebele.

 Ngokutsho amazwi la, uJehova a uNkulunkulu wayeqinisekisa inceku yakhe ethembekileyo uJoshuwa ukuthi angenelisa ‘ukuqina abe lesibindi’ lanxa ephakathi kobunzima obuphezu kwamandla akhe. Nxa uJoshuwa wayelalela imithetho kaNkulunkulu wayengeke abe lesizatho sokwesaba loba yini eyayingenzakala ngoba uJehova wayezahlala elaye futhi emncedisa. UNkulunkulu wayelaye sibili uJoshuwa ngoba wayemqondisa njalo emncedisa ukuthi anqobe izitha zakhe.

 Kuyini okwakumele uJoshuwa akwenze ukuze ‘aqine abe lesibindi’? Kwakumele abale imibhalo ephefumulelweyo eyayikhona ngalesosikhathi eyayigoqela ‘konke okuseMthethweni owaphiwa uMosi inceku kaJehova.’ b (UJoshuwa 1:7) UJehova watshela uJoshuwa ukuthi abale uMthetho lo “ngelizwi eliphansi [okutsho ‘ukucabanga ngawo,’ The Holy Bible in Ndebele] ubusuku lemini.” (UJoshuwa 1:8) Ukubala lokucabangisisa ngoMthetho kaNkulunkulu kwakuzamnceda ukuthi azimisele ukwenza intando kaNkulunkulu. Okunye okwakumele uJoshuwa akwenze yikusebenzisa konke ayekubala. Ukwenza njalo kwakuzamnceda ukuthi ahlakaniphe futhi konke akwenzayo kuphumelele. Lokhu yikho kanye okwenzakalayo. UJoshuwa wakhonza uJehova ethembekile okwempilo yakhe yonke lanxa wahlangana lobunzima obutshiyeneyo.—UJoshuwa 23:14; 24:15.

 Amazwi uJehova awatshela uJoshuwa ayasikhuthaza lathi lamuhla. Aveza ukuthi uJehova uyabathanda bonke abantu bakhe abamkhonzayo futhi uyabancedisa nxa bephakathi kobunzima. Ufuna konke abakwenzayo kuphumelele. Yikho labo njengoJoshuwa ‘bangaqina babe lesibindi’ nxa bangabala njalo bacabangisise ngeLizwi likaNkulunkulu iBhayibhili besebekusebenzisa lokho abakufundayo.

 Ngemva kokufa kukaMosi, uJehova wakhetha uJoshuwa ukuthi akhokhele abantu bako-Israyeli. (UJoshuwa 1:1, 2) Ngalesosikhathi basebelungela ukungena eLizweni Lesithembiso, ilizwe laseKhenani. Kodwa kwakumele balwe lezitha ezilamandla. Ngokwesibonelo, uJoshuwa kwakumele alwe labantu baseKhenani ababesenza izinto ezimbi kakhulu. c (UDutheronomi 9:5; 20:17, 18) Kanti njalo abaseKhenani babebanengi kulabo futhi belezikhali ezimandla. (UJoshuwa 9:1, 2; 17:18) Lanxa kunjalo uJoshuwa waba lesibindi walalela lokho ayekutshelwa nguJehova. UNkulunkulu waba laye futhi wamncedisa ukuthi anqobe phose zonke izitha zako-Israyeli ngeminyaka eyisithupha nje kuphela.—UJoshuwa 21:43, 44.